JOBE 38

₂“E mang yo o fifatsang kgakololo

ka mafoko a a se nang kitso?

₃A ko o ikokwaele lotheka jaaka

monna; gonne ke tlaa go botsa,

mme o nkakanyetse.

₄E rile ke thaya metheo ya lefatshe,

wa bo o le fa kae?

Kakanya, fa o na le tlhaloganyo.

₅E mang yo o tlhomileng

dilekanyo tsa lone, fa o itse? E mang

yo o ne a le namalaletsa thapo?

₆Metheo ya lone e nitamisitswe

mo go eng? Kgotsa:

Yo o beileng lentswe la kgokgotsho

la lone e mang?

₇Jale ka dinaledi tsa moso di opela

mmogo le bomorwa Modimo botlhe

ba thela lošalaba lwa boitumelo?

₈“Kgotsa e mang yo o tswaletseng

lewatle ka ditswalo,

jale ka le thoba,

jaaka ekete le tswa mo sebopelong;

₉jale ka ke dira leru seaparo sa lone,

le lefifi le lentsho

go nna letsela la phapo mo go lone.

₁₀Ka le beela molelwane wa me,

ka ba ka tlhoma mephakalego

le ditswalo.

₁₁Ka le raya, ka re: ‘O ka fitlha fa,

mme o se ka wa go feta;

dintelo tsa gago tse di mabela

di tlaa kganelelwa fa?’

₁₂“A e sa le ka malatsi a gago a

simologa a o kile wa laola moso,

wa itsise mahube felo ga one;

₁₃gore a ye go tshwara dikhutlo

tsa lefatshe, le gore baikepi

ba udubadiwe mo go lone?

₁₄Le tle le fetoge jaaka mmopa

fa tlase ga sekano;

mme dilo tsotlhe di kwetoge

jaaka mo seaparong.

₁₅Mo baikeping lesedi la tsone

le tle le kganelwe,

letsogo le le tsholetsegileng le rojwe.

₁₆“A o kile wa tsena

kwa metsweding ya lewatle,

kgotsa a o kile wa tsamaya

mo dikunyaneng tsa boteng?

₁₇A o kile wa senolelwa dikgoro

tsa loso,

kgotsa a o kile wa bona

dikgoro tsa moriti wa loso?

₁₈A o tlhalogantse

boatlhamo jwa lefatshe?

Kakanya fa o go itse gotlhe.

₁₉“Tsela e kae

e e yang kwa boagong jwa lesedi,

mme ka ga lefifi felo ga lone ke kae?

₂₀Gore o tle o le ise

kwa borakanelong jwa lone,

mme o lemoge ditselana

tse di yang kwa ntlong ya lone.

₂₁Le gale, o tlaa bo o itse,

gonne go jale o ne o tsetswe,

palo ya malatsi a gago e kgolo!

₂₂“A o kile wa tsena

mo mabolokelong a kapoko,

kgotsa a o kile wa bona mabolokelo

a sefako,

₂₃tse ke di boloketseng

motlha wa phuduego

le letsatsi la dira le ntwa?

₂₄Lesedi le kgaoganngwa ka tsela efe,

le phefo ya botlhabatsatsi

e iphalatsa mo lefatsheng

ka efe tsela?

₂₅“E mang yo o fatoletseng morwalela

wa metsi tsela,

kgotsa a fatola tsela ya logadima

lwa maru;

₂₆go nesa pula mo lefatsheng

le go se nang motho mo go lone;

mo nageng e go se nang motho

mo go yone;

₂₇go kgorisa mmu wa tshwafalo

le wa kgakgabalo;

le go tlhogisa loreme gone?

₂₈“A pula e na le rra yone,

kgotsa mang yo o tsetseng dithothi

tsa monyo?

₂₉Dikgapetla tsa metsi

di tswa sebopelong sa ga mang

le kgogotshwane ya legodimo

e mang yo o e tsetseng?

₃₀“Metsi a tle a bipiwe

jaaka ekete ka letlapa,

mme mo godimo ga boteng

go gatsele.

₃₁“A o ka bofa lesetlha la Selemela,

kgotsa o ka funolola dithapo

tsa dinaledi

tse go tweng Dikolobe.

₃₂A o ka gogela ntle masomo a naledi

tsa Masarotha

mo metlheng ya tsone,

kgotsa a o ka tsamaisa naledi

tsa Kgogabosigo

le popelelo ya yone?

₃₃A o itse melao ya magodimo?

A o ka tlhoma puso ya yone

mo lefatsheng?

₃₄A o ka tsholeletsa lentswe la gago

kwa marung,

gore letlotlo la metsi

le go khurumetse?

₃₅A o ka roma dikgadima

gore di tsamaye,

mme tsa go raya tsa re:

‘Re fano’?

₃₆E mang yo o tsentseng botlhale

mo matennyeng, kgotsa e mang

yo o neileng pelo tlhaloganyo?

₃₇E mang yo o ka balang maru

ka botlhale, kgotsa mang

yo o ka tshololang dinkgwana

tsa legodimo,

₃₈fa lorole lo golokega

le makote a ngaparelana?

₃₉A o tlaa tsomela tau e namagadi

phologolo,

kgotsa wa kgorisa ditawana,

₄₀fa di namaletse mo dikutleng

tsa tsone,

di ntse mo setswatsweng di laletse?

₄₁E mang yo o baakanyetsang

mohukubu dijo tsa one,

ka mamphorwana a one a lelela

Modimo, a kgarakgatshega fela

ka go tlhoka dijo?”