Lokwalo lo Jeremia o lo kwaletseng Bajuta kwa Babilone
1Jaana, a ke mafoko a lokwalo lo moperofeti Jeremia, a le mo Jerusalema, a lo kwalela masalela a bagolwane ba botshwaro le baperesiti, le baperofeti, le batho botlhe ba Nebukatenesare o ne a ba tlositse mo Jerusalema, a ba isitse kwa Babilone ba le ditshwarwa. 2(Morago ga kgosi Jekonia, le mma kgosi, le baopafadiwi, le, dikgosana tsa Juta le Jerusalema, le badiri ba ba maatlametlo, le bathudi, ba sena go tsamaya ba tswa mo Jerusalema.) 3Lwa isiwa ke Elasa morwa Shafane, le Gemaria, morwa Hilekia, (yo Setekia kgosi ya Juta o ne a mo romile kwa Babilone, kwa go Nebukatenesare kgosi ya Babilone), a re:
4Jehofa wa masomosomo, Modimo wa Iseraele o bua jaana, a re: Ke raya batshwarwa botlhe ba ke laotseng gore ba tsewe mo Jerusalema ba isiwe e le ditshwarwa kwa Babilone: 5Ka re: “Agang matlo, lo nne mo go one; tlhomang masimo, lo je loungo lwa one; 6tsayang basadi, lo bone bana ba basimane le ba basetsana; lo bo lo tseise bomorwaa lona basadi, le bomorwadia lona lo ba tseise banna, gore ba tle ba bone bana ba basimane le ba basetsana; lo ate teng lo se ka lwa ngotlega. 7Lo batlele motse o ke laotseng gore lo isiwe botshwarong kwa go one kagiso, lo o rapelele mo go Jehofa; gonne mo kagisong ya one le lona lo tlaa bona kagiso.” 8Gonne Jehofa wa masomosomo, Modimo wa Iseraele o bua jaana, a re: “A baperofeti ba lona ba ba mo gare ga lona, le baitseanape ba lona ba se lo tsietse, gape lo se ka lwa reetsa ditoro tsa lona tse lo di lorang. 9Gonne ba perofesa ka tsietso mo ineng la me; ga ke a ba roma;” go bua Jehofa.
10Gonne Jehofa o bua jaana, a re: “E tlaa re dinyaga di le 70 di sena go diralela Babilone, ke tlaa lo lekola, ke tlaa dirafatsa lefoko la me le le molemo ka ga lona, ke lo busetsa felong fano, 11gonne ke a e itse megopolo e ke e gopolang ka ga lona,” go bua Jehofa, “megopolo ya kagiso, e seng ya bosula, go lo naya tsholofelo mo motlheng wa lona wa bofelo. 12Lo tlaa mpitsa, lo tlaa ya lo nthapela, mme ke tlaa lo reetsa. 13Lo tlaa mpatla, mme lo tlaa mpona, mogang lo mpatlang ka pelo yotlhe ya lona. 14Ke tlaa bonwa ke lona, go bua Jehofa, botshwaro jwa lona ke tlaa bo sokolola; ke tlaa lo phutha kwa merafeng yotlhe, le kwa mafelong otlhe kwa ke lo leleketseng teng, go bua Jehofa; ke tlaa ba ke lo lere felong fa ke laoletseng gore lo tsewe teng lo isiwe botshwarong.”
15“Gonne lo rile: ‘Jehofa o re tsoseditse baperofeti mo Babilone.’ 16Gonne Jehofa o bua jaana ka ga kgosi e e dutseng mo setulong sa ga Dafite sa bogosi, le ka ga batho botlhe ba ba agileng mo motseng o, bana ba rraeno ba ba se kang ba ya le lona botshwarong; go bua jaana Jehofa wa masomosomo, a re: 17‘Bonang, ke tlaa ba tsosetsa tšhaka, le popamo, le kgogodi, ke tlaa ba dira jaaka difeige tse di bosula, tse di sa kakeng tsa jewa, ka di le bosula thata. 18Ke tlaa ba konatelela ka tšhaka, le ka popamo, le ka kgogodi, ke tlaa ba neela go akgaakgelwa mo magosing otlhe a lefatshe, gore ba nne thogako, le kgakgamatso, le kotso, le kgobo mo merafeng yotlhe kwa ke ba leleketseng teng. 19Ka go bo ba se ka ba reetsa mafoko a me,’ go bua Jehofa, ‘a ke romileng batlhanka ba me, e bong baperofeti, kwa go bone ka one, ke phakela ke ba roma; mme lwa gana go utlwa,’ go bua Jehofa. 20Ke gone utlwang lefoko la ga Jehofa, lona lotlhe ba botshwaro, ba ke lo tlositseng mo Jerusalema ka lo isa kwa Babilone. 21Jehofa wa masomosomo, Modimo wa Iseraele, o bua jaana ka ga Ahabe morwa Kolaia, le ka ga Setekia morwa Maaseia, ba ba lo perofesetsang maaka ka leina la me, a re: ‘Bonang, ke tlaa ba tsenya mo seatleng sa ga Nebukateresare kgosi ya Babilone; mme o tlaa ba bolaela fa pele ga matlho a lona; 22mme go tlaa tsewa phutso ka bone ke batshwarwa botlhe ba Juta ba ba mo Babilone, ba re: “A Jehofa a go dire jaaka Setekia, le jaaka Ahabe, ba kgosi ya Babilone e ba besitseng mo molelong.” 23Gonne ba dirile bosilo mo Iseraele, ba dirile boaka le basadi ba bangwe ka bone, ba buile ka leina la me ka tsietso, ba bua mafoko a ke se kang ka a ba laolela; e bile ke nna ke itseng, ke bile ke mosupi,’ ” go bua Jehofa.
Lokwalo lwa ga Shemaia a kwalela Sefania
24Ka ga Shemaia wa Monehelame bua o re: 25“Jehofa wa masomosomo, Modimo wa Iseraele, o bua jaana, a re: Ereka o isitse dikwalo ka leina la gago kwa bathong botlhe ba ba mo Jerusalema, le kwa go Sefania morwa Maaseia moperesiti, le kwa baperesiting botlhe, wa re: 26‘Jehofa o go dirile moperesiti mo boemong jwa ga Joiata moperesiti, gore lo nne balaodi mo ntlong ya ga Jehofa, go tshwara mongwe le mongwe yo o tsenwang, le yo o itirang moperofeti, gore o mo golegele mo disaneng le mo dikgolegong tsa thamo. 27Jaana ka re, go ntse jang ka o se ka wa kgalemela Jeremia wa Anathothe, yo o lo itirelang moperofeti, 28ka a romile kwano go rona mo Babilone, a re: Botshwaro bo bolele; agang matlo lo nne mo go one; tlhomang masimo lo je loungo lwa one’ ”?
29Sefania moperesiti a bala lokwalo lo, mo tsebeng tsa ga Jeremia moperofeti. 30Foo ga tla lefoko la ga Jehofa mo go Jeremia la re: 31“Roma kwa go botlhe ba botshwaro o re: ‘Jehofa o bua jaana kaga Shemaia wa Monehelame, a re: E re ka Shemaia a lo porefeseditse mme ke se ka ka mo roma, mme o lo ikantshitse maaka; 32ke gone ka moo, go buang Jehofa, a re: Bonang, ke tlaa betsa Shemaia wa Monehelame, le losika lwa gagwe; ga a ketla a dira le monna yo o tlaa agang mo bathong ba ga gabo, le gone ga a ketla a bona molemo o ke tlaa o direlang batho ba me, go bua Jehofa; ka a buile go tsuololela Jehofa.’ ”
