ISAIA 33

₁Ija! A bo go latlhega wena yo o thopang, mme o se ka wa thopiwa; wa dira ka mooko, mme wena ba se ka ba go direla ka mooko! O tlaa re o sena go bakela go thopa, wena o tlaa thopiwa; mme o tlaa re o sena go khutla go dira ka mooko, wena ba tlaa go direla ka mooko.

₂Jehofa, a ko o nne pelotshweu go rona! Re ntse re go lebeletse; a ko o nne letsogo la bone ka meso yotlhe, le poloka ya rona mo metlheng ya tlalelo. ₃Ditšhaba di tshabile ka modumo wa tumo; merafe e gasagasegile ka go itlotloanya ga gago. ₄Thopo ya lona e tlaa kokoanngwa jaaka molome o tle o kokoane; ba tlaa e tlolela jaaka tsie e tle e tlolatlole.

₅Jehofa o goletsegile; gonne o agile kwa godimong; o tladitse Sione ka tshiamiso le tshiamo. ₆Go tlaa nna nitamo mo metlheng ya gago, e bong letlotlo la poloka, le botlhale le kitso; go boifa Jehofa ke khumo ya gagwe.

₇Bonang, bapelotona ba bone ba goa ba le kwa ntle, ba ba romilweng kagiso ba lela mo go botlhoko. ₈Ditsela tsa meheru di swafetse, motsamai wa tsela o a khutla; o sentse kgolagano, o nyaditse metse, ga a tlhokomele motho. ₉Lefatshe le a lela, le a topetega; Lebanone o tlhabilwe ke ditlhong, o swabela ruri; Sharone o ntse jaaka sekaka; Bašane le Karemele, ba tlhotlhorega makakaba.

₁₀Jaanong ke tlaa tsoga, ke ema, go bua Jehofa; jaanong ke tlaa itlotloanya; jaanong ke tlaa goletsega. ₁₁Lo tlaa ithwala mmoko, lo tlaa belega serite; mowa wa lona ke molelo o o tlaa lo lailang. ₁₂Ditšhaba di tlaa nna jaaka go besiwa ga maje a manyaphiri; jaaka mitlwa e e remilweng, e e fisiwang mo molelong. ₁₃Utlwang, lona ba lo kgakala, se ke se dirileng; le lona ba lo fa gaufi, ipoleleng nonofo ya me.

₁₄Baleofi ba ba mo Sione ba a boifa; go tlakasela go tshoganyeditse ba ba tlhokomologileng Modimo. E mang mo go rona yo o tlaa agang le molelo o o lailang? E mang mo go rona yo o tlaa agang le diphiso tse di sa khutleng? ₁₅Yo o tsamayang ka tshiamo, mme a bua ka thokgamo; yo o nyatsang dipapadi tsa patiko, a itlhotlhora diatla mo go tseyeng dituelelo tsa phaposo, yo o ikabang ditsebe, gore a se utlwe ka ga madi a motho, a budulatse matlho a gagwe, gore a se bone bosula: ₁₆Yo, ke ene yo o tlaa agang kwa godimo; bonno jwa gagwe jwa phemelo e tlaa nna maiphemelo a mafika; dijo tsa gagwe o tlaa di fiwa; metsi a gagwe o tlaa a bona ruri.

₁₇Matlho a gago a tlaa bona kgosi e le mo bontlentleng jwa yone; a tlaa leba lefatshe le le namaletseng kwa kgakala. ₁₈Pelo ya gago e tlaa akanya therego e rumaruma; ana yo o ne a bala o kae? Yo o ne a lekanya lekgetho o kae? O kae ene yo o ne a bala dikago tsa phemelo? ₁₉Ga o ketla o bona yone tšhaba e e logala, tšhaba ya puo e e kwa teng, e o sa kakeng wa e lemoga; tšhaba e e loleme lo sele lo o sa kakeng wa lo tlhaloganya. ₂₀Leba Sione, motse wa mediro ya rona e e masisi; Matlho a gago a tlaa bona Jerusalema e le boago jwa lodule, e le mogope o o se ketlang o tlosiwa, o dimapo tsa one di se ketlang di khumolwa gope, le fa e le dithapo tsa one go kgaoga gope. ₂₁Gone foo Jehofa o tlaa nna le rona ka borena, felong ga dinoka le dinokana tse di atlhameng; kwa go se ketlang go tsamaya mokoro ope ka dikankase gone, le fa e le sekepe se se fatlhang ka bontle go feta ka gone. ₂₂Gonne Jehofa ke Moatlhodi wa rona, Jehofa ke Motlhoma molao wa rona, Jehofa ke Kgosi ya rona; ene o tlaa re boloka. ₂₃Megala ya gago e repile; e ne e sa kake ya thatafatsa thito ya pinagare ya sekepe sa bone, e ne e sa kake ya tsharolola letsela; foo thopo ya kgapo e kgolo ya kgaoganngwa; ditlhotsa tsone tsa tsaya thopo. ₂₄Monni wa gona ga a ketla a re: “Ke a bobola,” batho ba ba agang gona ba tlaa itshwarelwa boikepo jwa bone.