ISAIA 10

₁Ija! A bo go latlhega ba ba tlhomang melao e e sa siamang, le bakwadi ba ba kwalelang logwading; ₂e le go thibosa batlhoki mo katlholong, le go tlosetsa bahumanegi ba batho ba me tshiamo, gore basadi ba batlholagadi ba tswe kgapo ya bone, le gore ba ntshe masiela thopo ya bone! ₃Lo a bo lo tlaa dirang mo letsatsing la tekolo, le mo tshwafatsong e e tlaa tswang kwa kgakala? Lo a bo lo tlaa tshabela kwa go mang go bona thuso? Le kgalalelo ya lona lo tlaa e tlogela fa kae? ₄Ba tlaa inama fela fa tlase ga bagolegwi, ba tlaa wela fa tlase ga ba ba bolailweng. Le fa go ntse jaana, bogale jwa gagwe ga bo a fapoga, letsogo la gagwe le sa ntse le lolame fela.

₅Hee, Moasiria, thobane ya bogale jwa me, wena yo serobi se se mo seatleng sa gago e leng kgakatsego ya me. ₆Ke tlaa mo roma a ya go tlhasela morafe o o matlhapa, ke tlaa mo laelela batho ba ke ba galefetseng, gore a tseye thopo, a be a tseye kgapo, le go ba sobotla jaaka seretse sa mebila.

₇Le fa go ntse jalo ene ga a re jalo, le gone pelo ya gagwe ga e gopole jalo: mme go mo pelong ya gagwe go senya, le go kgaola merafe e e seng mebotlana. ₈Gonne, a re: “Dikgosana tsa me a ga di dikgosi tsotlhe? ₉A Kaleno ga a a nna jaaka Karekemiše? A Hamathe ga a a nna jaaka Arepata? A Samaria ga a a nna jaaka Damaseko? ₁₀Jaaka seatla sa me se fitlhile kwa magosing a medimo ya disetwa, e ditshwantsho tsa yone tse di setilweng tsa gaisa yone ya Jerusalema le ya Samaria; ₁₁jaaka ke diretse Samaria le medimo ya disetwa ya gagwe, a ga nketla ke direla Jerusalema jalo, le medimo ya gagwe ya disetwa?”

₁₂Ke gone, go tlaa dirala, go re, e tlaa re Morena a sena go fetsa tiro ya gagwe yotlhe mo thabeng ya Sione le mo Jerusalema, ke tlaa betsa loungo lwa pelo e e lesoko ya kgosi ya Asiria, le kgalalelo ya matlho a gagwe a a kadilweng.

₁₃Gonne o rile: “Ke ka thata ya seatla sa me ke dirile jaana, le ka botlhale jwa me, gonne ke bonokopela; ke katositse melelwane ya ditšhaba, ke thukhuthile dikhumo tsa tsone, le ba ba dulang mo ditulong tsa bogosi ke ba folositse jaaka monna yo o senatla. ₁₄Seatla sa me se fitlhetse mahumo a ditšhaba jaaka setlhaga; jaaka motho a tle a phuthe mae a a tlhadilweng, ke phuthile lefatshe lotlhe fela jalo; mme go ne go se na ope yo o tshikinyang lofuka, le fa e le go atlhamolola molomo, le fa e le go tswirinya.”

₁₅A selepe se a bo se tlaa belafalela ene yo o remang ka sone? A šage o tlaa ikgodisetsa ene yo o setlhang ka ene? Jaaka fa thupa e ka thukhuthetsa ene yo o e tsholetsang, gongwe jaaka fa thobane e ka tsholetsa ene yo o seng logong.

₁₆Ke gone ka moo Morena, Jehofa wa masomosomo, o tlaa tsenyang tlhorego mo go ba ba nonneng ba gagwe; mme ka kwa tlase ga kgalalelo ya gagwe go tlaa gotsiwa phiso jaaka phiso ya molelo. ₁₇Lesedi la Iseraele e tlaa nna lone molelo, le Moitshepi wa gagwe o tlaa nna one kgabo; o tlaa fisa o laila lokhi lwa gagwe le lorwana lwa gagwe ka letsatsi le le lengwe fela. ₁₈O tlaa laila kgalalelo ya sekgwa sa gagwe, le ya leota la gagwe le le ungwang, mowa le mmele; mme go tlaa nna jaaka fa motsholamokgele a idibala. ₁₉Mme masalela a ditlhare tsa sekgwa sa gagwe a tlaa nna mannye, le ngwanyana o ka ba a di kwala fela.

₂₀Go tlaa dirala mo letsatsing leo, go re, maselela a Iseraele, le bafalodi ba ntlo ya ga Jakobe, ga ba ketla ba tlhola ba ikaega mo go ene yo o kileng a ba itaya, mme ba tlaa ikaega mo go Jehofa, Moitshepi wa Iseraele, mo boammaaruring. ₂₁Masalela a tlaa bowa, e bong masiela a ga Jakobe, a boela mo Modimong, Mothata. ₂₂Gonne le fa batho ba me ba ntse jaaka mošawa wa lewatle, ke masiela fela a bone a a tlaa boang; go laotswe nyeletso e e penologang ka tshiamo. ₂₃Gonne nyeletso, e bong nyeletso e e laotsweng, Morena, Jehofa wa masomosomo o tlaa e dira mo gare ga lefatshe lotlhe.

₂₄Ke gone go buang Morena, Jehofa wa masomosomo a re: “Hee, batho ba me ba lo agileng mo Sione, se boifeng Moasiria; le fa a go itaya ka thupa, a lo ekela thobane ya gagwe ka fa mokgweng wa Egepeto. ₂₅Gonne go sa le lobakanyana lo lo khutshwane, mme kgakatsego e tlaa bo e sweditswe, le bogale jwa me, mo tshenyegong ya bone. ₂₆Jehofa wa masomosomo o tlaa mo tsosetsa sebetso, jaaka mo kgailong ya Midiane kwa lefikeng la Orebe; mme thobane ya gagwe e tlaa okama lewatle, o tlaa e tsholetsa ka fa mokgweng wa Egepeto. ₂₇Mme go tlaa dirala mo letsatsing leo, go re, morwalo wa gagwe o tlaa tloga mo leruding la gago, le jokwe ya gagwe mo thamong ya gago, mme jokwe e tlaa nyelediwa ka ntlha ya tlotso.”

₂₈O fitlhile mo Aiathe, o raletse Migerone; o baya makokoma a gagwe kwa Mikemaše; ₂₉ba fetile ka phata; ba thibeletse ba lala kwa Geba; Rama o a roroma; Gibea wa ga Saulo o tshabile. ₃₀Gala thata ka lentswe la gago wena, morwadia Galime! Reetsa, wena Laiše! A motho wa mogolo, wena Anathothe! ₃₁Matemena ke mofaladi; banni ba Gebime ba phuthegela go tshaba. ₃₂Ka tsatsi leno fela o tlaa thibelela kwa Nobe; o thokgoseletsa thaba ya morwadia Sione seatla, e bong thota ya Jerusalema.

₃₃Bonang, Morena, Jehofa wa masomosomo o tlaa kgaola dikala ka therego: tse di kwa godimo tse di godileng di tlaa rengwa, le tse di kwa godimodimo di tlaa folosediwa kwa tlase. ₃₄O tlaa rema ditswatswa tsa sekgwa ka tshipi, mme Lebanone o tlaa wa ka yo o nonofileng.