Molaetsa wa Morena ka ga Bafilisitia
1Lefoko la ga Jehofa le le tsileng mo go Jeremia moperofeti ka ga Bafilisitia, Faro a ise a kgemethe Gasa. 2Jehofa o bua jaana, a re:
“Bonang, metsi a hohomoga kwa
botsheka, mme a tlaa nna
noka e e penologang,
e tlaa penologela lefatshe
le tsotlhe tse di mo go lone,
motse le ba ba agileng mo go one;
mme batho ba tlaa goa,
le banni botlhe ba lefatshe
ba tlaa bokolela.
3Ka ntlha ya modumo
wa mesito ya ditlhako
tsa dinatla tsa gagwe,
le ka ntlha ya mokgwaso
wa go taboga ga dikara tsa gagwe,
le ka ntlha ya modumo
wa maoto a gagwe a dikologa,
borra bana ga ba šebele
kwa baneng ba bone
ka ntlha ya go repa ga mabogo;
4le ka ntlha ya letsatsi le le tlang,
la go thopa Bafilisitia botlhe,
le go kgaola mo Ture le Sitone
mothusi mongwe le mongwe
yo o setseng,
gonne Jehofa o tlaa
thopa Bafilisitia,
masalela a setlhake sa Kafetore.
5Logatadima lo wetse ba Gasa;
Ašekelone o dirilwe bosengsepe,
makhunantshana a molapo wa bone;
o tlaa nna o itshegaka
ka lobaka lo lo kaye?
6Tshaka ya ga Jehofa we,
o tlaa nna lobaka lo lo kaye
o ise o tuulale?
Itsenye mo kgatleng ya gago;
ikhutse, mme o tuulale fela.
7Ana o ka tuulala jang?
ka e le fa Jehofa a go neile tiro;
ka fa Ašekelone,
le ka fa losing lwa lewatle,
o e laoletse gone.”
