Samesone kwa Gasa
1Samesone a ya Gasa, mme a bona gone seaka, a tsena kwa go sone. 2Ga bolelelwa Bagasa ga twe: “Samesone o tsile mono.” Ba mo dikanyetsa, ba lala ba mo laletse mo kgorong ya motse, ba lala ba didimetse fela ba re: “Mmang bosa bo se pele, foo re tlaa mmolaya.” 3Samesone a lala fela go ya gare ga bosigo, mme a tsoga bosigogare, a tshwara ditswalo tsa kgoro ya motse, le mepako yoo mebedi, a e somola, le one mophakalego, a di sikara a di isa kwa godimo ga thaba e e fa pele ga Heberone.
Samesone le Delila
4Ga dirala morago ga moo, a rata mosadi, mongwe mo mokgatšheng wa Soreke, leina la gagwe e le Delila. 5Barena ba Bafilisitia ba ya kwa go ene mosadi, ba mo raya ba re: “Mo hepise o tle o bone kwa thata e kgolo ya gagwe e nnang gone, le ka fa re ka mo fenyang ka gone, gore re mo golege, re mo utlwise botlhoko; mongwe le mongwe wa rona o tlaa go naya dipapetlana tsa selefera di le 1 100.”
6Delila a raya Samesone a re: “Ke a go rapela, mpolelela kwa thata e kgolo ya gago e nnang gone, le se o ka golegwang ka sone go tla o utlwisiwa botlhoko.”
7Samesone a mo raya a re: “Fa ba nkgolega ka megala e e metsi e supa, e iseng e ome gope, foo ke tlaa koafala, ke ba ke nna jaaka motho yo mongwe fela.”
8Foo barena ba Bafilisitia ba leretse mosadi megala e e metsi e supa, e e iseng e ome, mme a mo golega ka yone. 9Jaana mosadi o ne a na le balaledi, ba le mo ntlwaneng e e kwa teng. A mo raya a re: “Samesone, Bafilisitia ba a go wela.” A kgaola megala, jaaka tlhale ya leloba e tle e kgaoge fa e ama molelo. Mme thata ya gagwe e se ka ya itsiwe.
10Delila a raya Samesone a re: “Bona, o ntshotlile, o mpoleletse maaka; ke a go rapela, mpolelela se o ka golegwang ka sone.”
11A raya mosadi a re: “Fa ba nkgolega fela ka megala e meša e e logilweng e go iseng go dirwe sepe ka yone, foo ke tlaa koafala ke ba ke nna jaaka motho yo mongwe fela.”
12Jalo Delila a tsaya megala e meša e e logilweng, a mo golega ka yone, a mo raya a re: “Samesone, Bafilisitia ba a go wela.” Balaledi ba bo ba le mo ntlwaneng e e kwa teng. Mme a e kgaola mo mabogong a gagwe jaaka tlhale.
13Delila a raya Samesone a re: “Nako e sa le eno o ntse o ntshotlile fela, o mpoleletse maaka; mpolelele se o ka golegwang ka sone.” A mo raya a re: “Fa o logela makaodi a supa a tlhogo ya me mo selogelong sa monyedi.”
14Mme a se kokothela ka lomapo, a mo raya a re: “Samesone, Bafilisitia ba a go wela.” A kubuga mo borokong, a somola lomapo lwa selogelo, a tsamaya ka lone; le ka selogelo.
15A mo raya a re: “Ana o ka bua jang o re, o a nthata, le mororo pelo ya gago e se mo go nna? O ntshotlile ka paka tse tharo tse, ga o ise o mpolelele kwa thata e kgolo ya gago e nnang gone.” 16Mme ga dirala ya re a ntse a mo emelela thata ka malatsi otlhe ka mafoko a gagwe, a ntse a mo leka ka thata, mowa wa gagwe wa tshwenyega go ya losong. 17Mme a mmolelela pelo ya gagwe yotlhe fela, a mo raya a re: “Ga go ise go ko go tle logare mo tlhogong ya me; gonne ke sa le ke tswa sebopelong sa ga mme ke ntse ke le Monasirite Modimong; fa ke beolwa, foo thata ya me e tlaa ntlogela, mme ke tlaa koafala, ke ba ke nna jaaka motho yo mongwe fela.”
18E rile Delila a bona fa a mmoleletse pelo ya gagwe yotlhe fela, a roma a ya go bitsa barena ba Bafilisitia, a re: “Tlang ka baka lono fela, gonne o mpoleletse pelo yotlhe ya gagwe.” Foo barena ba Bafilisitia ba tla kwa mosading, ba tla ba tshotse madi. 19Mme a mo robatsa fa mangoleng a gagwe; a bitsa monna mongwe, a beola makaodi a supa a tlhogo ya gagwe; a simolola go mo koafatsa, le thata ya gagwe ya mo tlogela. 20Mosadi a re: “Samesone, Bafilisitia ba a go wela.” Mme a kubuga mo borokong a ithaya a re: “Ke tlaa tswela kwa ntle jaaka gale ke ikudubatsa.” A ba a sa itse fa Jehofa a mo tlogetse. 21Bafilisitia ba mo tshwara, ba mo gonya matlho; ba mo isa kwa Gasa, ba mo golega ka mefiri ya kgotlho; a sila mo ntlong ya kgolegelo. 22Le fa go ntse jalo moriri wa tlhogo ya gagwe wa simolola go tlhoga a sena go beolwa.
Loso lwa ga Samesone
23Barena ba Bafilisitia ba phuthega ba tla go isetsa Dagone modimo wa bone tlhabelo e kgolo le go itumela; gonne ba re: “Modimo wa rona o tsentse Samesone, mmaba wa rona mo seatleng sa rona.” 24E rile batho ba mmona, ba boka modimo wa bone, gonne ba re: “Modimo wa rona o re tsentse mmaba wa rona seatleng, le mosenyi wa lefatshe la rona, yo o bolaileng ba rona ba le bantsi.” 25Ga dirala ya re dipelo tsa bone di dira mokete, ba re: “Bitsang Samesone gore a tle go re direla ditshameko.” Ba bitsa Samesone kwa ntlong ya kgolegelo; a dira ditshameko fa pele ga bone; ba mmaya fa gare ga maotwana a ntlo. 26Samesone a raya mosimane yo o mo tshwereng ka letsogo a re: “Ntesa ke apaape maotwana a ntlo e emeng mo go one, gore ke ikaege mo go one.” 27Jaana ntlo ya bo e tletse banna le basadi; le barena botlhe ba Bafilisitia ba le gone; le mo godimo ga ntlo go ne go le banna le basadi, e ka ne e le 3 000, ba ba lebileng Samesone a dira ditshameko.
28Samesone a biletsa kwa go Jehofa a re: “Ao, Jehofa Modimo, ke a go rapela, a ko o nkgopole, o nthatafatse, ka lobaka lono fela Modimo, gore ke ipusolosetse Bafilisitia ka bonako ka ntlha ya matlho a me a mabedi.” 29Samesone a tshwara maotwana a mabedi a gare, a ntlo e emeng mo go one, a ikaega mo go one, mo go lengwe ka letsogo le legolo, mo go le lengwe ka la molema. 30Samesone a re: “A ke swe le Bafilisitia.” A inama ka thata yotlhe ya gagwe; mme ntlo ya wela mo bareneng, le mo bathong botlhe ba ba mo go yone. Jalo baswi ba o ba bolaileng ka lobaka lwa loso lwa gagwe ba ne ba le bantsi go feta ba o ba bolaileng a sa tshedile.
31Foo ba ga gabo le botlhe ba kgotla ya ga rraagwe, ba ya ba mo tsaya, ba mo tlhatlosa, ba ya go mo fitlha fa gare ga Sora le Ešetaole, mo bofitlhelong jwa ga Manoa rraagwe. O ne a atlhotse Iseraele ka dinyaga di le 20.
