Arone le bomorwawe ba laolelwa tiro ya boperesiti
1Jehofa a bua le Moše a re: 2“Tsaya Arone le bomorwawe nae, le diaparo le lookwane lo lo tlolwang le kgongwana ya tshupelelo ya boleo, le diphelefu tse pedi, le seroto sa senkgwe se se sa bedisiwang; 3o phuthele phuthego yotlhe fa mojakong wa mogope wa bophuthegelo.”
4Moše a dira jaaka Jehofa a mo laotse; mme phuthego ya phuthelwa fa mojakong wa mogope wa bophuthegelo. 5Moše a raya phuthego a re: “Se ke sone se Jehofa a laotseng gore se dirwe.”
6Moše a atametsa Arone le bomorwawe, a ba tlhapisa ka metsi. 7A mo apesa hempe, a mo tlama ka moitlamo, a mo apesa kobo e telele, a baya sekhutlana mo go ene, mme a mo tlama ka moitlamo o o logilweng ka matsetseleko wa sekhutlana, a se bofelela mo go ene ka one. 8A baya letlatla la sehuba mo go ene; a tsenya Urime le Thumime mo letlatleng la sehuba. 9A mo rwesa tlhoro mo tlhogong; mo tlhorong, fa pele, a baya sematla sa gouta, serwalo se se itshepileng, jaaka Jehofa a laotse Moše.
10Moše a tsaya lookwane lo lo tlolwang, a tlotsa motlaagana le tsotlhe tse di mo go one, a di itshepisa. 11A kgatšha sebeso ka lone gasupa, a tlotsa sebeso, le dilwana tsotlhe tsa sone, le mogopo o o tlhapelang, le setlhomo sa one, go di itshepisa. 12A thela lookwane lo lo tlolwang mo tlhogong ya ga Arone, a mo tlotsa, go mo itshepisa. 13Moše a atametsa bomorwa Arone, a ba apesa dihempe, a ba tlama ka meitlamo, a fapelela ditlhoro mo go bone, jaaka Jehofa a laotse Moše.
14A atametsa kgongwana ya tshupelelo ya boleo, Arone le bomorwawe ba baya diatla tsa bone mo tlhogong ya kgongwana ya tshupelelo ya boleo. 15A e tlhaba; Moše a tsaya madi, a a baya mo dinakeng tsa sebeso mo tikologong ya sone ka monwana, a tlhapisa sebeso, a tshololela madi fa tlase ga sebeso, a se itshepisa, go se direla tetlanyo. 16A tsaya lomipi lotlhe, le lotswalo lwa sebete, le diphilo tsoo pedi le matlhaname a tsone, mme Moše a a fisetsa mo sebesong. 17Kgongwana le letlalo la yone, le nama ya yone, le moswang wa yone, a di fisa ka molelo kwa ntle ga bothibelelo, jaaka Jehofa a laotse Moše.
18A supa phelefu ya tshupelo e e fisiwang; Arone le bomorwawe ba baya diatla tsa bone mo tlhogong ya phelefu. 19A e tlhaba; Moše a kgatsha madi mo sebesong mo tikologong ya sone. 20A kgaoganya phelefu dirwe; Moše a fisa tlhogo, le dirwe, le mafura. 21A tlhatswa diteng le memo ka metsi; Moše a fisetsa phelefu yotlhe mo sebesong, e le tshupelo e e fisiwang, e e monko o o monate; e le tshupelo e e direlwang Jehofa ka molelo, jaaka Jehofa a laotse Moše.
22A supa phelefu e nngwe, phelefu ya tshwaelo; Arone le bomorwawe ba baya diatla tsa bone mo tlhogong ya phelefu. 23A e tlhaba; Moše a tsaya ga madi a yone, a a baya fa ntlheng ya tsebe ya ga Arone ya ka fa tsogong le legolo, le mo monwaneng o motona wa letsogo le legolo, le mo monwaneng o motona wa lonao lwa ka fa tsogong le legolo. 24A ba a lere bomorwa Arone; Moše a baya madi fa dintlheng tsa ditsebe tsa bone tsa ka fa tsogong le legolo, le mo menwaneng ya bone e metona ya mabogo a magolo, le mo menwaneng ya bone e metona ya dinao tsa ka fa tsogong le legolo; a kgatšha madi mo sebesong mo tikologong ya sone. 25A tsaya mafura le mogatla o o mafura, le lomipi lotlhe, le lotswalo lwa sebete, le diphilo tsoo pedi, le matlhaname a tsone, le serope sa ka fa tsogong le legolo. 26Mo serotong sa senkgwe se se sa bedisiwang se se neng se le fa pele ga Jehofa, a tsaya papetlana e le nngwe fela ya senkgwe se se sa bedisiwang, le papetlana e le nngwe fela ya senkgwe sa lookwane, le senkgwenyana se le sengwe fela se se lotsatsa, a di baya mo godimo ga mafura le mo godimo ga serope sa ka fa tsogong le legolo. 27A di baya tsotlhe mo diatleng tsa ga Arone le mo diatleng tsa bomorwawe, a di fokisa e le tshupelo ya mofoko fa pele ga Jehofa. 28Moše a di tlosa mo diatleng tsa bone a di fisetsa mo sebesong mo godimo ga tshupelo e e fisiwang, e le setshwaela sa monko o o monate; e le tshupelo e e direlwang Jehofa ka molelo. 29Moše a tsaya sehuba, a se fokisa e le tshupelo ya mofoko fa pele ga Jehofa; e le kabelo ya ga Moše ya phelefu ya tshwaelo, jaaka Jehofa a laotse Moše.
30Moše a tsaya ga lookwane lo lo tlolwang, le ga madi a a mo sebesong, a kgatšha Arone ka one, le diaparo tsa gagwe, le bomorwawe, le diaparo tsa bomorwawe nae; a itshepisa Arone, le diaparo tsa gagwe, le bomorwawe, le diaparo tsa bomorwawe nae.
31Moše a raya Arone le bomorwawe a re: “Apeelang nama fa mojakong wa mogope wa bophuthegelo, lo e jele gone le senkgwe se se mo serotong sa tshwaelo, jaaka ke laotse ka re: ‘Arone le bomorwawe ba e je.’ 32Se se salang sa nama le sa senkgwe lo se fise ka molelo, 33lo se ka lwa tswela kwa ntle ga mojako wa mogope wa bophuthegelo ka malatsi a supa, go tsamaya malatsi a go tshwaelwa ga lona a dirafala, gonne o tlaa lo tshwaela ka malatsi a supa. 34Jaaka go dirilwe ka tsatsi leno, Jehofa o laotse gore go dirwe jalo, go lo direla tetlanyo. 35Lo nne fa mojakong wa mogope wa bophuthegelo motshegare le bosigo ka malatsi a supa, lo tshegetse taelo ya ga Jehofa, gore lo se swe; gonne ke laotswe jalo.” 36Arone le bomorwawe ba dira dilo tsotlhe tse Jehofa o di laotseng ka seatla sa ga Moše.
