Tola
1Morago ga Abimeleke ga ema Tola morwa Pua, morwa Doto, monna wa Isakare, go boloka Iseraele; mme a aga mo Shamire mo lefatsheng la makgabana la Eferaime. 2A atlhola Iseraele ka dinyaga di le 23, a swa, a fitlhwa mo Shamire.
Jaire
3Morago ga gagwe ga ema Jaire wa Mogileate; a atlhola Iseraele ka dinyaga di le 22. 4O ne a na le bana ba basimane ba le 30 ba ba palamang dieselana di le 30, ba na le metse e e 30, e e bidiwang Hafothe-jaire le gompieno, e e mo lefatsheng la Gileate. 5Mme Jaire a swa, a fitlhwa mo Kamone.
Jefetha
6Bana ba Iseraele ba dira se se bosula gape mo matlhong a ga Jehofa, ba direla boBaale, le boAšetarothe, le medimo ya Siria, le medimo ya Sitone, le medimo ya Moabe, le medimo ya bana ba Amone, le medimo ya Bafilisitia; ba latlha Jehofa, ba se ka ba mo direla. 7Bogale jwa ga Jehofa jwa tukela Iseraele, mme a ba rekisetsa mo seatleng sa Bafilisitia, le mo seatleng sa bana ba Amone. 8Ba tshwenya ba patika bana ba Iseraele ka ngwaga oo; ba patika bana ba Iseraele botlhe ba ba kwa moseja ga Joretane mo lefatsheng la Baamore le le leng mo Gileate, ka dinyaga di le 18. 9Bana ba Amone ba kgabaganya Joretane ba ya go tlhabana le Juta, le Benjamine, le ntlo ya ga Eferaime; mme Iseraele a pitlagana thata.
10Bana ba Iseraele ba goela kwa go Jehofa ba re: “Re go leofetse, fela ka ntlha ya gonne re latlhile Modimo wa rona, re diretse boBaale.”
11Jehofa a raya bana ba Iseraele a re: “A ga ke a lo golola mo go Baegepeto, mo go Baamore, mo baneng ba Amone, le mo go Bafilisitia? 12Le bone Basitone, le Baamaleke, le Baamone ba ne ba lo patika; lwa goela kwa go nna, mme ka lo golola mo seatleng sa bone. 13Le fa go ntse jalo lo ntatlhile, lo diretse medimo e sele; ke gone ga nketla ke tlhola ke lo golola. 14Yang lo goele medimo e lo e itshenketseng; a e lo golole mo motlheng wa pitlagano ya lona.”
15Bana ba Iseraele ba raya Jehofa ba re: “Re leofile; re direle ka fa o bonang go le molemo ka gone; fela, re a go rapela, re golole kajeno.” 16Mme ba tlosa medimo e e leng e sele ya seeng mo go bone, ba direla Jehofa; mme mowa wa gagwe wa tlhokofala ka ntlha ya matladika a Iseraele o ne a le mo go one.
17Foo bana ba Amone ba phuthega, ba thibelela mo Gileate. Bana ba Iseraele ba iphutha ba thibelela mo Misepa. 18Batho, e bong dikgosana tsa Gileate, ba raana ba re: “E mang monna yo o tlaa simololang go tlhabana le bana ba Amone? E tlaa nna ene tlhogo ya banni botlhe ba Gileate.”
