JEREMIA 49

₁Ka ga bana ba Amone. Jehofa o bua jaana, a re: “A Iseraele ga a na bana ba basimane? A ga a na moja boswa? Ke ka ntlha yang Milekome a ruile Gate, le batho ba gagwe ba agile mo metseng ya teng? ₂Ke gone bona, metlha e etla,” go bua Jehofa, “e ke tlaa utlwatsang mokgosi wa ntwa e e tlhaselang Raba wa bana ba Amone ka yone; mme o tlaa tswa mokoa o o swafetseng, le bana ba gagwe ba basetsana ba tlaa fisiwa ka molelo; foo Iseraele o tlaa rua bone ba ba kileng ba mo rua,” go bua Jehofa. ₃“Bokolela, wena Hešebone, gonne Ai o thopilwe; galang, lona bomorwadia Raba, lo ikokwaele ka letsela la kgetse; lo hutsafale, mme lo sianesiane mo gare ga dikgora; gonne Milekome o tlaa ya botshwarong, baperesiti ba gagwe le dikgosana tsa gagwe mmogo. ₄Ana o ipelafaletseng melapo, molapo wa gago o o elelang, wena, mosetsana wa motenegi? Yo o ne a ikanya mahumo a gagwe, a re: ‘E mang yo o tlaa tlang mo go nna?’ ₅Bona, ke tlaa lere poifo mo go wena,” go bua Jehofa, Jehofa wa masomosomo, “ya go tshaba botlhe ba ba mo tikologong ya gago; mme lo tlaa lelekwa mongwe le mongwe a tlhamalaletse ruri, mme ga go ketla go dira le ope yo o tlaa selang yo o timelang. ₆Morago ga moo ke tlaa ba ke busa botshwaro jwa bana ba Amone,” go bua Jehofa.

₇Ka ga Etome, Jehofa wa masomosomo o bua jaana, a re: “A botlhale ga bo tlhole bo le teng mo Temane? A kgakololo e sule mo go ba ba tlhaloganyang? A botlhale jwa bone bo nyeletse? ₈Tshabang, boelang kwa morago, agang kwa teng, lona banni ba Detane; gonne ke tlaa lere mo go ene tatlhego ya ga Esau mogang ke mo sekisang. ₉Fa bahudi ba difine ba ne ba ka tla kwa go wena, a ba ne ba se ketla ba tlogela difine dingwe tse di ka ronopiwang? Fa e ka bo e le magodu a bosigo, a ga a ne a se ketla a senya go tsamaya a bona mo go lekanyeng fela? ₁₀Nna ke apotse Esau, ke bipolotse mafelo a gagwe a a sa itsegeng, mme ga a ketla a nonofa go iphitlha; losika lwa gagwe lo thopilwe, le bana ba ga rraagwe, le ba ga gabo, le ene ga a yo. ₁₁Tlogela masiela a gago, ke tlaa a tshedisa; mme a basadi ba ba batlholagadi ba gago ba ikanye mo go nna.”

₁₂Gonne Jehofa o bua jaana, a re: “Bonang, ba ba neng ba sa tshwanela go nwa senwelo, ruri ba tlaa nwa; mme a ke wena yo o tlaa falolang fela, o sa bediwe? Ga o ketla o nna fela o sa bediwa, mme ruri o tlaa nwa. ₁₃Gonne ke ikanne ka nna ka nosi,” go bua Jehofa, go re: “Bosera o tlaa nna segakgamatso, le kgobo, le kgakgabalo, le phutso; mme metse yotlhe ya teng e tlaa nna dikgakgabalo ka bosakhutleng.”

₁₄Ke utlwile mafoko mo go Jehofa, mme go romilwe morongwi mo merafeng, ga twe: “Phuthegang, lo mmololele, lo nanogele go tlhabana.” ₁₅“Gonne bona, ke go ngotlile mo merafeng, ke go dirile nyatsego mo gare ga batho. ₁₆Ka ga poitshego ya gago, boikgodiso jwa pelo ya gago bo go tsieditse, wena yo o agileng mo dipharong tsa lefika, yo o tshegeditseng tlhora ya thota; le fa o ka bo o aga setlhaga sa gago kwa godimo jaaka ntswi yo motona, ke tlaa go folosa teng,” go bua Jehofa.

₁₇“Etome o tlaa nna segakgamatso; mongwe le mongwe yo o fetang ka ene o tlaa gakgamala, mme o tlaa otsetsa dipetso tsotlhe tsa gagwe. ₁₈Jaaka mo go ribegediweng ga Sotoma le Gomora le metse e e neng e bapile nayo,” go bua Jehofa, “ga go ketla go nna motho ope teng, ga go ketla go tlhola tlhola ope morwa motho teng.

₁₉“Bonang, o tlaa tlhatloga jaaka tau e e ntshiwang ke kgogomogo ya Joretane, mme e tlaa go tlhasela mo mahulong a a tlhomameng; mme ke tlaa mo e tshabisa ka tshoganetso; mme ene yo o itshenketsweng ke tlaa mmaya molaodi wa yone; gonne e mang yo o tshwanang le nna? Mme e mang yo o tlaa ntlhomelang lobaka? Mme modisa e mang yo o tlaa emang fa pele ga me? ₂₀Ke gone utlwang kgakololo ya ga Jehofa, e o e gakologetsweng ka ga Etome; le maikaelelo a gagwe a o a ikaeletseng ka ga banni ba Temane; ruri ba tlaa ba gogela koo, e bong bana ba letsomane; ruri o tlaa swafatsa bonno jwa bone ka ntlha ya bone. ₂₁Lefatshe le a roroma ka modumo wa go wa ga bone; go na le kgoo, modumo wa yone o utlwala kwa Lewatleng le Lehibidu. ₂₂Bonang o tlaa tlhatloga, a fofa jaaka ntswi yo motona, o tlaa tsharololela Bosera diphuka tsa gagwe ka bosula; mme pelo ya diganka tsa Etome mo motlheng oo e tlaa nna jaaka pelo ya mosadi a le mo metlotseding ya gagwe.”

₂₃Ka ga Damaseko. “Hamathe o tlhabilwe ke ditlhong, le Arepate; gonne ba utlwile mafoko a a bosula, ba nyerile; go na le kotlomano mo lewatleng; le retela go sisibala. ₂₄Damaseko o koafetse, o ithetolola go tla a tshaba, mme thoromo e mo tshwere; tlalelo e e mahehe e mo tshwere, le mahutsana, jaaka mosadi yo o mo pelegong. ₂₅Ana go ntse jang motse wa pako o sa latlhwe, motse wa boitumelo jwa me? ₂₆Ke gone makau a one a tlaa wela mo mebileng ya one, le batlhabani botlhe ba tlaa tuuladiwa mo motlheng oo, go bua Jehofa wa masomosomo. ₂₇Ke tlaa tshuba molelo mo lorakong lwa Damaseko, mme o tlaa laila mantlo a bogosi a ga Benehatate.”

₂₈Ka ga Ketare, le ka ga magosi a Hasore, a Nebukatenesare kgosi ya Babilone o a kgemethileng. Jehofa o bua jaana, a re: “Nanogang, yang kwa Ketare, lo thope bana ba botlhabatsatsi. ₂₉Ba tlaa gapa megope ya bone le matsomane a bone; ba tla ikgapela dilepelelo tsa bone, le dijana tsa bone, le dikamela tsa bone; mme ba tlaa ba goelela, ba re: ‘Gaa! Ka ntlha tsotlhe.’

₃₀“Tshabang, lo timelele kwa kgakala, agang kwa teng, lona banni ba Hasore,” go bua Morena; “gonne Nebukatenesare kgosi ya Babilone o ikgakolotse ka ga lona, o bonye boikaelelo ka ga lona. ₃₁Nanogang, lo bololele morafe mongwe o o iketlileng, o o agileng fela o sa re sepe,” go bua Jehofa; “o o senang ditswalo le mephakalego, o o agileng ba le bosi fela.

₃₂“Dikamela tsa one di tlaa nna kgapo, le bontsi jwa dikgomo tsa one di tlaa nna thopo; mme ba ba itshekotseng ke tlaa ba falaletsa kwa diphefong tsotlhe; mme ke tlaa ba tlisetsa tatlhego mo ntlheng tsotlhe tsa bone,” go bua Jehofa. ₃₃“Hasore o tlaa nna bonno jwa diphokoje, le tshwafalo ka bosakhutleng, ga go ketla go aga motho ope gone, mme ga go ketla go tlhola tlhola ope morwa motho teng.”

₃₄Lefoko la ga Jehofa le le tsileng mo go Jeremia moperofeti ka ga Elame, mo tshimologong ya puso ya ga Setekia kgosi ya Juta, la re: ₃₅Jehofa wa masomosomo o bua jaana, a re: “Bonang, ke tlaa roba bora jwa ba Elame, tlhogo ya nonofo ya bone. ₃₆Ke tlaa tlisa mo go Elame diphefo tsoo nne kwa dintlheng tsoo nne tsa legodimo, mme ke tlaa ba falaletsa kwa diphefong tseo; mme ga go ketla go dira le morafe ope o balelekiwa ba Elame ba se ketlang ba wela kwa go one. ₃₇Ke tlaa tseanya ba Elame fa pele ga baba ba bone, le fa pele ga ba ba batlang botshelo jwa bone, mme ke tlaa lere bosula mo go bone, e bong bogale jwa me jo bo tukang,” go bua Jehofa; “mme ke tlaa ba lateletsa tšhaka, go tsamaya ke ba nyeletsa. ₃₈Ke tlaa tlhoma setulo sa me sa bogosi mo Elame, ke senya ke tlosa kgosi le dikgosana teng,” go bua Jehofa. ₃₉“Mme go tlaa dirala mo metlheng ya morago, go re, ke tlaa ba ke busa botshwaro jwa Elame,” go bua Jehofa.