LUKE 10

₁Jaana morago ga dilo tse, Morena a baakanya ba bangwe ba le 70, a ba roma ka bobedi le bobedi fa pele ga sefatlhogo sa gagwe, ba ya mo metseng yotlhe, le gongwe le gongwe kwa le ene o tlogang a ya teng. ₂A ba raya a re: “Thobo e kgolo ruri, mme badiri ba botlana; ke gone rapelang Morena wa thobo, gore a rome badiri mo thobong ya gagwe. ₃Tsamayang; bonang, ke lo roma jaaka dikwanyana gare ga diphiri. ₄Se tsholeng patana ya madi, le fa e le kuana, le fa e le ditlhako; le gone lo se ka lwa dumedisa ope mo tseleng. ₅Ntlo e lo tsenang mo go yone, le fa e ka nna efe, e re pele lo re: ‘A kagiso e nne le ntlo e.’ ₆Fa morwa kagiso a le teng, kagiso ya lona e tlaa nna mo go yone; mme fa a seyo, kagiso ya lona e tlaa ba e boela mo go lona. ₇Lo nne fela mo ntlong eo, lo ja lo nwa dilo tse ba di lo nayang; gonne modiri o tshwanetswe ke tuelo ya gagwe. Lo se ka lwa tsamayatsamaya le matlo fela. ₈Motse o lo tsenang mo go one, le fa e ka nna ofe, mme ba lo tshola, lo je fela tse di bewang fa pele ga lona; ₉lo fodise ba ba lwalang mo go one; lo bo lo ba reye lo re: ‘Bogosi jwa Modimo bo lo atametse.’ ₁₀Motse o lo tsenang mo go one, le fa e ka nna ofe, mme ba sa lo tshole, tswelang mo mebileng ya one lo re: ₁₁‘Le e leng lorole lwa motse wa lona lo lo re ngaparetseng dinao, re a lo lo phimolela; le fa go ntse jalo, itseng mo gore bogosi jwa Modimo bo atametse.’ ₁₂Ke a lo raya, e tlaa re mo letsatsing leo, go tlaa nna botoka ka ga Sotoma bogolo go motse oo.

₁₃“A bo go latlhega wena Korasine! go latlhega wena Bethesaita! gonne fa ditiro tsa nonofo tse di dirilweng mo go lona di ka bo di dirilwe mo Ture le Sitone, ba ka bo ba sa bolo go ikwatlhaya, ba dutse mo matseleng a dikgetse le mo meloreng. ₁₄Le fa go ntse jalo, go tlaa nna botoka ka ga Ture le Sitone mo katlholong bogolo go lona. ₁₅Wena Kaperenaume, a o golelediwa legodimong? O tlaa folosediwa mo Bobipong. ₁₆Yo o utlwang lona, o utlwa nna; yo o ganang lona, o gana nna; mme yo o ganang nna o gana ene yo o nthomileng.”

₁₇Ba ba 70 ba boa ka boitumelo, ba re: “Morena, mewa e e maswe le yone ya re utlwa ka leina la gago.”

₁₈Mme a ba raya a re: “Ke bonye Satane a wa jaaka logadima kwa legodimong. ₁₉Bonang, ke lo neile thata ya go gata dinoga le diphepheng, le mo nonofong yotlhe ya mmaba, ga go sepe se se tlaa lo utlwisang botlhoko ka gope. ₂₀Le fa go ntse jalo, lo se ka lwa itumelela moo gore mewa e a lo utlwa; lo itumelele gore maina a lona a kwadilwe kwa legodimong.”

₂₁Ya re mo lobakeng loo Jesu a itumela ka Mowa o o Boitshepo a re: “Ke a go leboga, Rra, Morena wa legodimo le lefatshe; ka gobo dilo tse o di lobetse ba ba botlhale le ba ba tlhaloganyang, mme o di senoletse banyana ba bannye; ee, Rra, gonne go ne go le kgatlhego mo matlhong a gago gore go nne jalo.

₂₂“Dilo tsotlhe ke di neetswe ke Rre; mme ga go ope yo o itseng Morwa gore e mang, fa e se Rara; le Rara gore e mang, fa e se Morwa, le mongwe yo Morwa o ratang go mo mo senolela.”

₂₃A retologela barutwa, a ba sebela, a re: “Go sego matlho a a bonang tse lo di bonang; ₂₄gonne ke a lo raya, baperofeti ba le bantsi ba eleditse, le dikgosi, go bona tse lo di bonang, mme ba se ka ba di bona; le go utlwa tse lo di utlwang, mme ba se ka ba di utlwa.”

₂₅Mme bonang, motho mongwe wa molao, a ema a mo lalela a re: “Moruti, ke tlaa dirang gore ke rue botshelo jo bo sa khutleng?”

₂₆A mo raya a re: “Go kwadilwe eng mo molaong? O bala jang?”

₂₇A fetola a re: “Go tulwe, o rate Morena Modimo wa gago ka pelo yotlhe ya gago, le ka mowa otlhe wa gago, le ka thata yotlhe ya gago, le ka tlhaloganyo yotlhe ya gago; le mongwe ka wena jaaka o ithata.”

₂₈A mo raya a re: “O fetotse ka tshiamo; dira mo, mme o tlaa tshela.”

₂₉Mme ene, ka a rata go itshiamisa, a raya Jesu a re: “Ana mongwe ka nna e be e le mang?”

₃₀Jesu a mo fetola a re: “Monna mongwe o kile a tswa Jerusalema a fologela kwa Jeriko; mme a wela mo dinokwaneng; tsa mo rutla diaparo, tsa mo itaya, tsa tsamaya tsa mo tlogela a le gaufi le go swa. ₃₁Mme ga tshoganwa ka moperesiti mongwe a tla ka tsela eo; mme ya re a mmona, a mo fapoga a feta ka fa ntlheng nngwe ya tsela. ₃₂Fela jalo le molefi ya re a fitlha felong foo, mme a mmona a mo fapoga a feta ka fa ntlheng e nngwe ya tsela. ₃₃Mme Mosamaria mongwe ya re a etile, a tla fela fa o leng teng; ya re a mmona a mo tlhomogela pelo, ₃₄a ya mo go ene a fapa dintho tsa gagwe, a di thela lookwane le bojalwa jwa mofine, a mo pega mo peleseng ya gagwe, a mo isa kwa ntlong ya baeti, a mo tlamela. ₃₅Ka moso a ntsha bošeleng ba le bane, a ba naya mong wa ntlo, a mo raya a re: ‘Mo tlamele sentle; mme se o tlaa se ntshang bogolo go mo, ka ntlha ya gagwe, e tlaa re ke boa ke se go lefele.’

₃₆“Jaana, o gopola gore ke mang wa ba bararo ba, yo o itshupileng a le wa ga gabo ene yo o wetseng mo dinokwaneng?”

₃₇Mme a re: “Ke yo o mo utlwetseng botlhoko.” Jesu a mo raya a re: “Ya o dire jalo le wena.”

₃₈Jaana ga dirala ya re ba sa ntse ba tsamaya le tsela, a tsena mo motsaneng mongwe, mme mosadi mongwe yo o bidiwang Maretha a mo tsholela mo ntlong ya gagwe. ₃₉Mme a bo a na le monnawe yo o bidiwang Maria, yo o bileng a ne a dutse fa dinaong tsa Morena, a utlwa mafoko a gagwe. ₄₀Maretha a bo a imetswe ke go direla mo gogolo; mme a tla mo go ene a re: “Morena, a ga o re sepe ka nnake a nteseleditse go direla ke le nosi? Ka re mo reye a nthuse.”

₄₁Morena a mo fetola a re: “Maretha, Maretha, o a tlhodiega, o itapisa ka dilo di le dintsi; ₄₂go batlwa selo se le sengwe fela; gonne Maria o itshenketse kabelo e e molemo, e o se ketlang a e tlosediwa.”