Tlhokomelo ya dipone
1Jehofa a bua le Moše, a re: 2“Laola bana ba Iseraele, o re, ba go leretse lookwane lwa motlhware lo lo sa pekwang, lwa lesedi, lo lo kgobilweng, lo lo tlaa tukisang lampa ka gale le ka gale. 3Ka fa ntle ga sesiro sa tshupo mo mogopeng wa bophuthegelo, Arone o tlaa go baakanya maitseboa go ya mosong fa pele ga Jehofa, ka metlha yotlhe; e nne molao ka bosakhutleng go ya le dikokomana tsotlhe tsa lona. 4A baakanye dilampa mo setlhomong, se se sa pekwang sa dipone, fa pele ga Jehofa ka gale le ka gale.
Senkgwe sa tshupelo
5“O tseye setou, o bese dipapetlana tsa dinkgwe di le 12; papetlana nngwe le nngwe e dirwe ka emere e e reng e kgaogantswe sesome go bo go tsewe dikgaogano di le pedi. 6O di beye ditsela di le pedi, tsela nngwe le nngwe e nne le borataro, di bewe mo lomating lo lo sa pekwang fa pele ga Jehofa. 7O beye lebano le le sa pekwang mo tseleng nngwe le nngwe, gore e nne senkgwe sa segopotso, e bong tshupelo e e direlwang Jehofa ka molelo. 8Ka Sabata mongwe le mongwe a nne a se baakanye fa pele ga Jehofa, ka gale le ka gale; ke mo go emelang bana ba Iseraele, e le kgolagano e e sa khutleng. 9E tlaa nna sa ga Arone le bomorwawe; ba tlaa se jela mo felong gongwe ga boitshepo, gonne se boitshepo jo bo itshepileng mo go ene, mo ditshupelong tsa ga Jehofa tse di dirwang ka molelo ka molao o o sa khutleng.”
Kwatlhao ya yo o tlodileng molao
10Mme morwa mosadi mongwe wa Seiseraele, yo rraagwe e neng e le Moegepeto, a tswa a le mo baneng ba Iseraele, mme morwa mosadi wa Seiseraele a lwa le monna mongwe wa Iseraele mo bothibelelong; 11mme morwa mosadi wa Seiseraele a tlhapatsa Leina, a rogaka, mme ba mo isa kwa go Moše. Leina la ga mmaagwe e ne e le Selomithe, morwadia Diberi, wa lotso lwa Dane. 12Ba mo tsenya mo tebelong, gore ba tle ba go tlhaloganyediwe ke molomo wa ga Jehofa.
13Jehofa a bua le Moše a re: 14“Motho yo o rogakileng, mo ntshetse kwa ntle ga bothibelelo; botlhe ba ba utlwileng, a ba mmeye diatla tsa bone mo tlhogong, mme phuthego yotlhe e mo kgobotletse ka maje. 15O bue le bana ba Iseraele, o re: Le fa e le mang yo o rogakang Modimo wa gagwe, a rwale boleo iwa gagwe. 16Yo o tlhapatsang leina la ga Jehofa, o tlaa bolawa, ruri; ruri phuthego yotlhe e tlaa mo kgobotletsa ka maje; go le moeng, go le yo o tsaletsweng mo gae, fa a tlhapatsa leina la ga Jehofa, a a bolawe.
17“Le yo itayang motho a swa, a a swe ruri. 18Le yo o itayang kgomo e swa, a a e ntshetse e nngwe, botshelo bo emelwe ke botshelo.
19“Fa motho a golafatsa wa ga gabo, fela jaaka a dirile, le ene a a dirwe jalo, 20thobego a e emelwe ke thobego, leitlho ke leitlho, leino ke leino, jaaka a golafaditse motho, le ene a a dirwe fela jalo. 21Le ene yo o bolayang kgomo, a a e ntshetse e nngwe, yo o bolayang motho a a bolawe. 22Lo tlaa nna le molao o mongwe fela, wa moeng, le wa yo o tsaletsweng mo gae, gonne ke nna Jehofa Modimo wa lona.”
23Moše a bua le bana ba Iseraele, mme motho yo o ne a rogakile ba mo ntshetsa kwa ntle ga bothibelelo, ba mo kgobotletsa ka maje. Mme bana ba Iseraele ba dira jaaka Jehofa a laotse Moše.
