MATHAIO 12

₁E rile ka lobaka loo Jesu a ralala masimo a mabele go le letsatsi la Sabata; barutwa ba gagwe ba bo ba bolailwe ke tlala, mme ba simolola go roba diako tsa mabele ba a ja. ₂Ya re Bafarisai ba bona jalo, ba mo raya ba re: “Bona, barutwa ba gago ba dira se se sa letlelelwang go dirwa ka Sabata.”

₃Mme ene a ba raya a re: “A ga lo ise lo bale ka ga se Dafite o se dirileng, jale ka a bolailwe ke tlala, le ba o ne a na nabo; ₄ka fa o tsenyeng mo ntlong ya Modimo ka teng, a ja dinkgwe tsa tshupelo, tse di sa letlelelwang go jewa ke ene, le fa e le ke ba o nang nabo, fa e se ke baperesiti ba le bosi fela? ₅Kgotsa a go lo ise lo ko lo bale mo molaong, ka fa baperesiti ba tleng ba itshepolole Sabata ka teng mo tempeleng ka letsatsi la Sabata, mme ba bo ba se na molato? ₆Mme nna ke a lo raya ka re: Mongwe yo o leng mogolo go feta tempele o fano. ₇Fa lo ka bo lo tlhalogantse gore lefoko le a reng fa le re: ‘Ke eletsa boutlwelobotlhoko e seng setlhabelo,’ lo ko lo se ka lwa sekisa ba ba se nang molato. ₈Gonne Morwa Motho ke morena wa Sabata.”

₉A tloga a tswa teng a tsena mo ntlong ya bone ya thuto. ₁₀Ga bo go le monna mongwe teng yo seatla sa gagwe se omeletseng. Ba mmotsa ba re: “A go letleletswe go fodisa ka letsatsi la Sabata?” Mme ya bo e le gore ba tle ba mo neye molato.

₁₁A ba raya a re: “E ka nna motho ofe mo go lona, yo e ka reng a na le nku e le nngwe fela, mme fa yone e wetse mo mokoleng ka letsatsi la Sabata, yo o sa ka keng a e tshwara a e ntsha? ₁₂Ke gone motho o tlhwatlhwa kgolo jang go gaisa nku! Ke gone go letleletswe go dira molemo ka letsatsi la Sabata.” ₁₃Foo a raya monna yoo a re: “Otlolola seatla sa gago.” A se otlolola; sa fola sentle sa ba sa nna jaaka se sengwe. ₁₄Bafarisai ba tswela kwa ntle, ba gakololana ka fa ba ka mmolayang ka teng.

₁₅Jesu, ya re ka a lemoga, a tswa ka go ngongwaela; mme batho ba le bantsi ba mo sala morago; a ba fodisa botlhe fela. ₁₆A ba laya a re, ba se ka ba mo utlwatsa; ₁₇gore go tle go dirale se se builweng ke moperofeti Isaia a re:

₂₂Foo ga leriwe kwa go ene mongwe yo o tsenyweng ke mowa o o maswe, a le sefofu, a bile a le semumu; mme a mo fodisa, monna wa semumu a ba a tla a bua, a ba a bona. ₂₃Mme batho ba ba matshutitshuti ba gakgamala botlhe ba re: “Yo, a ke ene morwa Dafite?”

₂₄E rile Bafarisai ba utlwa, ba re: “Monna yo ga a kgoromeletse mewa e e maswe ntle, fa e se ka Beelesebube kgosana ya mewa e e maswe.”

₂₅Mme ka a itse megopolo ya bone, a ba raya a re: “Bogosi bongwe le bongwe jo bo ikgaogantseng bo a swafala; le motse mongwe le mongwe, le fa e le ntlo e e ikgaogantseng ga e ka ke ya ema; ₂₆Fa Satane a kgoromeletsa Satane ntle, o tlaa bo a ikgaogantse; mme bogosi jwa gagwe bo tlaa ema jang? ₂₇Mme nna, e ka re fa e le gore ke kgoromeletsa mewa e e maswe ntle ka Beelesebube, bomorwaa lona bone ba ba kgoromeletsa ntle ka mang? Ke gone bone ba tlaa nnang baatlhodi ba lona. ₂₈E ka re fa e le gore ke kgoromeletsa mewa e e maswe ntle ka Mowa wa Modimo, e tlaa bo jalo bogosi jwa Modimo bo tsile mo go lona.

₂₉“Kgotsa motho o ka tsena jang mo ntlong ya monna yo o thata, a thopa dilo tsa gagwe, fa a se ka a golega monna yo o thata pele? Ke gone o ka thopang ntlo ya gagwe.

₃₀“Yo o sa emang le nna o tlhabana le nna; le yo o sa phutheng le nna o a falatsa. ₃₁Ke gone ke lo rayang ke re: Batho ba tlaa itshwarelwa dibe tsotlhe le tlhapatso; mme tlhapatso e e tlhapatsang Mowa, ga e ketla e itshwarelwa. ₃₂Le fa e le mang yo o tlaa buang lefoko le le nyatsang Morwa Motho, o tlaa go itshwarelwa; mme le fa e le mang yo o tlaa buang lefoko le le nyatsang Mowa o o Boitshepo, ga a ketla a go itshwarelwa, le fa e le mo lefatsheng leno, le fa e le mo go le le tlang.

₃₃“Dirang setlhare se nne molemo, le loungo lwa sone lo nne molemo; kgotsa dirang setlhare se nne bosula, le loungo lwa sone lo nne bosula; gonne setlhare se itsiwe ka loungo lwa sone. ₃₄Lotsalo lwa dinoga ke lona; lo ka bua jang dilo tse di molemo lo le bosula? Gonne molomo o bua se se tswang mo botlalong jwa pelo. ₃₅Monna yo o molemo o ntsha dilo tse di molemo mo lohumong lwa gagwe lo lo molemo; motho yo o bosula le ene o ntsha dilo tse di bosula mo lohumong lwa gagwe lo lo bosula.

₃₆“Mme ke lo raya ke re: Lefoko lengwe le lengwe la boithamako le batho ba tlaa le buang, ba tlaa le bodiwa mo motlheng wa tsheko. ₃₇Gonne o tlaa atlholelwa ka mafoko a gago, le ka mafoko a gago o tlaa sekisiwa.”

₃₈Foo bangwe ba bakwadi le Bafarisai ba mo fetola ba re: “Moruti, re rata go bona sesupo sengwe mo go wena.”

₃₉Mme ene a ba fetola ka go re: “Losika lo lo bosula le lwa boaka, lo batla sesupo; ga lo ketla lo newa sesupo sepe, fa e se sesupo sa moperofeti Jona. ₄₀Jaaka Jona a kile a nna mo mpeng ya leruarua ka malatsi a le mararo le masigo a le mararo; Morwa Motho le ene o tlaa nna mo pelong ya lefatshe ka malatsi a le mararo le masigo a le mararo. ₄₁Banna ba Ninefe ba tlaa ema mo tshekong, ba ema le losika lo, ba lo sekisa; ka gobo bone ba ikwatlhaile ka thero ya ga Jona; mme bonang yo mogolo go feta Jona o fano. ₄₂Mohumagadi kgosi ya Borwa o tlaa ema mo tshekong, a ema le losika lo a lo sekisa; ka gobo ene o ne a tswa dikhutlong tsa lefatshe, a tla go utlwa botlhale jwa ga Solomone; mme bonang, yo mogolo go feta Solomone o fano.

₄₃“Mowa o o maswe o a re o dule mo mothong, o ye o ralale dikaka o batla boikhutso, mme o se ke o bo bone. ₄₄Foo o itheye o re: ‘Ke tlaa ba ke boela kwa ntlong ya me e ke duleng mo go yone’; mme o re o tsile o fitlhele e se na motho ope, e feetswe, e baakantswe. ₄₅Jaana o ye o itseele mewa e sele e supa, e e o gaisang ka bosula, mme e tsene e age teng; mme go fele go befile mo mothong yo go feta ga ntlha. Go tlaa nna jalo fela le losika lo, lo lo bosula.”

₄₆Ya re a sa ntse a bua le batho ba bantsintsi, bonang, mmaagwe le bomonnawe ba bo ba emetse kwa thoko, ba eletsa go bua nae. ₄₇Mongwe a mo raya a re: “Bona, mmaago le bomonnao ba eme kwa ntle, ba eletsa go bua nao.”

₄₈Mme a fetola yo o mmoleletseng a re: “Mme ke mang? Le bonnake ke bomang?” ₄₉A otlolola letsogo a supa barutwa a re: “Bonang mme le bonnake. ₅₀Gonne le fa e le mang yo o tlaa dirang go rata ga Rre yo o kwa legodimong, ke ene nnake, le kgaitsadiake, le mme.”