Jeremia o reka tshimo
1Lefoko le le tsileng mo go Jeremia le tswa kwa go Jehofa, ka ngwaga wa letsome wa ga Setekia kgosi ya Juta, o e neng e le ngwaga wa 18 wa ga Nebukatenesare. 2Jaana e rile ka motlha oo, ntwa ya kgosi ya Babilone ya tlhasela Jerusalema; mme moperofeti Jeremia a bo a tswaletswe mo lwapeng lwa tebelo, lo lo mo ntlong ya kgosi ya Juta. 3Gonne Setekia kgosi ya Juta o ne a mo tswaletse a re: “Ana o perofesetsang o re: ‘Jehofa o bua jaana, a re: Bonang, motse o ke tlaa o tsenya mo seatleng sa kgosi ya Babilone, mme e tlaa o gapa. 4Setekia kgosi ya Juta ga a ketla a falola mo seatleng sa Bakalatea, ruri o tlaa tsenngwa mo seatleng sa kgosi ya Babilone, mme o tlaa buisanya nae ka molomo, le matlho a gagwe a tlaa lebana le matlho a yone, 5e tlaa gogela Setekia kwa Babilone, mme o tlaa nna teng go tsamaya ke mo lekola, go bua Jehofa, le fa lo tlhabana le Bakalatea, ga lo ketla lo segofala?’ ”
6Jeremia a re: “Lefoko la ga Jehofa la tla mo go nna, la re: 7Bona, Hanamele morwa Shalume malomaago o tlaa tla kwa go wena, a re: ‘O ithekele lotlhagare lwa me lo lo mo Anathothe, gonne tshiamelo ya thekololo ke ya gago go lo reka.’
8“Jalo Hanamele morwa malome a tla kwa go nna mo lwapeng lwa balebedi, ka fa lefokong la ga Jehofa, mme a nthaya a re: ‘Ke a go rapela reka lotlhagare lwa me, lo lo mo Anathothe mo lefatsheng la Benjamine, gonne tshiamelo ya boswa ke ya gago, le thekololo ke ya gago; o lo ithekele.’ Foo ka itse fa leo e le lefoko la ga Jehofa.
9“Mme ka reka lotlhagare lo lo mo Anathothe mo go Hanamele morwa malome, mme ka mo lekanyetsa madi, e bong dišekela di le 17 tsa selefera. 10Ka kwala dikwalo tsa tlhomamiso, ka kana longwe, mme ka bitsa basupi, ka mo lekanyetsa madi ka selekanyo sa pego. 11Jalo ka tsaya dikwalo tsa theko, lone lo lo kannweng, ka fa molaong le ka fa temalong, le lone lo lo sa kanwang. 12Lokwalo lwa theko ka lo neela Baruke morwa Neria, morwa Maseia, mo ponong ya ga Hanamele morwa malome, le mo ponong ya basupi ba ba ikwadileng mo lokwalong lwa theko, fa pele ga Bajuta botlhe ba ba dutseng mo lwapeng lwa balebedi. 13Ka laya Baruke fa pele ga bone, ka re: 14‘Jehofa wa masomosomo, Modimo wa Iseraele o bua jaana, a re: Tsaya dikwalo tse, e bong lokwalo lo lwa theko, lone lo lo kannweng, le lo lo sa kanwang, o di tsenye mo sejaneng sa letsopa; gore di tle di bolokege ka lobaka lo loleele. 15Gonne Jehofa wa masomosomo, Modimo wa Iseraele, o bua jaana, a re: Mantlo le matlhagare le masimo a mafine a tlaa ba a rekwa gape mo lefatsheng le.’ ”
Thapelo ya ga Jeremia
16Jaana e rile ke sena go neela Baruke morwa Neria lokwalo lwa theko, ka rapela Jehofa, ka re: 17“Ao Jehofa Modimo! bona, o dirile legodimo le lefatshe ka thata e kgolo ya gago, le ka letsogo la gago le le otlologileng; ga go na sepe se se ka go retelelang. 18Yo o supetsang ba ba makgolokgolo kutlwelobotlhoko, mme boikepo jwa borrabana a bo lefetse mo sehubeng sa bana ba bone morago ga bone. Modimo o mogolo, o o thata, Jehofa wa masomosomo ke leina la gagwe; 19o mogolo mo kgakololong, o nonofile mo tirong; yo matlho a gago a budulogetseng ditsela tsotlhe tsa bana ba batho; go naya mongwe le mongwe ka fa ditseleng tsa gagwe, le ka fa loungong lwa ditiro tsa gagwe. 20Yo o kileng wa baya ditshupo le dikgakgamatso mo lefatsheng la Egepeto, le gompieno mo go Baiseraele, le mo gare ga batho ba bangwe; mme wa itirela leina jaaka go ntse gompieno; 21wa ntsha batho ba gago Baiseraele mo lefatsheng la Egepeto ka ditshupo, le ka dikgakgamatso, ka letsogo le le otlologileng, le ka theregiso e kgolo; 22wa ba naya lefatshe le o le ikanetseng borraabo wa re, o tlaa le ba naya, e le lefatshe le le elang maši le dinotshe. 23Ba tsena ba le rua; mme ga ba a ka ba utlwa lentswe la gago le fa e le go sepela mo molaong wa gago; ga ba ise ba dire sepe sa dilo tsotlhe tse o di ba laoletseng go di dira; ke gone ka moo o lerileng bosula jotlhe jo mo go bone.
24“Le ba dimota tsa ntwa, ba tsile motseng go o gapa; motse o tsentswe mo seatleng sa Bakalatea ba ba tlhabanang nao ka ntlha ya tšhaka, le popamo, le ka kgogodi; se o se buileng se diretse; mme bona, o se lebile. 25O ntheile Jehofa Modimo wa me, wa re, ke ithekele lotlhagare ka madi, mme ke bitse basupi, le mororo motse o tsentswe mo seatleng sa Bakalatea.”
26Foo ga tla lefoko la ga Jehofa mo go Jeremia, la re: 27“Bona, ke nna Jehofa Modimo wa batho botlhe; a go na le sengwe se se ka nthetelelang? 28Ke gone ka moo Jehofa o bua jaana, a re: Bona, ke tlaa tsenya motse o mo seatleng sa Bakalatea, le mo seatleng sa ga Nebukatenesare kgosi ya Babilone, mme o tlaa o gapa. 29Bakalatea, ba ba tlhabanang le motse o, ba tlaa tla ba tshuba motse o, ba o fisa, le matlo a ba iseditseng Baale maswalo mo godimo ga ditlhomeso tsa one, ba thelela medimo e sele ditshupelo tse di nowang, go tla ba ntlhotlheleletsa bogaleng. 30Gonne bana ba Iseraele, le bana ba Juta, ba sa le ba dira fela se se bosula mo matlhong a me, le mo bokaung jwa bone; gonne bana ba Iseraele ba sa le ba ntlhotlheleletsa bogaleng fela ka tiro ya diatla tsa bone, go bua Jehofa. 31Gonne motse o e ne e ntse e le tlhotlheletso ya bogale jwa me, le ya tšararego ya me, go simolola ka motlha o ba o agileng ka one go tla mo lobakeng lwa gompieno; go ba ke tla ke o tlosa fa pele ga me; 32ka ntlha ya bosula jotlhe jwa bana ba Iseraele le jwa bana ba Juta, jo ba bo dirileng go tla ba ntlhotlheleletsa bogaleng, bone, le dikgosi tsa bone, le dikgosana tsa bone, le baperesiti ba bone, le baperofeti ba bone, le banna ba Juta, le banni ba Jerusalema. 33Ba nneile dikotla, e seng difatlhogo; mme le fa ke ba rutile, ke phakela ke ba ruta, le fa go ntse jalo ga ba a ka ba reetsa go tla ba amogela thuto. 34Ba baya tse di makgapha tsa bone mo ntlong e e bidiwang ka leina la me, go tla ba e itshekolola. 35Ba agile mafelo a a tlotlometseng a ga Baale, a a mo mogogorong wa morwa Hinome, go tla ba ralaletsa Moleke bana ba bone mo molelong, ba basimane le ba basetsana; e le mo ke sa go ba laolelang, le gone go se ka ga tsena mo mogopolong wa me, go re ba ka dira se se makgapha se; go tla ba leofisa Bajuta.”
Morena o solofetsa Iseraele poloko
36Jaana ka ntlha ya gone moo, Jehofa, Modimo wa Iseraele, o bua jaana ka ga motse o, o lo buang ka ga one lo re: “O tsentswe mo seatleng sa kgosi ya Babilone ka tshaka, le ka popamo le ka kgogodi.” 37“Bona, ke tlaa ba phutha kwa mafatsheng a otlhe kwa ke ba leleketseng teng mo bogaleng jwa me, le mo tšararegong ya me, le mo kgakalong e kgolo ya me; ke tlaa ba ke ba lere felong fa; ke ba agisa mo polokegong; 38ba tlaa nna batho ba me, le nna ke tlaa nna Modimo wa bone. 39Ke tlaa ba naya pelo e le nngwe fela, le tsela e le nngwe fela, gore ba mpoife ka bosakhutleng; e le gore go nne molemo mo go bone, le mo baneng ba bone morago ga bone. 40Ke tlaa dira kgolagano e e sa khutleng nabo, ya go re, ga nketla ke ba hularela, go tla ke ba direla molemo; ke tlaa tsenya go mpoifa mo pelong tsa bone, gore ba se ka ba tloga mo go nna. 41Ee, ke tlaa ba itumelela go tla ke ba direla molemo, ke tlaa ba tlhoma mo lefatsheng le ruri ka pelo yotlhe ya me, le ka mowa otlhe wa me.”
42Gonne Jehofa o bua jaana, a re: “Fela jaaka ke lerile bosula jotlhe jo mo bathong ba, fela jalo ke tlaa lere mo go bone molemo otlhe o ke o ba solofeditseng. 43Matlhagare a tlaa rekwa mo lefatsheng, le, le lo buang ka ga lone, lo re: Le swafetse, ga le na motho le fa e le kgomo; le tsentswe mo seatleng sa Bakalatea. 44Batho ba tlaa reka matlhagare ka madi, ba tlaa kwala dikwalo tsa tlhomamiso, ba di baya sekano, ba bitsa basupi, mo lefatsheng la Benjamine, le mo mafelong a a mo tikologong ya Jerusalema, le mo metseng ya Juta, le mo metseng ya lefatshe la makgabana, le mo metseng ya kwa sekhuting, le mo metseng ya Borwa; gonne ke tlaa dira gore botshwaro jwa bone bo bowe,” go bua Jehofa.
