NEHEMIA 9

₁Jaana e rile ka tsatsi la 24 la kgwedi eo bana ba Iseraele ba bo ba phuthegile ba ikiditse dijo, ba apere letsela la kgetsi, ba ikubuetse mmu. ₂Ba losika lwa Iseraele ba itomolola mo baennyeng botlhe fela, ba ema ba ipolela maleo a bone, le ditshiamololo tsa borraabo. ₃Ba ema ka dinao mo maemong a bone, ba bala mo lokwalong lwa molao wa ga Jehofa Modimo wa bone ka lobaka lwa sene lwa kgaogano ya letsatsi, ka lobaka lwa kgaolo e nngwe ya sene ba ipolela, ba obamela Jehofa Modimo wa bone. ₄Foo ga ema Ješua, le Bani, le Katamiele, le Shebania, le Buni, le Serebia, le Bani le Kenani; ba ema mo direpuding tsa Balefi, ba thelela Jehofa Modimo wa bone lošalaba ka lentswe le le tsholetsegileng. ₅Foo Balefi, le Ješua, le Katamiele, le Bani, le Hašabeneia, le Sherebia, le Hodia, le Shebania le Pethahia, ba re: “Emang ka dinao, lo bake Jehofa Modimo wa lona go tswa bosenang tshimologo go ya bosakhutleng; a go bakwe leina la gago le le galalelang, le le goletsegileng godimo ga tumiso yotlhe le pako.”

₆“O Jehofa o le wesi; o dirile legodimo, legodimo la magodimo, le bontsi jotlhe jwa one, lefatshe le dilo tsotlhe tse di mo go lone, mawatle le dilo tsotlhe tse di mo go one, o di bolokile tsotlhe fela; lesomosomo la legodimo le a go obamela.

₇“O Jehofa Modimo yo o ne wa itshenkela Aberame, wa mo ntsha mo Ure wa Bakalatea, wa mo naya leina la Aberahame. ₈Wa fitlhela pelo ya gagwe e le boikanngo fa pele ga gago, wa dira kgolagano nae go aba lefatshe la Mokanana, le la Mohite, le la Moamore, le la Moperise, le la Mojebuse le la Mogiragaše, e leng go a naya losika lwa gagwe, o dirafaditse mafoko a gago; gonne o tshiamo.

₉“O ne wa bona patikego ya borraetsho mo Egepeto, wa utlwa selelo sa bone fa Lewatleng le Lehibidu; ₁₀Wa dira ditshupo le dikgakgamatso mo go Faro, le mo batlhankeng botlhe ba gagwe, le mo bathong botlhe ba lefatshe la ga gabo; gonne o ne o itse fa ba dira ka boikgodiso mo go bone; mme wa itirela leina jaaka le ntse gompieno. ₁₁Wa tsetsereganya lewatle fa pele ga bone, ba ba ba tla ba ralala lewatle ba gata lefatshe le le omeletseng; bakonateledi ba bone wa ba thabuetsa mo matennyeng, jaaka lentswe mo metsing a magolo. ₁₂Gape wa ba goga o le mo mosipuring wa leru motshegare; le mo mosipuring wa molelo bosigo, go tla o ba naya lesedi mo tseleng e ba tshwanetseng go tsamaya mo go yone.

₁₃“Le gone wa fologela mo thabeng ya Sinai, wa bua nabo o le mo legodimong, wa ba naya dikatlholo tse di siameng, le melao ya boammaaruri, ditao tse di molemo le ditaolo. ₁₄Wa ba itsise Sabata wa gago o o itshepileng, wa ba laolela ditaolo, le ditao, le molao, ka Moše motlhanka wa gago; ₁₅wa ba naya dijo tse di tswang legodimong ka ntlha ya tlala ya bone, wa ba wa ba ntshetsa metsi mo lefikeng ka ntlha ya lenyora la bone, wa ba laola gore ba tsene ba ye go rua lefatshe le o ne o le tsholeleditse letsogo la gago, wa re o tlaa le ba naya.

₁₆“Bone le borraetsho ba dira ka boikgodiso, ba ithatafatsa dithamo tsa bone, ba se ka ba reetsa ditaolo tsa gago. ₁₇Ba gana go utlwa, le gone ba se ka ba gopola dikgakgamatso tsa gago tse o kileng wa nna wa di dira mo gare ga bone; ba ithatafatsa dithamo tsa bone, le mo tsuololong ya bone ba itlhomela kgosi go tla ba boela kwa kgolegong ya bone; mme wena, o Modimo o o maitshwarelo; o pelotshweu, o tletse bopelotlhomogi, o bonya go galefa, o letlotlo la boutlwelobotlhoko, wa se ka wa ba latlha. ₁₈Ee, e rile ba sena go itirela namane e e thetsweng, ba re: ‘Ke one Modimo wa gago Iseraele o o go tlhatlositseng kwa Egepeto,’ ba dira dikgakatso tse dikgolo.

₁₉“Le fa go ntse jalo mo mautlwelobotlhokong a gago a mantsintsi ga o a ka wa ba latlha mo nageng; mosipuri wa leru ga o a ka wa tloga mo godimo ga bone motshegare, go ba goga mo tseleng; le fa e le mosipuri wa molelo bosigo, go ba naya lesedi, le go ba kaela tsela e ba tshwanetseng go tsamaya mo go yone. ₂₀Le gone wa ba naya mowa wa gago o o molemo go ba ruta, wa se ka wa ikeola letsogo go ba naya mana a gago mo ganong la bone, wa ba wa ba naya metsi go tima lenyora la bone. ₂₁Ee, wa ba otla ka dinyaga di le 40 mo nageng, ba se ka ba tlhoka sepe; diaparo tsa bone ga di a ka tsa onala, le dinao tsa bone ga di a ka tsa ruruga.

₂₂“Gape wa ba naya magosi le ditšhaba, wa ba baya mo dikabelong tsotlhe tsa bone tsa lefatshe; ba rua lefatshe la ga Sihone, e bong lefatshe la kgosi ya Hešebone, le lefatshe la ga Oge kgosi ya Bašane. ₂₃Bana ba bone le bone wa ba ntsifatsa jaaka dinaledi tsa legodimo, wa ba lere mo lefatsheng le o kileng wa bua le borraabo ka ga lone, wa re ba tlaa tsena mo go lone ba ya go le rua. ₂₄Jalo bana ba tsena, ba rua lefatshe; wa fenya banni ba lefatshe fa pele ga bone, e bong Bakanana, wa ba tsenya mo diatleng tsa bone ka dikgosi tsa bone, le ka ditšhaba tsa lefatshe, gore ba dire ka bone ka fa ba ratang ka gone. ₂₅Ba thopa metse e e thekeleditsweng, le lefatshe le le nonneng, ba rua mantlo a a tletseng dilo tsotlhe tse di molemo, madu a a gabilweng, masimo a mafine, le masimo a matlhware, le ditlhare tse di jewang ka letlotlo; mme ba ja ba kgora, ba nona, ba itumela mo molemong o mogolo wa gago.

₂₆“Le fa go ntse jalo ba nna botlhokakutlo, ba go tsuololela, ba latlhela molao wa gago kwa motlhaneng ga bone, ba bolaya baperofeti ba gago ba ba supang ka ga bone ba ba nyatsa, gore ba ba ba busetse kwa go wena, ba dira dikgakatso tse dikgolo. ₂₇Ke gone ka moo wa ba tsenya mo seatleng sa baba ba bone, mme ba ba patika: e rile mo motlheng wa patikego ya bone, ka ba goela kwa go wena, wa utlwa o le mo legodimong; mme ka mautlwelobotlhoko a gago a le mantsi, wa ba naya bagolodi, ba ba ba golotseng mo seatleng sa baba ba bone.

₂₈“E ne e tle e re ba sena go bona boikhutso, ba be ba dire bosula fa pele ga gago gape: ke gone ka moo o ne wa ba tlogela mo seatleng sa baba ba bone, mme ba dira le taolo mo go bone. Le fa go ntse jalo, e ne e re ba boa, ba go lelela, o ba utlwe o le mo legodimong; wa ba golola gantsi ka fa mautlwelongbotlhoko a gago.

₂₉“Wa supa ka ga bone ka go ba nyatsa, gore o tle o ba busetse kwa molaong wa gago; le fa go ntse jalo ba dira ka boikgodiso fela, ba se ka ba reetsa ditaolo tsa gago, ba leofela dikatlholo tsa gago, (tse e ka reng fa motho a di dira o tlaa tshela mo go tsone,) ba kgotha lerudi, ba ithatafatsa thamo, ba gana go utlwa. ₃₀Le fa go ntse jalo wa iphapaanya nabo ka dinyaga di le dintsi, wa supa ka ga bone ka go ba nyatsa ka mowa wa gago ka baperofeti ba gago. Mme ba gana go sekega tsebe; ke gone ka moo o ne wa ba tsenya mo seatleng sa ditšhaba tsa mafatse. ₃₁Mo mautlwelongbotlhoko a gago a mantsintsi ga o a ka wa ba feletsa ruri, le fa e le go ba latlha; gonne o Modimo o o pelotshweu le boutlwelobotlhoko.

₃₂“Ke gone jaana, Modimo wa rona, o mogolo, o o thata, Modimo o o boitshegang, o o tshegetsang kgolagano le boutlwelobotlhoko, ka re: A tapisego yotlhe e e tsileng mo go rona, le mo dikgosing tsa rona, le mo dikgosaneng tsa rona, mo baperesiting ba rona, le mo baperofeting ba rona, le mo go borraetsho, le mo bathong botlhe ba gago, go simolola ka motlha wa dikgosi tsa Asiria go tla motlheng wa gompieno, a e se nne jaaka ekete e ka nna potlana fa pele ga gago. ₃₃Le fa go ntse jalo o tshiamo mo go tsotlhe tse di tsileng mo go rona; gonne o dirile ka boammaaruri, rona re dirile ka boikepo. ₃₄Le gone dikgosi tsa rona, le dikgosana tsa rona, le baperesiti ba rona, le fa e le borraetsho, ga ba a tshegetsa molao wa gago, le fa e le go reetsa ditaolo tsa gago le ditshupo tsa gago, tse o ne wa supa ka ga bone ka tsone wa ba nyatsa. ₃₅Gonne ga ba a go direla mo bogosing jwa bone, le fa e le mo molemong wa gago o mogolo o o ne wa o ba naya, le fa e le mo lefatsheng le legolo le le le nonneng, le o ne wa le ba naya, le gone ga ba a ka ba fapoga ditiro tsa bone tsa boikepo.

₃₆“Bona, re batlhanka fela gompieno, mme ka ga lefatshe le o ne wa le naya borraetsho go tla ba ja loungo lwa lone le molemo wa lone, bona, re batlhanka fela mo go lone. ₃₇Dikgosi tse o di tlhomileng mo godimo ga rona ka ntlha ya maleo a rona, le ntshetsa tsone totafalo e kgolo; gape di na le thata le mo mebeleng ya rona, le mo dikgomong tsa rona, ka fa di ratang ka gone, mme re mo pitlaganong e kgolo.

₃₈“Fela ka ntlha ya dilo tsotlhe tse, re dira kgolagano e e tlhomameng fela, re a e kwala; mme dikgosana tsa rona, le Balefi ba rona, le baperesiti ba rona, ba e baya sekano.”