Moabe o senyegela pele
1Isetsang mmusi wa lefatshe lekgetho la dikwanyana go tswa kwa Sela, o o kwa ntlheng ya sefola sa naga, di ye kwa thabeng ya morwadia Sione. 2Gonne go tlaa nna go re, jaaka dinonyane tse di kailakailang, jaaka setlhaga se se phatlaletseng, bomorwadia Moabe ba tlaa nna jalo kwa matsibogong a Arenone.
3“A go tswe kgakololo, dirafatsa katlholo; dira moriti wa gago o nne jaaka bosigo mo gare ga motshegare; fitlha balatlhegi; o se ka wa senola mokgarakgatshegi. 4A balatlhegi ba nne ba age nao; mme ka ga Moabe o nne boiphitlhelo jwa gagwe mo mothoping; gonne moikgagapeledi o fedisitswe, go thopa go a khutla, bapatiki ba nyeleditswe mo lefatsheng. 5Setulo sengwe sa bogosi se tlaa tlhomamisiwa mo kutlwelongbotlhoko, mme mongwe o tlaa dula mo go sone mo boammaaruring, mo mogopeng wa ga Dafite; a atlhola, a senka katlholo, a le bofefo go dira tshiamo.”
6Re utlwaletse boikgodiso jwa Moabe, fa a le boikgodiso thata; e bong boitelaganyo jwa gagwe, le boikgodiso jwa gagwe, le tšhakgalo ya gagwe; maipelafatso a gagwe e be e se sepe.
7Ke gone ka moo Moabe o tlaa bokolelela Moabe, mongwe le mongwe o tlaa bokolela; lo tlaa lelela ditshwabi tsa mafine tsa Kireharesethe, ka lo tlaa bo lo kgwathetse ruri. 8Gonne maota a Hešebone a a bokalala, le one mofine wa Sibema; barena ba merafe ba robakile ditlhongwa tse di tlhaotsweng tsa one: tsa fitlha kwa Jasere, tsa itsamaelela kwa sefoleng sa naga; menamo ya one e ne ya anama ya tlolaganya lewatle. 9Ke gone ka moo ke tlaa lelang ka selelo sa Jasere, ke lelela mofine wa Sibema; ke tlaa go nosa ka dikeledi tsa me, wena Hešebone, le Eleale; gonne mokgosi wa ntwa o wetse mo dikungweng tsa gago tsa letlhabula, le mo thobong ya gago. 10Boitumelo bo tlositswe, le boipelo mo leoteng le le ungwang; le mo masimong a lofine ga go ketla go nna dipina, le fa e le modumo wa boitumelo; ga go ketla go nna mogati yo o tlaa gatelang bojalwa jwa mofine mo didibeletsong; ke khutlisitse lošalaba lwa phulo ya mafine. 11Ke gone ka moo mala a me a dumelang Moabe jaaka harepe, le diteng tsa me di dumela Kireherese. 12Go tlaa dirala go re e tlaa re Moabe a iponatsa, e tlaa re a itapisa mo felong fa go tlotlometseng, mme a tla mo felong ga boitshepo ga gagwe go rapela, ga a ketla a kgona.
13Lefoko le, ke lone le Jehofa o le buileng mo motlheng o o fetileng ka ga Moabe. 14Gompieno Jehofa o buile a re: “E tlaa re go e se go fete dinyaga di le tharo, jaaka dinyaga tsa yo o thapetsweng tuelo, kgalalelo ya Moabe e tlaa bo e dule nyatsego a na le bontsintsi jo bogolo jwa gagwe; masalela one a tlaa bo a le mannye a sa kaiwe sepe.”
