MAREKO 15

₁E rile bosigo boo sa, ditlhogo tsa baperesiti di na le bagolwane le bakwadi, le botlhe ba lekgotla, ba epa pitso, mme ba golega Jesu, ba mo tlosa, ba ya go mo neela Pilato. ₂Mme Pilato a mmotsa a re: “A o kgosi ya Bajuta?” Mme a mo fetola a re: “O a bolela.”

₃Ditlhogo tsa baperesiti tsa mo naya melato ya dilo di le dintsi. ₄Pilato a ba a mmotsa gape a re: “A ga o fetole ka lepe? Bona dilo tse dintsi tse ba go nayang melato ka ga tsone.”

₅Jesu a se ka a tlhola a fetola ka lepe; Pilato a ba a gakgamala.

₆Jaana e ne e tle e re ka lobaka lwa modiro a ba gololele mogolegwi mongwe, yo ba mo mo lopang. ₇Ga bo go le mongwe yo go tweng Barabase, a golegilwe le ba ba dirileng pheretlho mo motseng, e le banna ba e rileng mo pheretlhong ba bolaya batho. ₈Mme bontsi jwa batho jwa atamela, jwa simolola go mo lopa gore a dire jaaka a ne a tle a ba direle. ₉Pilato a ba fetola a re: “A lo rata ka lo gololela Kgosi ya Bajuta?” ₁₀Ka go bo a lemoga fa ditlhogo tsa baperesiti di mo neetse mo tshekong ka khufano.

₁₁Mme ditlhogo tsa baperesiti tsa tlhotlheletsa batho gore bogolo a ba gololele Barabase. ₁₂Pilato a ba fetola gape a re: “Jaana yo lo mmitsang Kgosi ya Bajuta ke tlaa mo reng?”

₁₃Ba thela lošalaba gape ba re: “Mmapole.”

₁₄Pilato a ba raya a re: “Ka ntlha yang? O dirile bosula bofe?” Ba thela lošalaba ka thata e kgolo ba re: “Mmapole.”

₁₅E rile ka Pilato a rata go thethebatsa batho dipelo, a ba gololela Barabase, mme ya re a sena go seola Jesu, a mo neela go bapolwa.

₁₆Foo batlhabani ba tsaya Jesu ba mo gogela mo teng ga lolwapa, kwa go leng ntlo ya bogosi teng, mme ba phutha mophato otlhe fela. ₁₇Mme ba mo apesa bohibidu jo bo mokgona, ba loga serwalo sa mitlwa ba se mo rwesa; ₁₈mme ba simolola go mo dumedisa ba re: “Dumela kgosi ya Bajuta!”

₁₉Ba mmetsa mo tlhogong ka lotlhaka, ba mo kgwela mathe, ba wa ka mangole ba mo obamela. ₂₀Ya re ba sena go mo sotla, ba mo apola bohibidu jo bo mokgona, ba mo apesa diaparo tsa gagwe. Ba mo gogela kwa ntle ba ya go mmapola.

₂₁Ga bo go le mongwe, go twe Simone wa Kurene, rraabo bo Alekesantere le Rufuse, a bo a feta a tswa kwa nageng, mme ba mo tshwara ba mo patikela go ya nabo, gore a sikare mokgoro wa gagwe. ₂₂Ba mo fitlhisa kwa felong fa go tweng Golegotha, ke go re, “Felo ga logata”, fa go phuthololwa. ₂₃Ba re ba mo nosa bojalwa jwa mofine jo bo tlhakantswe le mura; mme a se ka a bo amogela. ₂₄Mme ba mmapola; le diaparo tsa gagwe ba di kgaogana, ba laolela mongwe le mongwe se o se tsayang ka go thela bola. ₂₅Ya bo e le nako ya boraro, fa ba mmapola. ₂₆Lokwalo lwa molato wa gagwe lwa bo lo kwadilwe fa godimo lo re: “KGOSI YA BAJUTA.” ₂₇Mme ba bapola dinokwane di le pedi nae, sengwe ka fa letsogong la gagwe le legolo, se sengwe ka fa go la molema. ₂₈(Lokwalo lwa dirafala lo lo reng: “A balelwa le batlodi.”)

₂₉Ba ba fetang ba mo kgala, ba tshikinya ditlhogo ba re: “Ahe, wena yo o senyang tempele o ba o e aga ka malatsi a le mararo. ₃₀Ipoloke, o fologe mo mokgorong.”

₃₁Fela jalo ditlhogo tsa baperesiti di na le bakwadi, ba ne ba na le tshotlo ka ga gagwe ba re: “O ne a boloka ba bangwe; ene ka esi ga a ka ke a ipoloka. ₃₂A ene Keresete, Kgosi ya Iseraele, a ke a fologe jaana mo mokgorong gore re bone, re dumele.” Le ba ba bapotsweng nae ba mo kgoba.

₃₃E rile go le nako ya borataro ya motshegare o mogolo, ga nna lefifi mo lefatsheng lotlhe, go ya go fitlha mo nakong ya 9 ya motshegare wa maitseboa. ₃₄Ya re go le nako ya 9 Jesu a goa ka lentswe le legolo a re: “Eloi, Eloi, lama sabakathani,” ke go re: “Modimo wa me, Modimo wa me, o ntatlhetseng?”

₃₅Bangwe ba ba emeng teng ba re ba utlwa, ba re: “Bonang, o bitsa Elija.” ₃₆Mme mongwe a taboga, a ina ngami mo bojalweng jo bo botšarara, a e tlhomela ka lotlhaka, a mo nosa a re: “Lesang; mmang re boneng boo Elija o tlaa tla go mo pagolola.”

₃₇Jesu a goa ka lentswe le legolo, mme a neela mowa.

₃₈Mme sesiro sa tempele sa garoga ka bogare, go tswa kwa godimo go ya kwa tlase. ₃₉Molaodi wa mophato yo o emeng foo a lebaganye nae, ya re a bona fa a neetse mowa jalo, a re: “Ruri monna yo, e ne e le Morwa Modimo.”

₄₀Le gone ga bo go le basadi teng ba lebile ba le kwa kgakala; mo go bone ga bo go le Maria Magetalene, le Maria mma Jakobe yo mmotlana le Josese, le Salome; ₄₁ba e rileng a sa ntse a le kwa Galilea, ba mo sala morago, ba mo direla; le basadi ba bangwe ba le bantsi ba ba tsileng nae mo Jerusalema.

₄₂E rile go setse go le maitseboa jaanong, ka e le letsatsi la Iketleetso, ke go re, letsatsi la go tsoga go le Sabata, ₄₃ga tla Josefe wa Arimathea, e le mongwe yo o tlotlegang wa lekgotla, yo o bileng ka esi a lebeletse bogosi jwa Modimo; a ya ka pelokgale kwa go Pilato, a lopa setoto sa ga Jesu. ₄₄Mme Pilato a belaela gore a jaana o sule; mme a bitsa molaodi wa mophato, a mmotsa fa e setse e le sebaka a sena go swa. ₄₅Ya re a sena go utlwa mo molaoding wa mophato, a neela Josefe setoto. ₄₆A reka letsela la leloba, a mo pagolola, a mo tshophelela ka letsela leo la leloba, a mmaya mo phupung e e neng e gabilwe mo lefikeng, mme a pitikela lentswe fa molomong wa phupu.

₄₇Maria Magetalene, le Maria mma Josese ba bona fa o beilweng teng.