Jeremia o rwesiwa jokwe ya dikgomo
1E rile mo tshimologong ya puso ya ga Jehoiakime morwa Josia, kgosi ya Juta, lefoko le, la tla mo go Jeremia, le tswa kwa go Jehofa, la re: 2Jehofa o ntheile jaana, a re: “Itirele dikgole le dijokwe, mme o di beye mo thamong ya gago; 3o di ise kwa kgosing ya Etome, le kwa kgosing ya Moabe, le kwa kgosing ya bana ba Amone, le kwa kgosing ya Ture, le kwa kgosing ya Sitone, ka diatla tsa barongwi ba ba tlang mo Jerusalema mo go Setekia kgosi ya Juta; 4o ba laetse kwa go beng ba bone, o re: Jehofa wa masomosomo, Modimo wa Iseraele o bua jaana, a re ba bue jaana le beng ba bone, ba re: 5Ke dirile lefatshe, le motho yo o mo lefatsheng, le ditshedi, ka thata ya me e kgolo, le ka letsogo la me le le otlologileng; ke di neye ba go leng tshiamo mo go nna go di ba naya. 6Mme jaana mafatshe otlhe a, ke a tsentse mo seatleng sa ga Nebukatenesare, kgosi ya Babilone, motlhanka wa me; le ditshedi tsa naga ke di mo neile gore di mo direle. 7Merafe yotlhe e tlaa mo direla, le morwawe, le morwa morwawe, go tsamaye motlha wa lefatshe la gagwe tota o tle; foo merafe e le mentsi le dikgosi tse dikgolo di tlaa itirela ka ene.
8“Go tlaa dirala go re, morafe le bogosi jo bo ganang go direla ene Nebukatenesare kgosi ya Babilone, le jo bo tlaa ganang go ipaya thamo tlase ga jokwe ya kgosi ya Babilone, ke tlaa betsa morafe oo, go bua Jehofa, ka tšhaka le ka popamo, le ka kgogodi go tsamaya ke ba nyeletsa ka seatla sa gagwe. 9Ka ga lona, lo se ka lwa reetsa baperofeti ba lona, le fa e le baitseanape ba lona, le fa e le ditoro tsa lona, le fa e le baswabedi ba lona, le fa e le dingaka tsa lona, ba ba buang le lona, ba re: ‘Lo se ka lwa direla kgosi ya Babilone;’ 10gonne ba lo perofesetsa maaka, go tla ba lo isa kgakala le lefatshe la lona; le gore ke lo leleke, mme lo swe. 11Mme morafe o o tlaa ipayang thamo tlase ga jokwe ya kgosi ya Babilone, o ba o e direla, ke tlaa lesa morafe oo o sala mo lefatsheng la ga one, go bua Jehofa; o le lema o ba o aga mo go lone.”
12Ka bua le Setekia kgosi ya Juta ka fa mafokong otlhe a, ka re: “Ipeeng dithamo tlase ga jokwe ya kgosi ya Babilone, lo e direle le batho ba yone, mme lo tshele. 13Ana lo ratelang go swa, wena le batho ba gago, ka tšhaka, le ka popamo, le ka kgogodi, jaaka Jehofa a buile ka ga morafe o o ganang go direla kgosi ya Babilone? 14Lo se ka lwa reetsa mafoko a baperofeti ba ba buang le lona, ba re: ‘Lo se ka lwa direla kgosi ya Babilone;’ gonne ba lo perofesetsa maaka. 15Gonne ga ke a ba roma, go bua Jehofa, mme ba perofesa ka tsietso mo ineng la me; gore ke lo leleke, le gore lo swe, lona le baperofeti ba ba lo perofesetsang.”
16Gape ke buile le baperesiti le batho botlhe ba, ka re: “Jehofa o bua jaana, a re: Lo se ka lwa reetsa mafoko a baperofeti ba lona, ba ba lo perofesetsang, ba re: ‘Bonang, dijana tsa ntlo ya ga Jehofa di tlaa akofa di bosiwa kwa Babilone,’ gonne ba lo perofesetsa maaka. 17Lo se ka lwa ba reetsa; direlang kgosi ya Babilone, mme lo tshele; ana motse o, o ka bo o nna tshwafalo go reng? 18Fa ba le baperofeti, mme fa lefoko la ga Jehofa le le mo go bone, a ba rapele Jehofa wa masomosomo jaana, gore dijana tse di tlogetsweng mo ntlong ya ga Jehofa, le mo ntlong ya kgosi ya Juta, le mo Jerusalema, di se ka tsa ya Babilone. 19Gonne Jehofa wa masomosomo o bua jaana ka ga maotwana, le ka ga lewatle, le ka ga ditlhomo, le ka ga mathosi a dijana tse di tlogetsweng mo motseng, 20tse Nebukatenesare kgosi ya Babilone o se kang a di tsaya, jale ka a tlosa Jekonia morwa Jehoiakime, kgosi ya Juta, kwa Jerusalema, e le setshwarwa, a mo isa Babilone, a na le bagolwane botlhe ba Juta le ba Jerusalema. 21Ee, Jehofa wa masomosomo, Modimo wa Iseraele o bua jaana, a re:
“Ka ga dijana tse di tlogetsweng mo ntlong ya ga Jehofa, le mo ntlong ya kgosi ya Juta, le mo Jerusalema, 22di tlaa isiwa kwa Babilone, mme di tlaa nna gone go ya go fitlha mo motlheng o ke tlaa ba lekolang ka one, go bua Jehofa; foo ke tlaa di tlhatlosa, ke di busetsa mo felong fa.”
