ISAIA 28

₁Ija! A bo go latlhega serwalo sa tlhogo sa boikgodiso jwa matagwa a Eferaime, le sethunya se se swabang sa bontle jo bo galalelang se se fa tlhogong ya mokgatšha o o nonneng, wa ba ba topetilweng ke bojalwa jwa mofine. ₂Bonang, Morena o na le mongwe yo o thata, yo o nonofileng; jaaka ledimo la sefako, jaaka sešetlana se se senyang, jaaka makobekobe a metsi a a thata a a penologang, o tlaa digela fa fatshe ka seatla. ₃Serwalo sa tlhogo sa boikgodiso sa matagwa a Eferaime se tlaa gatakwa ka dinao; ₄le sethunya se se swabang sa bontle jwa gagwe jo bo galalelang, se se fa tlhogong ya mokgatšha o o nonneng, se tlaa nna jaaka feiye e e buduleng pele, letlhabula le ise le tle, e e a reng motho a e leba a e bona, mme e sa ntse e le mo seatleng sa gagwe a e kometse fela.

₅Mo letsatsing leo Jehofa wa masomosomo o tlaa nna serwalo sa tlhogo sa kgalalelo, le tlhoro e ntle mo masaleleng a batho ba gagwe. ₆Le mowa wa tshiamiso mo go ene yo o nnetseng go atlhola, le thata mo go ba ba tatang ntwa fa kgorong.

₇Ba le bone ba theeketse ka bojalwa jwa mofine, ba timetse ka senoo se se loileng; moperesiti le ene moperofeti, ba theekela ka senoo se se loileng ba kodumeditswe ke bojalwa jwa mofine; ba timetse ka senoo se se loileng, ba marara mo go boneng, ba kwakwaetsa mo katlholong. ₈Gonne dimati tsa bojelo tsotlhe di tletse matlhatsa le matladika, ga go na gope fa go ntle.

₉Wa bo o tlaa ruta mang kitso? A tlhaloganyetsa mang polelo? A ke ba ba kgwisitsweng maši, ba tlosediwa mabele? ₁₀Gonne ke kaelo mo kaelong, kaelo mo kaelong; sekao mo sekaong, sekao mo sekaong; bonnye fano, bonnye fale.

₁₁Nnyaa, mme ka batho ba ba melomo e sele, le ka loleme lo sele o tlaa bua le tšhaba e; ₁₂e o e reileng, a re: “Boikhutso ke jo, lapolosang ene yo o lapileng; le gone thudiso ke e;” le fa go ntse jalo ba gana go utlwa. ₁₃Ke gone ka moo lefoko la ga Jehofa le tlaa nnang kaelo mo kaelong mo go bone, kaelo mo kaelong; sekao mo sekaong, sekao mo sekaong; bonnye fano, bonnye fale; gore ba tle ba tsamaye ba wele kwa morago, ba robege, ba thaiwe ka mutlwane ba tshwarwe.

₁₄Ke gone, utlwang lefoko la ga Jehofa, lona basotli ba batho, ba lo busang tšhaba e, e e mo Jerusalema: ₁₅E re ka lo rile: “Re golaganye le loso, mme re dumalanye le Bobipo;” lwa re: “E tlaa re sebetso se se penologang se ralala, ga se ketla se fitlha kwa go rona; gonne re itiretse maaka botshabelo jwa rona, re iphitlhile ka fa tlase ga tsietso.” ₁₆Ke gone Morena Modimo o buang jaana, a re: “Bonang, ke thaya motheo mo Sione ka lentswe, ke lentswe le le lekilweng, ke lentswe la kgokgotsho le le tlhokegang, le le motheo o o tlhomameng; ‘yo o dumelang ga a ketla a potlaka.’ ₁₇Ke dira tshiamo go nna thapo e e lekanyang, le tshiamiso go nna selekanyo se se thokgameng; mme sefako se tlaa gogoba botshabelo jwa maaka, metsi a tlaa penologela felo ga boiphitlho.” ₁₈Kgolagano ya lona le loso e tlaa golaganololwa, le tumalano ya lone le Bobipo ga e ketla e ema; e tlaa re sebetso se se penologang se ralala, lo tlaa gatakwa ke sone. ₁₉Se tlaa re se ntse se ralala se lo tseye fela; gonne se tlaa ralala ka moso le ka moso, motshegare le bosigo; mme go tlhaloganya polelo e tlaa bo e se sepe fa e se therego fela. ₂₀Gonne bolao bo bokhutshwane, bo tlhaela motho go ikotlolola mo go jone, kobo e tshesane e tlhaela motho go ipipa ka yone. ₂₁Gonne Jehofa o tlaa tsoga a ema jaaka mo thabeng ya Perasime, o tlaa galefa jaaka mo molapong wa Gibeone; gore a tle a dire tiro ya gagwe, e le tiro ya gagwe e sele, a be a diratse go dira ga gagwe, e le go dira ka go sele.

₂₂Ke gone jaana, se nneng basotli, e ka tla ya re gongwe dikgole tsa lona tsa thatafadiwa; gonne boswetso, e bile e le jo bo laoletsweng lefatshe lotlhe, ke bo utlwile mo go Jehofa Modimo wa masomosomo.

₂₃Sekegang tsebe, lo utlwe lentswe la me; reetsang, lo utlwe puo ya me: ₂₄A molemi o a ba a ka tlhola a ntse a lema fela gore a jale? A o ka nna a pitikolola mmu a thuba makote a tshimo ya gagwe ka gale ka gale? ₂₅A ga e a re a sena go papana fa godimo ga yone, a ga a latlhele dipeo tsa kumina yo montsho, a gase kumina, a ba a jala mabele a makhutshwane ka ditsela, le barele fa o go laoletsweng, le lebelebele mo tlhofing ya lone? ₂₆Gonne Modimo wa gagwe o mo kaela sentle, o a mo ruta. ₂₇Gonne kumina yo montsho ga a phothwe ka mootlwana, o o bokete, le gone lekoto la koloi ga le ke le dikolosiwa mo kumineng; mme kumina yo montsho o phothwa ka mootlwana, le kumina ka thobanyane. ₂₈Mabele a a makhutshwane a tle a dikolosediwe; gonne ga a ke a tlhola a ntse a a fola ka gale; mme le fa lekoto la koloi ya gagwe le a gasa, le dipitse tsa gagwe ga di a thuge. ₂₉Mo le gone go tswa mo go Jehofa wa masomosomo, yo e leng ene kgakgamatso mo kgakololong, e le Mogaisi mo botlhaleng.