ISAIA 59

₁Bonang, letsogo la ga Jehofa ga le a khutshwafala, go re ga le kake la boloka; le tsebe ya gagwe ga e a kabala, go re ga e kake ya utlwa. ₂Maikepo a lona a lomologantse fa gare ga lona le Modimo wa lona; le maleo a lona a lo subetse sefatlhogo sa one gore a gane go utlwa. ₃Gonne diatla tsa lona di leswe ka madi, le menwana ya lona ka boikepo; dipounama tsa lona di buile maaka; diteme tsa lona di pepedumapepeduma boikepo.

₄Ga go na ope yo o isang tshekong ka tshiamo, ga go na ope yo o buelelang kgang mo boammaaruring; ba ikanya boithamako, ba bua maaka; ba ima bosenyi, ba belega boikepo. ₅Ba tototsha mae a šaušawane, ba loga bobi jwa segokgo; yo o jang mae a bone a swe, le le le phatlakantsweng le tswe legwere. ₆Mabi a bone ga a ketla a tswa diaparo, le gone ga ba ketla ba ikapesa ka ditiro tsa bone; ditiro tsa bone ke ditiro tsa boikepo; tiro ya thubakanyo e mo diatleng tsa bone. ₇Dinao tsa bone di sianela kwa bosuleng, ba itlhaganelela go tsholola madi a a se nang molato; megopolo ya bone ke megopolo ya boikepo; tshwafalo le tshenyego di mo motlhaleng wa bone. ₈Tsela ya kagiso ga ba e itse; ga go na tshiamo mo metlhaleng ya bone; ba itshokamiseditse ditselana; le fa e le mang yo o tsamayang mo go tsone ga a ke a itse kagiso.

₉Ke gone ka moo katlholo e ntseng kgakala le rona, le tshiamo ga e re fitlhele; re batla lesedi, mme re bona lefifi fela; re batla phatsimo mme, re tsamaya mo go sa bonaleng fela. ₁₀Re apaapa lomota jaaka difofu; ee, re apaapa jaaka ba ba se nang matlho; re tlauma motshegare jaaka fa go le lotlatlana; mo go ba ba dingware re ntse jaaka batho ba ba suleng fela. ₁₁Re kgorotla rotlhe jaaka dibera, re lela mo go botlhoko jaaka maeba; re batla katlholo, mme ga go na epe; re batla poloko, mme e ntse kgakala le rona.

₁₂Gonne ditlolo tsa rona di ntsifetse fa pele ga gago, le maleo a rona a supa ka ga rona; gonne ditlolo tsa rona di na le rona, mme ka ga maikepo a rona re a a itse; ₁₃ka go tlola, le ka go itatola Jehofa, le ka go fapoga go latela Modimo wa rona, ka go bua patiko le tsuololo, ka go ithwala le go ntsha mafoko a maaka a a tswang mo pelong. ₁₄Katlholo e tenegetse kwa morago, le tshiamo e emetse kwa kgakala; gonne boammaaruri bo ole mo mmileng, le thokgamo ga e kake ya tsena. ₁₅Ee, boammaaruri bo a tlhokafala; mme yo o kgaoganang le bosula o itshemela go thopiwa; Jehofa o na a go bona, mme ga mo itumolola fa go se na katlholo.

₁₆Mme a bona fa go se na monna ope, mme a gakgamala fa go se na morapeledi; ke gone ka moo letsogo la gagwe ka esi la mo leretse poloko; tshiamo ya gagwe yone ya mo tshegetsa. ₁₇A apara tshiamo jaaka phemo ya sehuba, le tlhoro ya phemo mo tlhogong ya gagwe; a apara diaparo tsa tefetso, le tlhoafalo a e apara jaaka kobo. ₁₈Fela ka fa ditiro tsa bone di ntseng ka teng, o tlaa duela fela jalo; baganetsi ba gagwe ka tšarologo, baba ba gagwe ka tuelo; mme ditlhare o tlaa di duela ka tekanyetso. ₁₉Jalo ba tlaa boifa leina la ga Jehofa ba le kwa bophirimatsatsi, le kgalalelo ya gagwe ba le kwa botlhabatsatsi; gonne o tlaa tla jaaka noka e e phašametsegang, e go hema ga Jehofa go e phašametsang.

₂₀“Morekolodi o tlaa tla mo Sione, le mo go bone ba ga Jakobe ba ba boang mo tlolong,” go bua Jehofa. ₂₁“Ka ga me, ke yone kgolagano ya me nabo,” go bua Jehofa; “mowa wa me o o mo go wena, le mafoko a me a ke a tsentseng mo molomong wa gago, ga di ketla di tloga di tswa mo molomong wa gago, le fa e le mo molomong wa bana ba gago, le fa e le mo molomong wa bana ba bana ba gago, go tloga fano gompiyeno, go ya bosakhutleng,” go bua Jehofa.