Molefi le nyatsi ya gagwe
1Ga dirala ya re mo metlheng eo, ka go se na kgosi mo Iseraele, ga bo go le Molefi mongwe a jaketse ntlheng ya lefatshe la makgabana la Eferaime, mme a bo a tsere mogadingwana mo Bethelehema wa Juta. 2Mme mogadingwana wa gagwe a akafala a le mo go ene, a tlogela monna, a ya kwa ntlong ya ga rraagwe kwa Bethelehema wa Juta, a nna gone ka dikgwedi di le nne. 3Monna wa gagwe a tloga a mo latela, a ya go bua nae ka pelonomi, le gore a mmuse, mme a bo a na le motlhanka wa gagwe le diesela di le pedi; mosadi a mo isa mo ntlong ya ga rraagwe; e rile rraagwe mosetsana a bona monna, a itumela go kopana nae. 4Mogwagadie, e bong rraagwe mosetsana, a mo kganela, mme a nna nae malatsi a le mararo; jalo ba ja ba nwa, mme ba tlhola teng. 5Ka letsatsi la bone, ba tsoga ka maphakela, mme a ema a re o a tsamaya, mme rraagwe mosetsana a raya mogwaagwe a re: “Ikgomotse pelo ka senkgwenyana, mme morago ga moo lo ka tsamaya.”
6Jalo ba dula, ba ja ba nwa boo babedi mmogo; rraagwe mosetsana a raya monna a re: “Ke a go rapela, ithethebatse pelo, mme o lale, a pelo ya gago e ipele.”
7Monna a ema, a re o a tsamaya; mogwagadie a mo rapela thata, mme a lala gone gape. 8A phakela ka letsatsi la botlhano, a re o a tsamaya; rraagwe mosetsana a re: “Ke a go rapela o ikgomotse pelo, nama o sa ntse, lo tlaa ngoba.” Ba ja boo babedi.
9E rile monna yoo a ema, a re o a tsamaya, ene le mogadingwana wa gagwe, le motlhanka wa gagwe, mogwagadie, e bong rraagwe mosetsana, a mo raya a re: “Bona, letsatsi le fetile, ke a lo rapela, lalang fa; bona letsatsi le a kotlomela, lala fa gore pelo ya gago e itumele; e re ka moso lo phakele lo bolole, gore o ye gaeno.” 10Mme monna a gana go lala bosigo joo, a ema a tsamaya, a tla a fitlha bolebagana le Jebuse (ke one Jerusalema); ga bo go na nae diesela di le pedi tse di belesitsweng; le mogadingwana wa gagwe a na nae. 11E rile ba le fa Jebuse, letsatsi la bo le fetile thata; motlhanka a raya mong wa gagwe a re: “Ke a go rapela, ntlo re fapogele mo motseng o wa Bajebuse, re lale gone.”
12Mong wa gagwe a mo raya a re: “Ga re fapogele mo motseng wa moeng, yo e seng wa bana ba Iseraele; re tlaa kgabaganyetsa kwa Gibea.” 13A raya motlhanka wa gagwe a re: “Ntlo re atamele golo gongwe ga mafelo a; re tlaa lala mo Gibea, le fa e le mo Rama.” 14Ba feta ba tsamaya; ba phirimelelwa gaufi le Gibea, o o leng wa Benjamine. 15Ba fapogela teng, ba ya go lala mo Gibea; mme a tsena a dula mo mmileng wa motse; gonne go no go se na motho ope yo o ba tsholang mo ntlong go lala gone.
16Bonang, e rile go le maitseboana, ga tla monnamogolo mongwe, a tswa tirong ya gagwe kwa nageng; monna yoo e ne e le wa lefatshe la makgabana la Eferaime, a bo a jakile mo Gibea. Batho ba felo foo e ne e le Babenjamine. 17Mme a tsholetsa matlho a bona moeti mo mmileng wa motse; monnamogolo a re: “O ya kae? O tswa kae?”
18A mo raya a re: “Re tswa Bethelehema wa Juta, re fetela ntlheng ele ya lefatshe la makgabana la Eferaime; ke tswa teng, ke ya kwa Bethelehema wa Juta; jaanong ke ya kwa ntlong ya ga Jehofa, ga go na motho ope yo o ntsholang mo ntlong ya gagwe. 19Le fa go ntse jalo motlhanka o gone le dijo tsa diesela tsa rona, le senkgwe se teng le bojalwa jwa mofine, ga me, le ga mohula wa gago, le ga lekau le batlhanka ba gago ba na nago; ga go tlhokafale sepe.”
20Monnamogolo a re: “A kagiso e nne nao; le fa go ntse jalo a dilo tsotlhe tse o di tlhokang di nne molato wa me; fela o se ka wa lala mo mmileng.” 21Jalo a mo isa mo ntlong ya gagwe, a naya diesela dijo; ba itlhapisa dinao, ba ja ba nwa.
22E ne ya re dipelo tsa bone di dira mokete, bonang, banna ba motse, e bong banna ba ba diramatla, ba dika ntlo, ba itaya setswalo; ba bua le mong wa ntlo, e bong monnamogolo, ba re: “Ntsha monna yo o tsileng mo ntlong ya gago, gore re tle re mo itse.”
23Monna yoo, e bong mong wa ntlo, a tswela kwa go bone, a ba raya a re: “Nnyaa bana ba ga rra, ke a lo rapela lo se ka lwa dira bosula jo bo kalo; e re ka monna yo a tsile mo ntlong ya me, lo se ka lwa dira bosilo joo. 24Bonang, ngwanake ke yo wa morweetsana le mogadingwana wa gagwe; ke tlaa ba ntsha jaana lo tlaa ba kokobetsa lo dira ka bone ka fa lo ratang ka teng; monna yo lo se ka lwa mo direla bosilo jo bo ntseng jalo.” 25Mme banna bao ba gana go mo reetsa; mme monna yoo a tshwara mogadingwana wa gagwe, a mo ntshetsa kwa go bone; ba mo itse, ba lala ba mmetelela go ya mosong; e rile ka mahube a naka tsa kgomo ba mo lesa a tsamaya.
26Foo ga tla mosadi ka mahube, a wela fa ntlong ya monna yo, e morena wa gagwe o mo go yone ga tsamaya bosa jwa sa. 27Morena wa gagwe a tsoga mo mosong, a bula ntlo, a tswela kwa ntle, a re o a tsamaya; mme bonang, mosadi, e bong mogadingwana wa gagwe, a bo a wetse fa setswalong sa ntlo, diatla tsa gagwe di le fa serepoding. 28A mo raya a re: “Ema re tsamaye;” mme ga se ka ga araba ope; foo a mo pega mo eseleng; mme monna a nanoga, a ya kwa ga gagwe. 29E rile a fitlha mo ntlong ya gagwe a tsaya thipa, a tshwara mogadingwana wa gagwe a mo kgaoganya dirwe di le 12, ka fa marapong a gagwe, a mo isa le melelwane yotlhe ya Iseraele. 30Ga nna jaana, gore botlhe ba ba go bonang, ba re: “E sa le ka bana ba Iseraele ba tswa Egepeto le gompieno, ga go ise go ko go dirwe tiro epe e e ntseng jalo, le fa e le go bonwa; e gopoleng, lo gakololane, lo bue.”
