JOBE 18

₂“Lo tlaa tsoma mafoko ka lobaka

lo lokae? Akanyang,

mme re tlaa bua kwa morago.

₃Ke ka ntlha yang fa re kaiwa

jaaka dikgomo,

re bile re fetogile

re ntse maswe mo ponong ya lona?

₄Wena yo o ikgagolang

mo bogaleng jwa gago,

a lefatshe le tlaa latlhwa

ka ntlha ya gago,

kgotsa lefika le tlosiwa

mo bonnong jwa lone?

₅Ee, lesedi la moikepi le tlaa tingwa,

le tlhase ya molelo wa gagwe

ga e ketla e phatsima.

₆Lesedi le tlaa nna lefifi

mo mogopeng wa gagwe,

le lampa ya gagwe

mo godimo ga gagwe e tlaa tingwa.

₇Dikgato tsa thata ya gagwe

di tlaa pitlaganngwa,

le kgakololo ya gagwe ka esi

e tlaa mo diga.

₈Gonne o latlhelwa mo lotloeng

ke dinao tsa gagwe,

o sepela mo dithapong.

₉Seru se tlaa mo tshwara ka serethe,

mme segwe se tlaa mo tshegetsa.

₁₀Segole o se fitlhetswe mo mmung,

le mogotlha mo tseleng.

₁₁Ditheregiso di tlaa mmoifisa

mo ntlheng tsotlhe,

di mo gata direthe.

₁₂Nonofo ya gagwe

e tlaa jewa ke tlala,

tatlhego e tlaa lalela

go tlhotsa ga gagwe.

₁₃E tlaa ja e swetsa

ditokololo tsa mmele wa gagwe;

ee, motsalwapele wa loso

o tlaa ja ditokololo tsa gagwe.

₁₄O tlaa khumolwa mo mogopeng

wa gagwe

o o ikanyang mo go one;

o tlaa isiwa kwa kgosing ya

ditheregiso.

₁₅Mo mogopeng wa gagwe

go tlaa aga se e seng sa gagwe gope;

sulefera se tlaa gasiwa

mo boagong jwa gagwe.

₁₆Medi ya gagwe e tlaa omelela

kwa tlase,

kwa godimo kala ya gagwe

e tlaa kgaolwa.

₁₇Kgakologelo ya gagwe e tlaa nyelela

mo lefatsheng,

mme ga a ketla a dira le leina lepe

mo mmileng.

₁₈O tlaa ntshiwa mo leseding,

a lelekelwa mo lefifing,

a alolwa, a tswa mo lefatsheng.

₁₉Ga a ketla a nna le morwawe,

kgotsa morwa morwawe

mo bathong ba ga gabo,

le fa e le a le mongwe fela

yo o tlaa salang

kwa o ne a jaka teng.

₂₀Ba ba tlang morago

ba tlaa gakgamalela letsatsi la gagwe,

jaaka ba ba kileng ba nna pele

ba ne ba tshwarwa ke poifo.

₂₁Ruri maago a ba ba sa siamang

a bo a ntse jalo,

mme jo ke jone bonno jwa monna

yo o sa itseng Modimo.”