JOBE 26

₂“Ana o thusitse jang

ene yo o se nang thata!

Ana o bolokile jang

letsogo le le se nang nonofo!

₃Ana o gakolotse jang

ene yo o se nang botlhale,

wa ba wa bolela ka botlalo

kitso ya mmaanete!

₄O kakanyeditse mang mafoko?

Mme go dule mowa wa ga mang

mo go wena?”

₅“Ba ba suleng ba roroma

fa tlase ga metsi

le tse di agileng mo go one.

₆Bobipo ga bo a ikatega

fa pele ga one,

le Molete wa Tshenyegelo

ga o na sebipo.

₇O phuthololela botsheka kwa

sebakeng se se lolea fela,

o lepeletse lefatshe

kwa go seng sepe.

₈O bofelele metsi

mo marung a one a a kwenneng;

mme leru ga le phanyege

tlase ga one.

₉O sireletse ponalo

ya setulo sa one sa bogosi,

o ale leru la one mo go sone.

₁₀O radile molelwane

mo godimo ga metsi,

go ya dikhutlong tsa lesedi le lefifi

kwa di kopanelang teng.

₁₁Maotwana a legodimo a reketle,

a gakgamale ka kgalemelo ya one.

₁₂O hudue lewatle ka thata ya one,

mme o phololetse Moikgogomosi

ka tlhaloganyo ya one.

₁₃Magodimo a kgabisiwa

ka mowa wa one;

seatla sa one se tlhabile noga

e e fefogang.

₁₄Bonang, mo ke kwa dintlhaneng fela

ga ditsela tsa one;

mme re utlwa ka phofonyetso e

nnye jang ka ga one!

Go duma ga nonofo ya one

e mang yo o ka go tlhaloganyang?”