Kwatlhao ya boleo jwa ga Juta
1“Boleo jwa Juta bo kwadilwe ka sekwalo sa tshipi le ka ntlha ya teemane; bo kwadilwe mo letlapeng la pelo ya bone, le mo dinakeng tsa dibeso tsa bone; 2ka bana ba bone ba gakologelwa dibeso tsa bone, le Medimako ya bone fa ditlhareng tse ditala, mo godimo ga dithota tse di godileng. 3Ao! thaba ya me e e mo nageng, ke tlaa ntsha thoto yotlhe ya gago le dikhumo tsotlhe tsa gago thopo, le mafelo a gago a a tlotlometseng, ka ntlha ya boleo, go ya le melelwane ya gago yotlhe fela. 4Le wena, ka wesi fela, o tlaa itesisa mo bosweng jo ke bo go neileng; mme ke tlaa go dirisetsa baba ba gago mo lefatsheng le o sa le itseng, gonne lo gotsitse molelo mo bogaleng jwa me, o o tlaa tukang ka bosakhutleng.”
Dipolelo tsa Morena tse dintsi
5Jehofa o bua jaana, a re:
“Go hutsegile monna
yo o ikanyang motho,
a ba a dira nama letsogo la gagwe,
le yo pelo ya gagwe
e tlogelang Jehofa.
6Gonne o tlaa nna jaaka logolo
mo sekakeng,
mme ga a ketla a itse
mogang molemo o tlang;
mme o tlaa nna mo mafelong
a a lokgere mo nageng,
lefatshe le le letswai,
le le sa nnweng.
7“Go sego monna yo o ikanyang
Jehofa, le yo Jehofa
e leng tsholofelo ya gagwe.
8Gonne o tlaa nna jaaka setlhare
se se tlhomilweng fa metsing,
se se namang metswe fa nokeng,
se se se ketlang se boifa
mogang mogote o tlang,
mme lekakaba la sone
le tlaa nna letalana fela;
mme ga se ketla se re ngwaga
wa leuba sepe,
le fa e le go khutla mo go
ungweng.”
9Pelo e boferefere
bogolo go dilo tsotlhe,
e botlhoko thata;
e mang yo o ka e itseng?
10“Nna Jehofa ke fukutsa pelo,
ke leka diphilo,
e le go naya motho mongwe
le mongwe
ka fa mekgweng ya gagwe,
le ka fa loungong lwa ditiro
tsa gagwe.”
11Jaaka lesogo
le le elamang mae a le sa a tsalang,
ene yo o bapalang dikhumo,
mme e seng ka tshiamo,
o ntse fela jalo;
di tlaa mo tlogela
mo gare ga metlha ya gagwe,
kwa bokhutlong jwa gagwe
o tlaa nna seeleele fela.
12Felo ga rona ga boitshepo
ke senno sa bogosi se se galalelang,
se se sa leng se bewa
kwa godimo mo tshimologong.
13Jehofa, tsholofelo ya Iseraele,
botlhe ba ba go latlhang
ba tlaa tlhajwa ke ditlhong;
ba ba ntlogelang ba tlaa kwalwa
mo mmung,
gonne ba latlhile Jehofa,
motswedi wa metsi a a tshedileng.
Jeremia o kopa thuso mo Moreneng
14Mphodisa Jehofa, mme ke tlaa fola; mpoloka, mme ke tlaa bolokega; gonne ke wena pako ya me.
15Ba nthaya ba re: “Bona lefoko la ga Jehofa le kae? A le tle jaana.”
16Ka ga me, ga ke a ka ka khutla ka bonako go nna modisa morago ga gago, le gone ga ke a eletsa letsatsi la poitshego; o a itse; se se duleng mo molomong wa me se ne se le fa pele ga matlho a gago. 17O se ka wa nna theregiso mo go nna; ke wena botshabelo jwa me mo motlheng wa bosula. 18A go tlhajwe ke ditlhong bone ba ba mpogisang, mme nna ke se tlhajwe ke ditlhong; a ba tseanngwe, mme nna ke se tseanngwe; lere motlha wa bosula mo go bone; o ba senye ka tshenyo e e tlhatlaganyeng sebedi.
Go itshepisa letsatsi la Sabata
19Jehofa o ne a nthaya jaana, a re: “Ya o eme mo kgorong ya bana ba batho, e dikgosi tsa Juta di tsenang ka yone, le e di tswang ka yone, le mo dikgorong tsotlhe tsa Jerusalema; 20o ba reye o re: ‘Utlwang lefoko la ga Jehofa, lona dikgosi tsa Juta, le lona lotlhe ba Juta, le banni botlhe ba Jerusalema, ba lo tsenang ka dikgoro tse; 21Jehofa o bua jaana, a re: Lo itise, lo se ka lwa rwala morwalo ope ka letsatsi la sabata, le fa e le go tsena ka one ka dikgoro tsa Jerusalema; 22le gone lo se ka lwa tswa ka morwalo ope mo matlong a lona ka letsatsi la sabata, le gone lo se ka lwa dira tiro epe; mme lo itshepise letsatsi la sabata, jaaka ke laotse borraeno. 23Mme ga ba a ka ba reetsa, le fa e le go sekega tsebe, mme ba ithatafatsa thamo, gore ba se utlwe, le gone ba se amogele thuto.
24“ ‘Go tlaa dirala, go re, fa lo ntheetsa ka tlhoafalo, go bua Jehofa, fa lo sa tsene ka morwalo ope ka dikgoro tsa motse o ka letsatsi la sabata, mme fa lo itshepisa letsatsi la sabata, lo sa dire tiro epe ka lone; 25foo go tlaa tsena ka dikgoro tsa motse o dikgosi le dikgosana tse di dutseng mo setulong sa bogosi sa ga Dafite, di palame dikara le dipitse, tsone le dikgosana tsa tsone, batho ba Juta le banni ba Jerusalema; mme motse o, o tlaa nnela ruri ka bosakhutleng. 26Ba tlaa tswa mo metseng ya Juta, le mo mafelong a a mo tikologong ya Jerusalema, le mo lefatsheng la Benjamine, le mo lefatsheng la sekhuti, le mo dithabeng, le kwa ntlheng ya Borwa, ba tlaa lere ditshupelo tse di fisiwang le ditlhabelo, diromololo le maswalo a lebano, ba ba ba tlisa ditlhabelo tsa tebogo mo ntlong ya ga Jehofa. 27E tlaa re fa lo gana go ntheetsa ka go itshepisa letsatsi la sabata, lo sa bakele go rwala morwalo lo tsena ka one ka dikgoro tsa Jerusalema ka letsatsi la sabata; foo ke tlaa tshuba dikgoro tsa teng ka molelo, mme o tlaa laila matlo a dikgosi a Jerusalema, mme ga o ketla o tingwa.’ ”
