MATHAIO 18

₁E rile ka lone lobaka loo barutwa ba tla mo go Jesu ba re: “Ana yo e leng ene mogolo bogolo mo bogosing jwa legodimo e a bo e le mang?”

₂Mme a ipiletsa ngwanyana, a mmaya fa gare ga bone. ₃Mme a re: “Ammaaruri ke a lo raya, fa lo sa sokologe, lwa nna jaaka banyana, ga lo ketla lo tsena mo bogosing jwa legodimo ka gope. ₄Ke gone le fa e le mang yo o tlaa ingotlang jaaka ngwanyana yo, ke ene yo o leng mogolo bogolo mo bogosing jwa legodimo. ₅Mme le fa e le mang yo o tsholang ngwanyana mongwe yo o ntseng jalo, ka leina la me, o tshola nna.

₆“Le fa e le mang yo o tlaa kgopisang mongwe wa ba babotlana ba ba dumelang mo go nna, go ka nna molemo mo go ene fa lolwala lo logolo lo ka gokelelwa mo thamong ya gagwe, a ba a thabuediwa mo matenyeng a lewatle. ₇A bo go latlhega lefatshe ka ntlha ya dikgopi! Gonne dikgopi di na le go tla fela, mme go bo go latlhega motho yo sekgopi se tlang ka ene.

₈“Fa seatla sa gago, kgotsa lonao lwa gago di go kgopisa, o di kgaole o di latlhe; gonne go ka nna molemo mo go wena go tsena mo botshelong o le segole kgotsa setlhotsa, bogolo go go latlhelwa mo molelong o o sa khutleng o le diatla tsoo pedi kgotsa dinao tsoo pedi. ₉Fa leitlho la gago le go kgopisa, o le gonye o le latlhe; gonne go ka nna molemo mo go wena go tsena mo botshelong o le moitlho, bogolo go go latlhelwa mo moleteng wa molelo o le matlho oo mabedi.

₁₀“Lo bone, gore lo se nyatse ope wa ba babotlana ba; gonne ke a lo raya ka re, kwa legodimong baengele ba bone ba lebile ka metlha yotlhe sefatlhogo sa ga Rre yo o kwa legodimong. ₁₁(Gonne Morwa Motho o tsile go boloka se se latlhegileng.)

₁₂“Lo gopola jang? Fa motho mongwe a na le dinku di le lekgolo, mme fa nngwe ya tsone e timetse, a ga a tlogele tse di 99, mme a ya kwa dithabeng, a batla e e timetseng? ₁₃Mme e tlaa re fa go dirala a ya a e bona, ruri ke a lo raya, o itumelela yone bogolo go tse 99 tse di se kang tsa timela. ₁₄Fela jalo ga se go rata ga Rraeno yo o kwa legodimong, gore mongwe wa ba babotlana ba, a nyelele.

₁₅“Fa wa gaeno a go leofetse, ya o mo kaele molato wa gagwe lo le babedi fela; e tlaa re fa a go utlwile o tlaa bo o gapile wa gaeno. ₁₆Mme fa a gana go utlwa, a go ye mongwe fela, le fa e le ba le babedi nao, gore lefoko lengwe le lengwe le tlhomamisiwe ka melomo ya basupi ba le babedi, le fa e le ba le bararo. ₁₇Mme fa a gana go utlwa bone, ya o bolelele phuthego; mme fa a gana go utlwa le yone phuthego, mo go wena o mo kaye jaaka moditšhaba fela, le mokgethisi.

₁₈“Ammaaruri ke a lo raya: Le fa e ka ne e le dilo dife tse lo di bofang mo lefatsheng, di tlaa bo di bofilwe kwa legodimong; le gone le fa e ka ne e le dilo dife tse lo tlaa di bofololang mo lefatsheng, di tlaa bo di bofolotswe kwa legodimong. ₁₉Gape, ke a lo raya: E tlaa re fa ba le babedi ba lona ba dumalanye mo lefatsheng ka ga sengwe fela se ba tlaa se lopang, ba tlaa se direlwa ke Rre yo o kwa legodimong. ₂₀Gonne kwa ba le babedi kgotsa ba le bararo ba phuthegileng gone, ka leina la me, foo nna ke gone mo gare ga bone.”

₂₁Foo ga tla Petere a mo raya a re: “Morena, kana wa gaetsho o ka nteofela gakae, mme ke ntse ke mo itshwarela; a ke gasupa?”

₂₂Jesu a mo raya a re: “Ga ke go reye ke re e nne gasupa; ka re, e nne ga 70 gasupa. ₂₃Ke gone bogosi jwa legodimo bo tshwantshiwang le kgosi nngwe, e e neng e rata go gopola melato e e e neetseng batlhanka ba yone. ₂₄E rile e simolola go gopola, ga tlisiwa kwa go yone mongwe yo o molato nayo diponto di le makgolo a lekgolo. ₂₅Mme e rile ka a se na se o lefang ka sone, morena wa gagwe a laola gore a rekisiwe, le mosadi wa gagwe le bana, le dilo tsotlhe tsa gagwe, gore tefo e dirafale. ₂₆Ke gone motlhanka a wela fa fatshe a mo obamela a re: ‘Morena, a ko o nne pelotelele le nna, mme ke tlaa go lefela gotlhe fela.’ ₂₇Mme morena wa motlhanka yoo, ka a tlhomoga pelo, a mo golola, a mo itshwarela molato oo.

₂₈“Motlhanka yoo a tswa, mme a fitlhela mongwe wa batlhanka ka ene, yo o molato nae diponto di le some; a mo tshwara a mo tlhaba dikutso a re: ‘Lefa molato wa gago.’ ₂₉Jalo motlhanka ka ene a wela fa fatshe a mo rapela a re: ‘A ko o nne pelotelele le nna, mme ke tlaa go lefela.’ ₃₀Mme a gana; a ya a mo latlhela mo ntlong ya kgolegelo, a tla a tsamaye a lefe molato. ₃₁Jalo ya re batlhanka ka ene ba bona se se dirilweng, ba utlwa botlhoko thata, ba ya ba bolelela morena wa bone gotlhe mo go dirilweng. ₃₂Foo morena wa gagwe a mo ipiletsa, a mo raya a re: ‘Motlhanka wa molotsana ke wena, ke go itshwaretse molato ole otlhe fela, ka go bo o ne o o inthapeletse. ₃₃Le wena a e ne e se tshwanelo ya gago go utlwela motlhanka ka wena botlhoko, fela jaaka le nna ke go utlwetse botlhoko?’ ₃₄Mme morena wa gagwe a šakgala, a mo neela batlhokofatsi, a tla a tsamaye a lefe molato otlhe fela.

₃₅“Fela jalo, Rre wa legodimo o tlaa direla lona, fa lo sa itshwarelane, mongwe le mongwe wa ga gabo ka dipelo tsa lona.”