JOHANE 11

₁Jaana ga bo go lwala monna mongwe go twe Lasaro wa Bethania, motsana wa ga gabo Maria le Maretha mogoloe. ₂Maria yo ya bo e le ene yo o kileng a tlotsa Morena setlolo, a mo phimola dinao ka moriri wa gagwe, yo Lasaro kgaitsadie o lwalang. ₃Ke gone bokgaitsadie ba roma kwa go Jesu ba re: “Morena, bona, yo o mo ratang o a lwala.”

₄Ya re Jesu a utlwa, a re: “Bolwetse jo ga se jwa loso, mme ke jwa kgalaletso ya Modimo, gore Morwa Modimo a galalediwe ka jone.”

₅Jaana Jesu a bo a rata Maretha le monnawe, le Lasaro. ₆Ke gone ya re a utlwa fa a lwala, a nama a sa tlhotse malatsi a le mabedi mo felong fa o neng a le teng ka lobaka loo. ₇Morago ga moo a raya barutwa ba gagwe a re: “A re be re yeng gape kwa Jutea.”

₈Barutwa ba mo raya ba re: “Rabi, aitse Bajuta ba ne ba senka go go kgobotletsa ka maje jaanong fela jaana, mme a o bile o ya teng gape?”

₉Jesu a ba fetola a re: “A dinako tsa motshegare ga di 12? Fa motho a tsamaya go le motshegare, ga a ke a kgotšwa, ka a bona lesedi la lefatshe leno. ₁₀Mme fa motho a tsamaya bosigo, o a tle a kgotšwe, ka lesedi le seyo mo go ene.” ₁₁Dilo tse a di bua; mme morago ga mo a ba raya a re: “Lasaro, tsala ya rona, e robetse; mme ke a ya gore ke mo tsose mo borokong.”

₁₂Barutwa ba mo raya ba re: “Morena, fa a robetse, o tlaa fola.”

₁₃Jaana Jesu o ne a bua ka ga loso lwa gagwe; bone ba gopola fa a raya go ikhutsa ga boroko. ₁₄Jesu a ba bolelela ka thanolo a re: “Lasaro o sule. ₁₅Mme ka ga lona ke a itumela ka ke ne ke se teng, gore lo tle lo dumele; le fa go ntse jalo a re yeng kwa go ene.”

₁₆Thomase yo o bidiwang Didimo, a raya barutwa ka ene a re: “Le rona a re tsamayeng, re tle re swe nae.”

₁₇Jalo ya re Jesu a tla, a fitlhela a bile a setse a ntse malatsi a le mane mo phupung. ₁₈Jaana Bethania wa bo o le gaufi le Jerusalema, e ka ne e le sebaka sa dikilometara di ka nna tharo go tswa teng. ₁₉Bajuta ba le bantsi ba ne ba tsile matshedisong, mo go Maretha le Maria go ba gomotsa ka ga kgaitsadia bone.

₂₀Foo Maretha, ya re a utlwa fa Jesu a tla, a ya go mo kgatlhantsha; mme Maria a sala a dutse mo ntlong. ₂₁Maretha a raya Jesu a re: “Morena, fa o ka bo o ne o le fa, kgaitsadiake o ko a se ka a swa. ₂₂Le jaana ke a itse, gore le fa e le eng se o se lopang Modimo, Modimo o tlaa se go naya.”

₂₃Jesu a mo raya a re: “Kgaitsadio o tlaa ba a tsoga.”

₂₄Maretha a mo raya a re: “Ke a itse fa a tlaa ba a tsoga mo go tsogeng ka letsatsi la bofelo.”

₂₅Jesu a mo raya a re: “Ke nna tsogo le botshelo; yo o dumelang mo go nna, le fa a a swa, le fa go ntse jalo o tlaa tshela; ₂₆le fa e le mang yo o tshelang, a ba a dumela mo go nna, ga a ketla a swa gope. A mo o a go dumela?”

₂₇A mo raya a re: “Ee, Morena; ke dumetse fa o le Keresete, Morwa Modimo, e bong ene yo o tlang mo lefatsheng.”

₂₈Ya re a sena go bua jalo a tsamaya, a ya go bitsa Maria monnawe ka go iphitlha, a re: “Moruti o fa, mme o a go bitsa.” ₂₉Ene ya re a utlwa a nanoga ka bonako, a ya kwa go ene.

₃₀Jaana Jesu o ne a ise a fitlhe mo motsaneng, a sa ntse a le mo felong fa Maretha o kgatlhanyeng nae teng. ₃₁Foo Bajuta ba ba nang nae mo ntlong ba mo gomotsa, ya re ba bona fa Maria a nanoga ka bonako a tswela kwa ntle ba mo sala morago, ba gopola gore o ya kwa phupung, a ya go lelela teng.

₃₂Foo Maria a re a fitlha fa Jesu o leng teng, a mmona, a wela fa dinaong tsa gagwe, a mo raya a re: “Morena, fa o ka bo o ne o le fa, kgaitsadiake o ko a se ka a swa.”

₃₃Ya re Jesu a mmona a lela, le Bajuta ba ba tsileng nae ba lela, a gogomoga mo moweng, a fuduega, ₃₄a re: “Lo mmeile kae?” Ba mo raya ba re: “Morena, tla o bone.”

₃₅Jesu a lela. ₃₆Foo Bajuta ba re: “Bonang jaaka a ne a mo rata!”

₃₇Bangwe ba bone ba re: “A monna yo, yo o foufolotseng matlho a yo o neng a foufetse, a o ne a sa ka ke a dira le gone gore monna yo a se ka a swa?”

₃₈Foo Jesu a ba a gogoma pelo gape, a fitlha fa phupung. Ya bo e le logaga, mme letlapa la bo le aegetswe mo go lone. ₃₉Jesu a re: “Tlosang letlapa.” Maretha, kgaitsadia yo o suleng, a mo raya a re: “Morena, gompieno o setse a nkga, gonne o tlhotse malatsi a le mane a sule.”

₄₀Jesu a mo raya a re: “A ga ke a go raya ka re, fa o ne o dumela, o tlaa bona kgalalelo ya Modimo?” ₄₁Jalo ba tlosa letlapa. Mme Jesu a lelala a re: “Rara, ke a go leboga ka o nkutlwile. ₄₂Ke ne ke itse fa o nkutlwa gale; mme ka bo ke buisiwa ke bontsi jwa batho jo bo emeng fa ba ntikanyeditse, ka re ba tle ba dumele fa o nthomile.” ₄₃Ya re a sena go bua jalo, a goa ka lentswe le le godileng a re: “Lasaro, tswa!” ₄₄Yo o neng a sule a tswa, a sa fapilwe mabogo le maoto ka matsela a phitlho; sefatlhogo sa gagwe le sone se fapilwe ka letsela, Jesu a ba raya a re: “Mo fapololeng lo mo lese a tsamaye.”

₄₅Foo bontsi jwa Bajuta ba ba tsileng mo go Maria, ba bona dilo tse Jesu o di dirileng, mme ba dumela mo go ene. ₄₆Bangwe ba bone ba tloga ba ya kwa Bafarisaing, ba ba bolelela dilo tse Jesu o di dirileng. ₄₇Foo ditlhogo tsa baperesiti le Bafarisai ba epa pitso, ba re: “Re dirang, gonne monna yo o dira ditshupo di le dintsi? ₄₈Fa re mo lesa fela jaana, batho botlhe ba tlaa dumela mo go ene; Baroma ba tlaa tla ba tlosa bonno jwa rona le morafe wa rona.”

₄₉Mongwe wa bone, go twe Kaiafase, e le moperesiti yo mogolo ka ngwaga oo, a ba raya a re: “Ga lo itse sepe. ₅₀Le gone ga lo tlhokomele fa go ka nna molemo mo go lona gore motho a le mongwe fela a swele sešaba, e seng morafe otlhe go nyelela.” ₅₁Jaana golo mo a bo a sa go bue fela ka esi; mme ya re ka a le moperesiti yo mogolo ka ngwaga oo, a bo a bolelelapele fa Jesu a tlaa swela morafe. ₅₂E seng morafe oo o le osi, mme le gone e le gore a tle a phuthele gongwe bana ba Modimo ba ba faletseng.

₅₃Jalo go simolola fela ka letsatsi leo ba gakololana gore ba mmolaye. ₅₄Ke gone Jesu ga a ka a tlhola a tsamaya mo ponong mo Bajuteng, mme a tswa teng a ya kwa lefatsheng le le tshwaraganyeng le naga fela, kwa motseng o o bidiwang Eferaime; a ya a tlholatlhola teng le barutwa ba gagwe.

₅₅Jaana Tlolaganyo ya Bajuta e ne e le gaufi; batho ba le bantsi ba ba tswang mo lefatsheng ba tlhatlogela kwa Jerusalema pele ga Tlolaganyo, ba ya go iitshekisa. ₅₆Ke gone ba batla Jesu, mme ba bua mmogo ba eme mo tempeleng, ba re: “Lo gopolang? A ke gore ga a ketla a tla mo modirong?” ₅₇Jaana ditlhogo tsa baperesiti le Bafarisai ba bo ba laotse gore fa mongwe a itse kwa o leng teng, a go supe, gore ba mo tshware.