MAREKO 10

₁A tloga teng, a tla mo melelwaneng ya Jutea le moseja ga Joretane; mme matshutitshuti a batho a phuthegela kwa go ene gape, mme a ba ruta gape jaaka a tlwaetse.

₂Ga tla Bafarisai kwa go ene, ba mmotsa ba re: “A monna o letleletswe go tlhala mosadi wa gagwe?” Mme ba bo ba mo lalela.

₃A ba fetola a re: “Moše o lo laotse a reng?”

₄Ba re: “Moše o ne a re leseletsa go kwala lokwalo lwa tlhalo, le go tlhala mosadi.”

₅Mme Jesu a ba raya a re: “Moše o ne a lo kwalela taolo e ka ntlha ya bothata jwa dipelo tsa lona. ₆E sa le ka tshimologo ya tlholego, go twe: ‘O ba bopile nona le tshadi.’ ₇‘Ke gone ka moo monna o tlaa tlogelang rraagwe le mmaagwe, a ngaparela mosadi wa gagwe; ₈mme bobedi jo bo tlaa nna nama e le nngwe fela; jalo ba bo ba sa tlhole ba le babedi, ke nama e le nngwe fela.’ ₉Ke gone, a motho a se kgaoganye tse Modimo o di kopantseng.”

₁₀Ya re mo ntlong barutwa ba mmotsa gape ka ga selo se. ₁₁A ba raya a re: “Le fa e le mang yo o tlaa tlhalang mosadi wa gagwe, a nyala o sele, o a mo akafalela; ₁₂mme fa mosadi ka esi a tlhala monna wa gagwe, a nyalwa ke o sele, o dira boaka.”

₁₃Ba lere banyana kwa go ene gore a ba ame, mme barutwa ba ba kgalemela. ₁₄Ya re Jesu a bona jalo, a gakatsega thata, a ba raya a re: “Lesang banyana ba tle kwa go nna, lo se ka lwa ba itsa, gonne bogosi jwa Modimo ke jwa ba ba ntseng jalo. ₁₅Ammaaruri ke a lo raya, le fa e le mang yo o se ketlang a tshola bogosi jwa Modimo jaaka ngwanyana, ga a ketla a tsena mo go jone gope.” ₁₆Mme a ba tsaya mo mabogong a gagwe, a ba segofatsa, ka go ba baya diatla.

₁₇Ya re a sa tsamaela pele mo tseleng, ga tabogela mongwe kwa go ene, a mo khubamela ka mangole, a mmotsa a re: “Moruti yo o molemo, ke tlaa dirang gore ke rue botshelo jo bo sa khutleng?”

₁₈Jesu a mo raya a re: “O mpiletsang molemo? Ga go ope yo o molemo, fa e se a le mongwe fela, e bong Modimo. ₁₉Ditaolo o a di itse tse di reng: ‘O se ka wa bolaya motho, o se ka wa dira boaka, o se ka wa utswa, o se ka wa supa tshupo ya kako, o se ka wa tsietsa, tlotla rraago le mmaago.’ ”

₂₀Mme a mo raya a re: “Moruti, dilo tse tsotlhe fela ke sa le ke di tlhokomela go tloga bokaung jwa me.”

₂₁Mme Jesu a mo leba, a mo rata, mme a mo raya a re: “O tlhoka selo se le sengwe fela: Ya go rekisa tsotlhe tse o nang natso, o abele bahumanegi, mme o tlaa nna le khumo kwa legodimong; o bo o tle o ntshale morago.” ₂₂Mme a bifa sefatlhogo ka lefoko leo, a tsamaya ka bohutsana, gonne e ne e le motho yo o dithuo dintsi.

₂₃Mme Jesu a lebaleba ka fa le ka fa, a raya barutwa ba gagwe a re: “Kana ba ba nang le mahumo ba tlaa tsena mo bogosing jwa Modimo ka pitlagano jang!” ₂₄Barutwa ba gakgamalela mafoko a gagwe. Jesu a ba fetola gape, a re: “Kana go thata jang mo go ba ba ikantseng nahumo go tsena mo bogosing jwa Modimo! ₂₅Go ka nna bofefo kamela go tsena ka letshoba la lomao, bogolo go mohumi go tsena mo bogosing jwa Modimo.”

₂₆Ba gakgamala thatathata, ba mo raya ba re: “Fa e le jalo go bo go ka bolokwa mang?”

₂₇Jesu a ba leba a re: “Mo bathong go retetse, mme e seng mo Modimong, gonne mo Modimong dilo tsotlhe di ka dirafala.”

₂₈Petere a simolola go mo raya a re: “Bona, rona re tlogetse gotlhe, mme re go setse morago.”

₂₉Jesu a re: “Ammaaruri ke a lo raya, ga go motho ope yo o tlogetseng ntlo, kgotsa bomorwa rraagwe, kgotsa bokgaitsadie, kgotsa mmaagwe, kgotsa rraagwe, kgotsa bana, kgotsa masimo, ka ntlha ya me, le ka ntlha ya Mafoko a a Molemo, ₃₀yo o se ketlang a bona ga lekgolo, le jaana mo lobakeng lono, e bong matlo, le bomorwa rraagwe, le bokgaitsadie, le bommaagwe, le bana, le masimo, di na le dipogiso; mme mo lefatsheng le le tlang o tlaa bona botshelo jo bo sa khutleng. ₃₁Bantsi ba e neng e le ba pele ba tlaa nna ba morago; le ba morago ba nne ba kwa pele.”

₃₂Ba bo ba le mo tseleng ba tlhatlogela kwa Jerusalema; Jesu a ba eteletse pele; mme ba bo ba tseanye; le ba ba setseng morago ba boifa. Mme a tsaya gape ba ba 12, a simolola go ba bolelela dilo tse di tlaa mo dirafalelang. ₃₃A re: “Bonang, re ya kwa Jerusalema; mme Morwa Motho o tlaa neelwa ditlhogo tsa baperesiti le bakwadi, mme ba tlaa mo sekisa gore a swe, ba tlaa mo neela Baditšhaba, ₃₄ba tlaa mo sotla, ba mo kgwela mathe, ba mo seola, ba mmolaya; mme e tlaa re malatsi a le mararo a sena go feta, o tlaa ba a tsoga.”

₃₅Ga mo atamela Jakobe le Johane, bomorwa Sebete, ba re: “Moruti re rata wa re direla ka fa re tlaa go lopang ka teng.”

₃₆A ba raya a re: “Lo rata ke ka bo ke lo direlang?”

₃₇Ba mo raya ba re: “O mme re dule, mongwe ka fa tsogong la gago le legolo, yo mongwe ka fa tsogong la gago la molema, mo kgalalelong ya gago.”

₃₈Jesu a ba raya a re: “Ga lo itse se lo se lopang. A lo nonofile go nwa senwelo se ke se nwang, kgotsa go kolobediwa ka kolobetso e ke kolobediwang ka yone?”

₃₉Ba mo raya ba re: “Re nonofile.” Jesu a ba raya a re: “Senwelo se ke se nwang, lona lo tlaa se nwa; lo ba lo kolobediwa ka kolobetso e ke kolobediwang ka yone. ₄₀Mme go dula ka fa tsogong la me le legolo, le ka fa go la molema, ga se ga me go go naya; go tlaa newa bone ba ba go baakanyeditsweng.”

₄₁Ya re ba ba some ba utlwa, ba simolola go gakalela boJakobe le Johane. ₄₂Mme Jesu a ba ipiletsa, a ba raya a re: “Lo a itse fa ba ba kaiwang balaodi mo go Baditšhaba ba le bogoma mo go bone; le bagolo ba bone ba a ba laola. ₄₃Go se ka ga nna jalo mo go lona; le fa e le mang yo o ratang a ka bo a le mogolo mo go lona, a a nne modiredi wa lona. ₄₄Le gone yo o ratang a ka bo a le wa kwa pele mo go lona, a a nne motlhanka wa botlhe. ₄₅Gonne ruri Morwa Motho ga a a ka a tla go direlwa, mme e le go direla, le go ntsha botshelo jwa gagwe, gore e nne serekololo sa batho ba le bantsi.”

₄₆Ba fitlha kwa Jeriko; mme ya re a tswa mo Jeriko, a na le barutwa ba gagwe, le bontsi jo bogolo jwa batho, Baretimaeo morwa Timaeo, mokopi wa sefofu, a bo a dutse fa thoko ga tsela. ₄₇Ya re a utlwa fa e le Jesu wa Nasaretha, a simolola go goa a re: “Jesu morwa Dafite, nkutlwela botlhoko!”

₄₈Mme batho ba le bantsi ba mo kgalemela, ba re a didimale, mme a goa bogolo bogolo a re: “Morwa Dafite, nkutlwela botlhoko.”

₄₉Mme Jesu a ema a re: “Mmitseng,” mme ba bitsa monna wa sefofu, ba mo raya ba re: “Nametsega tlhe, nanoga o a go bitsa.”

₅₀Ene a latlha seaparo sa gagwe, a tlola, a tla kwa go Jesu.

₅₁Jesu a mo fetola a re: “O rata ka go direlang?” Monna wa sefofu a mo raya a re: “Moruti, a nke ke amogele pono ya me.”

₅₂Jesu a mo raya a re: “Tsamaya, tumelo ya gago e go fodisitse.” Mme a akofa a amogela pono ya gagwe, a ba a mo sala morago mo tseleng.