Boleo jwa ga Natabe la Abihu
1Natabe le Abihu bomorwa Arone, mongwe le mongwe wa bone a tsaya lobeyana, ba tsenya molelo mo go one, ba baya maswalo mo go one, ba isa molelo wa seeng fa pele ga Jehofa, e le o o sa o ba laolelang. 2Mme ga tswa molelo fa pele ga Jehofa, wa ba laila, ba swela fa pele ga Jehofa. 3Foo Moše a raya Arone a re: “Se ke sone se Jehofa o se buileng, a re: ‘Ke tlaa itshepisiwa ka bone ba ba nkatamelang, ke tlaa galalediwa fa pele ga batho botlhe.’ ” Arone a didimala fela.
4Moše a bitsa Mišaele le Elisafane bomorwa Usiele, rangwanaagwe Arone, a ba raya a re: “Atamelang, tlosang bana ba rraeno fa pele ga felo ga boitshepo, lo ba ise kwa ntle ga bothibelelo.” 5Jalo ba atamela, ba ba tlosa ba apere bohempe ba bone, ba ba isa kwa ntle ga bothibelelo, jaaka Moše a buile.
6Moše a raya Arone le bomorwawe, Eleasare le Ithamare, a re: “Lo se ka lwa funolola moriri wa lona, le gone lo se ka lwa ikgagolela diaparo; gore lo tle lo se ka lwa swa, le gore a se ka a nna bogale le phuthego yotlhe; mme bana ba rraeno, ba ntlo yotlhe ya Iseraele, ba lelele phiso e Jehofa o e dirileng. 7Lo se ka lwa tswela kwa ntle ga mojako wa mogope wa bophuthegelo, lo ka tla lwa swa; gonne lookwane lwa tlotso lwa ga Jehofa lo mo go lona.” Ba dira ka fa lefokong la ga Moše.
Ditiro le ditshwanelo tsa baperesiti
8Jehofa a bua le Arone, a re: 9“O se ka wa nwa bojalwa jwa mofine, le fa e le bojalwa jo bo loileng, wena le bomorwao nao, fa lo tsena mo mogopeng wa bophuthegelo, gore lo se ka lwa swa; e nne molao ka bosakhutleng go ya le dikokomana tsotlhe tsa lona; 10le gore lo farologanye dilo tse di itshepileng, le tse e leng dilo fela, tse di itshekologileng, le tse di itshekileng; 11le gore lo rute bana ba Iseraele melao yotlhe e Jehofa o e buileng le bone ka Moše.”
12Moše a bua le Arone le bomorwawe ba ba setseng, Eleasare le Ithamare a re: “Tsayang tshupelo ya boupe e e setseng ya ditshupelo tsa ga Jehofa tse di dirwang ka molelo, lo e jele fa sebesong e sa bedisiwe; gonne e boitshepo jo bo itshepileng; 13lo e jele mo felong gongwe ga boitshepo, gonne ke tshiamelo ya gago fela, le tshiamelo ya bomorwao ya ditshupelo tsa ga Jehofa tse di dirwang ka molelo; gonne ke laotswe jalo. 14Mme sehuba sa mofoko, le serope se se tsholediwang, lo di jele mo felong gongwe fa gontle, wena le bomorwao, le bomorwadio nao; gonne o di neilwe e le tshiamelo ya gago, le ya bomorwao, mo ditlhabelong tsa ditshupelo tsa kagiso tsa bana ba Iseraele. 15Serope se se tsholediwang le sehuba sa mofoko a ba di ise mmogo le tshupelo ya mafura e e dirwang ka molelo, ba e fokise le tshupelo ya mofoko fa pele ga Jehofa; mme e tlaa nna ya gago, le bomorwao nao, e le tshiamelo ya lona ka bosakhutleng; jaaka Jehofa a laotse.”
16Moše a batla ka tlhoafalo podi ya tshupelelo ya boleo, mme bonang, e ne e fisitswe; a nna bogale le bomorwa Arone ba ba setseng, e bong Eleasare le Ithamare, a re: 17“Ke ka ntlha yang lo se ka lwa jela tshupelelo ya boleo mo felong ga boitshepo, ka e le boitshepo jo bo itshepileng; mme o e lo neile go tlosa tshiamolo ya ba phuthego, go ba direla tetlanyo fa pele ga Jehofa? 18Bonang, madi a yone ga a ka a tlisiwa mo felong ga boitshepo kwa teng; ruri lo ne lo tshwanetse lwa bo ne ne lo e jetse mo felong ga boitshepo, jaaka ke laotse.”
19Arone a bua le Moše, a re: “Bona, gompieno ba isitse tshupelelo ya bone ya boleo le tshupelo ya bone e e fisiwang fa pele ga Jehofa; ke wetswe ke dilo tse di ntseng jaaka tse; fa nka bo ke jele tshupelelo ya boleo gompieno a go ne go tlaa nna molemo mo matlhong a ga Jehofa?” 20E rile Moše a utlwa mo, ga nna molemo fela mo matlhong a gagwe.
