Abimeleke
1Abimeleke morwa Jerubaale a ya Shekeme kwa go bomalomaagwe, a bua nabo, le gone a bua le losika lotlhe lwa ntlo ya ga rra mmaagwe, a re: 2“Ke a lo rapela, lo tlo lo bue mo ditsebeng tsa banna botlhe ba Shekeme, lo re: ‘Se se molemo mo go lona ke eng? A ke bomorwa Jerubaale botlhe e le batho ba le 70, ba lo busa, kgotsa a e ka nna motho a le mongwe fela a lo busa?’ Gape lo gakologelwe fa ke le lesapo la lona, le nama ya lona.” 3Bomalomaagwe ba bua ka ga gagwe mo ditsebeng tsa banna botlhe ba Shekeme, ba bua mafoko otlhe a; mme dipelo tsa bone tsa rata go ya le Abimeleke; gonne ba re: “Ke ngwana a kgaitsadia rona.” 4Ba mo naya madi a selefera a le 70, ba a tsaya mo ntlong ya ga Baale-berithe, mme Abimeleke a thapa ka yone banna ba ba difafalele le ba ba dieleele, ba ba tlogileng ba mo sala morago. 5A ya kwa ntlong ya ga rraagwe kwa Ofera, mme a bolaya bomorwa rraagwe, bomorwa Jerubaale, e le batho ba le 70, a ba bolaela mo letlapeng le le lengwe fela; mme Jothame, morwa Jerubaale yo mmotlana a tlogelwa; gonne o ne a iphitlhile. 6Banna botlhe ba Shekeme ba phuthega le ba ntlo ya Milo, ba ya ba dira Abimeleke kgosi, fa mookeng wa sefikantswe se se motloutlo se se mo Shekeme.
7E rile ba go bolelela Jothame, a ya a ema mo godimo ga thaba ya Gerisime, a tsholetsa lentswe la gagwe, a kua, a ba raya a re: “Ntheetsang, lona banna ba Shekeme, gore Modimo o tle o lo reetse. 8E kile ya re motlha mongwe ditlhare tsa bolola tsa ya go itloletsa kgosi; tsa raya motlhware tsa re: ‘Wena o re buse.’ 9Mme motlhware wa di raya wa re: ‘Ana a ke ka tlogela monono wa me o go tlotlwang Modimo le motho ka one, ka ya go ebaebela mo godimo ga ditlhare?’ 10Ditlhare tsa raya mofeige tsa re: ‘Ntlo wena o re buse.’ 11Mofeige wa di raya wa re: ‘A nka tlogela monate wa me le loungo lwa me lo lo molemo ka ya go ebaebela mo godimo ga ditlhare?’ 12Ditlhare tsa raya mofine tsa re: ‘Ntlo wena o re buse.’ 13Mofine wa di raya wa re: ‘A nka tlogela bojalwa jwa me jo bo itumedisang Modimo le motho, ka ya go ebaebela mo godimo ga ditlhare?’ 14Foo ditlhare tsotlhe tsa raya mokaikai tsa re: ‘Ntlo wena o re buse.’ 15Mokaikai wa raya ditlhare wa re: ‘Fa ruri lo ntloletsa go nna kgosi, foo lo tle lo ikanye moriti wa me; fa go sa nna jalo a go tswe molelo mo mokaikaing, o laile masetara a Lebanone.’
16“Ke gone jaana a e re fa lo dirile ka boammaaruri le ka thokgamo, ka e le fa lo dirile Abimeleke kgosi, fa lo diretse Jerubaale le ntlo ya gagwe sentle, fa lo mo diretse ka fa tshwanelong ya diatla tsa gagwe – 17Gonne rre o ne a lo tlhabanela, a ba a latlha botshelo jwa gagwe, a lo golola mo seatleng sa Midiane; 18lo tsogologetse ntlo ya ga rre gompieno go tlhabana nayo, lo bile lo bolaile bomorwawe, e le batho ba le 70, lo ba bolaetse mo letlapeng le le lengwe fela; lo dirile Abimeleke, morwa lelata la gagwe kgosi ya batho ba Shekeme, ka e le ngwana wa kgaitsadia lona – 19Fa e bo ne ne jaana lo diretse Jerubaale le ntlo ya gagwe ka boammaaruri le thokgamo gompieno, foo lo nne lo itumele mo go Abimeleke, lo mme le ene a itumele mo go lona. 20Mme fa go sa nna jalo, a go tswe molelo mo go Abimeleke, o laile banna ba Shekeme, le ntlo ya Milo; le gone a go tswe molelo mo banneng ba Shekeme, le mo ntlong ya Milo, o laile Abimeleke.” 21Jothame a sia, a tshaba, a ya kwa Beere, a aga gone, ka go tshaba Abimeleke morwa rraagwe.
22Abimeleke a nna kgosana ya Iseraele ka dinyaga di le tharo. 23Modimo wa tsosa mowa o o bosula gare ga Abimeleke le banna ba Shekeme; mme banna ba Shekeme ba direla Abimeleke ka boferefere; 24gore polao e e diretsweng bomorwa Jerubaale ba ba 70 e tle e tle, le gore madi a bone a tle a bewe mo go Abimeleke morwa rraabo, yo o ba bolaileng, le mo banneng ba Shekeme, ba ba thatafaditseng mabogo a gagwe go tla a bolaya bomorwa rraagwe. 25Banna ba Shekeme ba mmeela balaledi mo godimo ga dithaba, ba thukhutha botlhe ba ba fetang ka bone ka tsela eo; mme ga bolelelwa Abimeleke.
26Gaale morwa Ebete a tla le bomorwa rraagwe, ba ya kwa Shekeme; banna ba Shekeme ba mo ikanya. 27Ba tswela mo nageng, ba fula mafine a bone, ba gata loungo lwa mafine, ba ja modiro, ba tsena mo ntlong ya modimo wa bone ba ja, ba nwa, ba hutsa Abimeleke. 28Gaale morwa Ebete a re: “Abimeleke e bo e le mang, le Shekeme e mang, fa e bo ne ne go twe re mo direle? A ga se ene morwa Jerubaale? Sebule ke kgosana ya gagwe? Lona lo direle banna ba ga Hamore rraagwe Shekeme, mme rona re tlaa bo re mo direla ka ntlha yang? 29A bo batho ba, Modimo o ka ka wa mma ba nne mo taolong ya me, foo ke ne ke tlaa tlosa Abimeleke.” A raya Abimeleke a re: “Totisa ntwa ya gago, o tswe.”
30E rile Sebule molaodi wa motse a utlwa mafoko a ga Gaale morwa Ebete, bogale jwa gagwe jwa tuka. 31A roma batho kwa go Abimeleke ka togamaano, a re: “Bona, Gaale morwa Ebete le bomonnawe ba tsile mo Shekeme; bona ba patelela motse gore o tlhabane nao. 32Ke gone nanoga bosigo, wena le batho ba o nang nabo, o lalele mo nageng. 33Go tlaa dirala go re, ka moso letsatsi le sena go tlhaba, o phakele o phagelele motse, mme e tlaa re ene le batho ba ba nang nae ba go thologela, foo o ka ba direla ka fa o bonang ka gone.”
34Mme Abimeleke le batho botlhe ba o nang nabo ba nanoga bosigo, ba lalela Shekeme ba le 40. 35Gaale morwa Ebete a tswa, a ema mo botsenong jwa kgoro ya motse; Abimeleke le batho ba o ne a na nabo ba nanoga mo talelong, 36e rile Gaale a bona batho bao, a raya Sebule a re: “Bona, go fologa batho kwa godimo ga thaba.” Sebule a mo raya a re: “O bona meriti ya dithaba jaaka e kete ke batho.”
37Gaale a bua gape a re: “Bona, go fologa batho ka bogare jwa lefatshe, lesomo le lengwe le tla ka tsela ya mooka wa Meonenime.”
38Foo Sebule a mo raya a re: “Ana molomo wa gago o kae jaanong, ka o rile, Abimeleke e bo e le mang fa e bo ne ne re ka mo direla? A ga se bone batho ba o ba nyaditseng? A ko o tswe jaana o ye go tlhabana nabo.” 39Gaale a tswa a eteletse banna ba Shekeme pele, a tlhabana le Abimeleke. 40Abimeleke a mo alola, a tshaba fa pele ga gagwe; ga wa ba le bantsi ba ba tlhabilweng, go ya go fitlha kwa botsenong jwa kgoro. 41Abimeleke a aga kwa Aruma; Sebule a leleka Gaale le ba ga gabo gore ba se ka ba aga mo Shekeme.
42Ga dirala ya re ka moso batho ba tswela kwa nageng; ba bolelela Abimeleke. 43Mme a tsaya batho a ba aba masomo a le mararo, a lalela mo nageng; a leba, mme a bona batho ba tswa mo motseng; a nanoga a ya go tlhabana nabo, a ba kgemetha. 44Abimeleke le masomo a o nang nao a phagelela pele, ba ya ba ema mo botsenong jwa kgoro ya motse; masomo a mabedi a phagelela botlhe ba ba mo nageng, a ba kgemetha. 45Abimeleke a tlhasela motse ka tsatsi leo lotlhe; a thopa motse, a bolaya batho ba ba mo go one; a rutla motse, a o gasa ka letswai.
46E rile batho botlhe ba kago e e godileng ya phemelo ya Shekeme ba go utlwela, ba tsena mo kagong ya phemelo ya ntlo ya Ele-berithe. 47Ga bolelelwa Abimeleke fa batho botlhe ba kago e e godileng ya phemelo ya Shekeme ba phuthegile. 48Abimeleke a tlhatlogela kwa thabeng ya Salemone, ene le batho botlhe ba o nang nabo; Abimeleke a tsaya selepe, a rema kala mo setlhareng, a e tsaya, a e sikara; a raya batho ba o nang nabo, a re: “Se lo mponyeng ke se dira, lo akofe lo dire jaaka ke dirile.” 49Batho botlhe le bone mongwe le mongwe a ithemela kala, mme ba sala Abimeleke morago, ba di baya fa kagong ya phemelo, ba tshubela kago ya phemelo mo godimo ga batho; batho botlhe ba swa, banna le basadi, e ka ne e le sekete.
50Foo Abimeleke a ya kwa Thebese, a thibelela fa pele ga Thebese, a o thopa. 51Ga bo go le kago ya phemelo e e godileng e e thata mo teng ga motse, mme banna le basadi botlhe ba tshabela gone, le bone botlhe ba motse, ba itswalela mo teng, ba tlhatlogela kwa godimo ga kago e e godileng ya phemelo. 52Abimeleke a ya kwa kagong eo e e godileng a e tlhasela, a atamela thata kwa mojakong wa kago e e godileng ya phemelo, a ya go e fisa ka molelo. 53Mosadi mongwe a latlhela lophatlo lwa lolwala mo tlhogong ya ga Abimeleke, a mo thubaganya logata. 54Foo a bitsa ka potlako lekau le le mo tsholetseng dibolao, a mo raya a re: “Somola tšhaka ya gago o mphofotse, gore batho ba se ka ba bua ka ga me, ba re: ‘O bolailwe ke mosadi.’ ” Lekau la gagwe la mo phololetsa, a swa. 55E rile banna ba Iseraele ba bona fa Abimeleke a sule, ba bothologa, mongwe le mongwe a ya ga gagwe.
56Jalo Modimo wa lefetsa boikepo jwa ga Abimeleke jo o kileng a bo direla rraagwe, ka a bolaya bomorwa rraagwe ba ba 70; 57le boikepo jotlhe jwa batho ba Shekeme, Modimo wa bo lefetsa mo ditlhogong tsa bone; phutso ya ga Jothame morwa Jerubaale ya tla mo go bone.
