Jeremia o rera mo tempeleng
1Lefoko le le tsileng mo go Jeremia le tswa kwa go Jehofa, la re: 2“Ema mo kgorong ya ntlo ya ga Jehofa, mme o kue teng lefoko le, o re: ‘Utlwang lefoko la ga Jehofa lona lotlhe ba Juta, ba lo tsenang ka dikgoro tse lo ya go obamela Jehofa. 3Jehofa wa masomosomo, Modimo wa Iseraele, o bua jaana, a re: Siamisang ditsela tsa lona le ditiro tsa lona, mme ke tlaa lo agisa mo felong fa. 4Lo se ka lwa ikanya mafoko a maaka, lwa re: Tempele ya ga Jehofa, tempele ya ga Jehofa, tempele ya ga Jehofa ke dikago tse.’
5“Gonne fa lo siamisetsa ruri ditsela tsa lona, le ditiro tsa lona; fa lo dirafaletsa ruri tshiamiso gare ga motho le wa ga gabo; 6fa lo sa patike moeng, le lesiela, le mosadi wa motlholagadi, fa lo sa tsholole madi a a se nang molato mo felong fa, le gone lo sa sale medimo e sele morago, go tlaa lo ikutlwisa botlhoko; 7foo ke tlaa lo agisa mo felong fa, mo lefatsheng le ke le neileng borraeno, go tswa bogologolong go ya fela kwa bosakhutleng.
8“Bonang, lo ikanya mafoko a maaka, a a sa kakeng a thusa sepe. 9A lo tlaa utswa, lo bolaya batho, lo dira boaka, lo ikana ka maaka, lo fisetsa Baale maswalo, lo sala medimo e sele morago e lo sa e itseng, 10lo ba lo ema fa pele ga me mo ntlong, e, e e bidiwang ka leina la me, mme lo re: ‘Re golotswe!’ Gore lo tle lo dire makgapha a lona otlhe fela? 11Ntlo e, e e bidiwang ka leina la me, a e ntse jaana e fetogile mongobo wa magodu mo matlhong a lona? Bonang, nna, e bong nna, ke go bonye, go bua Jehofa. 12Tlogang jaana lo ye kwa felong ga me fa go neng go le kwa Shilo, kwa ke agisitseng leina la me teng pele, mme lo bone se ke se go diretseng, ka ntlha ya boikepo jwa tšhaba ya me ya Baiseraele. 13Jaana, e re ka lo dirile ditiro tsotlhe tse, go bua Jehofa, mme ka bua le lona, ke phakela ke bua, mme lo se ka lwa utlwa; ka lo bitsa, mme lo se ka lwa araba; 14ke gone ka moo ntlo e, e e bidiwang ka leina la me, e lo e ikantseng, le felo fa ke go neileng lona le borraeno, ke tlaa e direla jaaka ke diretse Shilo. 15Ke tlaa lo latlha lo tswa mo ponong ya me, jaaka ke latlhile bana botlhe ba ga rraeno, e bong losika lotlhe lwa ga Eferaime.
Batho ba tlola ditaolo
16“Ke gone o se ka wa rapelela tšhaba e, le gone o se ka wa e tsholeletsa selelo le fa e le thapelo, o se ka wa dira thapelelo mo go nna, gonne ga nketla ke go utlwa. 17A ga o bone se ba se dirang mo metseng ya Juta, le mo mebileng ya Jerusalema? 18Bana ba tle ba rwalele, borraabo ba gotse molelo, basadi ba dube boupe go tla ba direla mohumagadi kgosi ya legodimo dinkgwenyana, le go thelela medimo e sele ditshupelo tse di nowang, gore ba tle ba ntlhotlheletsa bogaleng. 19A ba bo ba ntlhotlheleletsa bogaleng? Go bua Jehofa; a ga go itlhotlheletse bone ka bosi, ba itshosobaganya difatlhogo tsa bone? 20Ke gone ka moo Jehofa Modimo o buang jaana, a re: ‘Bonang, go tlaa goromelediwa bogale jwa me le tšarologo ya me mo felong fa, mo mothong le mo kgomong, le mo ditlhareng tsa naga, le mo loungong lwa mmu; mme go tlaa tuka molelo, ga go ketla go tingwa.’ ”
21O bua jaana Jehofa wa masomosomo, Modimo wa Iseraele, a re: “Tlhakanyang ditshupelo tsa lona tse di fisiwang le ditlhabelo tsa lona, mme lo je nama. 22Gonne ga ke a ka ka bua le borraeno, le fa e le go ba laola mo motlheng o ke ba ntshitseng mo lefatsheng la Egepeto ka one, ka ga ditshupelo tse di fisiwang, le fa e le ditlhabelo. 23Mme ka ba laolela selo se, ka re: ‘Reetsang lentswe la me, mme ke tlaa nna Modimo wa lona, lo tlaa nna batho ba me; mme lo sepele mo tseleng yotlhe e ke e lo laolelang, gore go tle go nne molemo mo go lona.’ 24Mme ga ba a ka ba reetsa, le fa e le go sekega tsebe, mme ba sepela ka fa kgakololong ya bone, le ka fa logwading lwa pelo tsa bone tse di bosula, mme ba boela kwa morago e seng kwa pele. 25E sa le ka lobaka lo borraeno ba duleng ka lone kwa Egepeto go tla mo lobakeng lwa gompieno, ke ntse ke roma batlhanka ba me, e bong baperofeti kwa go lona, ke phakela ka meso le meso ke ba roma. 26Le fa go ntse jalo ga ba a ka ba ntheetsa le fa e le go sekega tsebe, ba ikwatlalatsa thamo, ba dira bosula bogolo go borraabo.
27“O tlaa bua nabo mafoko otlhe a; mme ga ba ketla ba go reetsa; le gone o tlaa ba bitsa; mme ga ba ketla ba go araba. 28O tlaa ba raya o re: ‘O ke one morafe o o sa reetseng lentswe la ga Jehofa Modimo wa bone, le fa e le go amogela thuto; boammaaruri bo nyeletse, bo kgaotswe mo melomong ya bone. 29Ikgaole moriri wena Jerusalema, o o latlhe, mme o tlhabeletse khutsafalo mo dithoteng tse di loforotlho; gonne Jehofa o ganne, o latlhile losika lwa bogale jwa gagwe.’
30“Gonne bana ba Juta ba dirile se se bosula mo ponong ya me,” go bua Jehofa; “ba beile makgapha a bone mo ntlong e e bidiwang ka leina la me, go e itshekolola. 31Ba bile ba agile mafelo a a tlotlometseng a Tofethe, yo o mo mogogorong wa morwa Hinome, go tla ba fisa bana ba bone ba basimane le ba basetsana mo molelong; e le mo ke sa go laolang, le gone go se ka ga tla ga tsoga mo pelong ya me. 32Ke gone bonang, metlha e e tla, go bua Jehofa, ga go ketla go tlhola go bidiwa Tofethe, le fa e le mogogoro wa morwa Hinome, fa e se Mogogoro wa Polaelo; gonne ba tlaa fitlha baswi mo Tofethe, go tle go tsamaye go tlhokafale fa go ka fitlhwang teng. 33Ditoto tsa batho ba, e tlaa nna dijo tsa dinonyane tsa loapi, le tsa dibatana tsa lefatshe; ga go ketla go dirana le ope yo o di kuulolang. 34Foo ke tlaa khutlisa modumo wa go dira mokete le wa boitumelo, le lentswe la monyadi le lentswe la monyadi mo metseng ya Juta, le mo mebileng ya Jerusalema; gonne lefatshe le tlaa nna kgakgabalo fela.
