JEREMIA 25

₁Lefoko le le tsileng mo go Jeremia ka ga batho botlhe ba Juta ka ngwaga wa bone wa ga Jehoiakime morwa Josia, kgosi ya Juta; e ne e le ngwaga wa ntlha wa ga Nebukateresare kgosi ya Babilone. ₂Ke lone le Jeremia moperofeti o le buileng le batho botlhe ba Juta, le banni botlhe ba Jerusalema, a re: ₃“Go tswa ngwageng wa lesome le boraro wa ga Josia morwa Amone, go tla mo motlheng wa gompieno, dinyaga tse di 23 tse, lefoko la ga Jehofa le tsile mo go nna, mme ke ntse ke bua le lona, ke phakela ke le bua; mme ga lo a ka lwa reetsa. ₄Jehofa o romile batlhanka botlhe ba gagwe kwa go lona, e bong baperofeti, a phakele a ba rome; mme ga lo a ka lwa reetsa, le fa e le go sekega tsebe go utlwa. ₅Ba re: ‘A mongwe le mongwe a boe mo tseleng ya gagwe e e bosula, le mo bosuleng jwa ditiro tsa lona, mme lo age mo lefatsheng le Jehofa o le neileng lona le borraeno, go tswa bogologolong go ya bosakhutleng.’ ₆Le gone, ba re: ‘Lo se ka lwa latela medimo e sele go e direla, le go e obamela, lwa ntlhotlheleletsa bogaleng ka tiro ya diatla tsa lona; mme ga nketla ke lo utlwisa botlhoko.’

₇“Le fa go ntse jalo ga lo a ka lwa ntheetsa,” go bua Jehofa; “e le gore lo ntlhotlheleletse bogaleng ka tiro ya diatla tsa lona, go tla lo ikutlwisa botlhoko ka gone.”

₈Ke gone Jehofa wa masomosomo o buang jaana, a re: “Ereka lo se ka lwa utlwa mafoko a me, ₉bonang, ke tlaa roma ke ya go tsaya ba makgotla otlhe a kwa ntlheng ya botsheka,” go bua Jehofa, “ke tlaa roma kwa go Nebukateresare kgosi ya Babilone, motlhanka wa me, mme ke tlaa ba lere ba tla go tlhabana le lefatshe le, le banni ba lone, le merafe yotlhe e e mo tikologong; ke tlaa ba senyetsa ruri, ke ba dira kgakgamatso le kotso, le ditshwafalo tse di sa khutleng. ₁₀Le gone ke tlaa tlosa mo go bone modumo wa mokete, le modumo wa boitumelo, lentswe la monyadi le lentswe la monyadwi, modumo wa ditshilo, le lesedi la lobone. ₁₁Mme lefatshe le lotlhe le tlaa nna tshwafalo le kgakgamatso; mme merafe e, e tlaa direla kgosi ya Babilone ka dinyaga di le 70.

₁₂“Go tlaa dirala, e tlaa re dinyaga tse di 70 di sena go feta, ke tlaa betsa kgosi ya Babilone, le morafe oo,” go bua Jehofa, “ka ntlha ya boikepo jwa bone, le lefatshe la Bakalatea; ke tlaa le dira tshwafalo ka bosakhutleng. ₁₃Ke tlaa tlisetsa lefatshe leo mafoko a otlhe a me, a ke a buileng ka ga lone, e bong gotlhe mo go kwadilweng mo lokwalong lo, mo Jeremia o go boletseng ka ga merafe yotlhe. ₁₄Gonne merafe e le mentsi le dikgosi tse dikgolo di tlaa itirela ka bone, e bong ka bone; mme ke tlaa ba duela ka fa ditirong tsa bone, le ka fa tirong ya diatla tsa bone.”

₁₅Gonne Jehofa Modimo wa Iseraele, o nthaya jaana, a re: “Tsaya senwelo sa bojalwa jwa tšararego e mo atleng sa me, o bo nose merafe yotlhe e ke go romang kwa go yone. ₁₆Mme ba tlaa nwa, ba tlaa theekela, ba tsenwa, ka ntlha ya tšhaka e ke tlaa e tsenyang mo go bone.”

₁₇Foo ka tsaya senwelo mo seatleng sa ga Jehofa, mme ka nosa merafe yotlhe e Jehofa o ne a nthomile kwa go yone; ₁₈e bong Jerusalema, le metse ya Juta, le dikgosi tsa teng, le dikgosana tsa teng; go tla ke ba dira tshwafalo, le kgakgamatso le kotso, le phutso; jaaka go ntse le gompieno; ₁₉le Faro kgosi ya Egepeto, le batlhanka ba gagwe, le dikgosana tsa gagwe, le batho botlhe ba gagwe; ₂₀le batho botlhe ba ba tlhakanyeng, le dikgosi tsotlhe tsa lefatshe la Use, le dikgosi tsotlhe tsa lefatshe la Bafilisitia, le Ašekelone, le Gasa le Ekerone, le masalela a Ašetote; ₂₁Etome le Moabe, le bana ba Amone; ₂₂le dikgosi tsotlhe tsa Ture, le dikgosi tsotlhe tsa Sitone, le dikgosi tsa mafatshe a a bapileng le lewatle, kwa moseja; ₂₃Detane, le Tema, Buse, le botlhe ba ba sekotsweng moriri ka fa diphatleng; ₂₄le dikgosi tsotlhe tsa Arabia, le dikgosi tsotlhe tsa batho ba ba tlhakanyeng ba ba agileng mo nageng; ₂₅le dikgosi tsotlhe tsa Simeri, le dikgosi tsotlhe tsa Elame, le dikgosi tsotlhe tsa Bamete; ₂₆le dikgosi tsotlhe tsa kwa ntlheng ya botsheka, kwa kgakala le fa gaufi, nngwe le nngwe; le magosi otlhe a lefatshe a a mo lefatsheng lotlhe; le kgosi ya Shešake e tlaa nwa morago ga bone.

₂₇“O di reye, o re: ‘Jehofa wa masomosomo, Modimo wa Iseraele, o bua jaana, a re: Nwang lo tagwe, lo tlhatse, lo we, mme lo se ka lwa tlhola lo tsoga, ka ntlha ya tšhaka e ke tlaa e tsenyang mo go lona.’ ₂₈Go tlaa dirala, go re fa ba gana go tshola senwelo mo seatleng sa gago go se nwa, foo o ba reye, o re: ‘Jehofa wa masomosomo o bua, jaana, a re: Ruri lo tlaa nwa. ₂₉Gonne bonang, ke simolola go dira bosula mo motseng o o bidiwang ka leina la me, mme a lona lo tshwanetse fa lo ka tlhokela ruri go bediwa? Ga lo ketla lo tlhoka go bediwa: gonne ke tlaa biletsa banni botlhe ba lefatshe tšhaka, go bua Jehofa wa masomosomo.’

₃₀“Ke gone, o ba bolelele mafoko otlhe a, o ba nyatse, o ba reye, o re:

₃₂Jehofa wa masomosomo o bua jaana, a re: “Bonang, bosula bo tlaa tsamaya bo tlhomagantse merafe, mme go tlaa tsosiwa ledimo le legolo le le tswang kwa dikhutlong tsa lefatshe.” ₃₃Babolaiwa ba ga Jehofa ba tlaa fitlhelwa mo motlheng oo, mo sekhutlong sengwe sa lefatshe, go ya sekhutlong se sengwe sa lefatshe; ga ba ketla ba lelelwa, le fa e le go phuthwa, le fa e le go fitlhwa; ba tlaa nna letshotelo felo mo godimo ga mmu.

₃₄Bokolelang lona badisa, lo goe; bidikamang mo meloreng, lona bagolwane ba letsomane; gonne metlha ya polao ya lona e fitlhile ka botlalo, mme ke tlaa lo thubaganya, lo tlaa wa jaaka sejana se se eletsegang. ₃₅Badisa ba tlaa tlhoka tsela e ba ka tshabang ka yone, le bagolwane ba letsomane tsela e ba ka falolang ka yone. ₃₆A kodu ya go goa ga badisa, le ya pokolelo ya bagolwane ba letsomane! Gonne Jehofa o kgakgabatsa bohulo jwa bone. ₃₇Meraka e agile fela e tuuladitswe ka ntlha ya bogale jo bo tukang jwa ga Jehofa. ₃₈O tlogetse setswatswa sa gagwe, jaaka tau; gonne lefatshe la bone le fetogile kgakgamatso, ka ntlha ya bogale jwa tšhaka e e pitlaganyang, le ka ntlha ya bogale jwa gagwe jo bo tukang.