DIPALO 13

₁Jehofa a bua le Moše, a re: ₂“Roma banna ba ye go tlhola lefatshe la Kanana le ke le nayang bana ba Iseraele. A go rongwe monna a le mongwe fela wa lotso longwe le longwe lwa borra ba bone, mongwe le mongwe e le kgosana mo go bone.” ₃Moše a ba roma ba tswa mo nageng ya Parane ka fa taolong ya ga Jehofa; botlhe e le batho ba e leng ditlhogo tsa bana ba Iseraele. ₄Maina a bone ke a: Wa lotso lwa ga Rubene e ne e le Shamua morwa Sakure; ₅wa lotso lwa ga Simeone e le Shafate morwa Hori, ₆wa lotso lwa ga Juta e le Kalebe morwa Jefune, ₇wa lotso lwa ga Isakare e ne e le Igale morwa Josefe; ₈wa lotso lwa ga Eferaime e ne e le Hosea morwa Nune, ₉wa lotso lwa ga Benjamine e ne e le Paleti morwa Rafu, ₁₀wa lotso lwa ga Sebulone e ne e le Gadiele morwa Sodi, ₁₁wa lotso lwa ga Josefe, e bong wa lotso lwa ga Manase, e le Gadi morwa Susi, ₁₂wa lotso lwa ga Dane e ne e le Amiele morwa Gemali, ₁₃wa lotso lwa ga Ašere e ne e le Sethure morwa Mikaele, ₁₄wa lotso lwa ga Nafetali e ne e le Nabi morwa Fofasi, ₁₅wa lotso lwa ga Gate e ne e le Guele morwa Maki. ₁₆Ke one maina a banna ba Moše o ne a ba roma ba ya go tlhola lefatshe. Moše a raya Hosea morwa Nune leina a re, Jošua.

₁₇Moše a ba roma ba ya go tlhola lefatshe la Kanana, mme a ba raya a re: “Lo tlhatloge ka tsela e, ya Borwa, mme lo tlhatlogele mo dithabeng. ₁₈Lo bone lefatshe gore le ntse jang; le batho ba ba agileng teng, gore a ba thata, kgotsa ba bokoa, a ba babotlana, kgotsa ba bantsi. ₁₉Le lefatshe le ba agileng mo go lone, gore le ntse jang: a le molemo kgotsa le bosula; le metse e ba agileng mo go yone, gore e ntse jang: a ba agile mo megopeng, kgotsa mo dikagong tse di thata. ₂₀Le lefatshe gore le ntse jang: a le na le monono kgotsa bokodue, a le na le ditlhare kgotsa nnyaa. Mme lo nne pelokgale, lo tle lo tshotse maungo a lefatshe.” Lobaka ya bo e le lobaka lwa mabutswapele a mefine.

₂₁Jalo ba tlhatloga, ba tlhola lefatshe go simolola ka naga ya Tsine go ya kwa Rehobe, go ya botsenong jwa Hamathe. ₂₂Ba tlhatloga ka fa ntlheng ya Borwa, ba tla mo Heberone; bo-Ahimane le Shešai le Talemai, bana ba ga Anake, ba bo ba le gone. (Jaana Heberone o ne a agilwe dinyaga di supa pele ga Soane o o mo Egepeto.) ₂₃Ba fitlha mo molatšaneng wa Ešekole, ba kgaola gona kala e e nang le lerose le lengwe fela la loungo lwa mofine, ba le sikara ka thobane ba le babedi; le gone ba tshola digaranate le difeige. ₂₄Felo foo go ne go bidiwa molatšana wa Ešekole ka ntlha ya lerose le bana ba Iseraele ba le kgaotseng gone.

₂₅Ba hulara kwa go tlholeng lefatshe go sena go feta malatsi a le 40. ₂₆Ba tsamaya ba fitlha kwa go Moše le kwa go Arone, le mo phuthegong yotlhe ya bana ba Iseraele, mo nageng ya Parane, kwa Kateše; ba tla le lefoko kwa go bone, le kwa phuthegong yotlhe, mme ba ba supetsa loungo lwa lefatshe. ₂₇Ba ba kakanyetsa ba re: “Re ile ra fitlha mo lefatsheng le o re romileng kwa go lone; ruri le ela maši le dinotshe; lo ke lone loungo lwa lone. ₂₈Le fa go ntse jalo batho ba ba agileng mo lefatsheng leo ba thata, le metse e thekeleditswe ka dithako, e bile e megolo thata; gape re bonye bana ba ga Anake teng. ₂₉Baamaleke ba agile mo lefatsheng la Borwa; Bahite, Bajebuse le Baamore ba agile mo dithabeng, le Bakanana ba agile fa lewatleng, ba bile ba bapile le noka ya Joretane.”

₃₀Kalebe a kgaodisa batho fa pele ga Moše a re: “A re tlhatlogeng ka bonako re yeng go le rua, gonne re nonofile sentle fela go le fenya.” ₃₁Banna ba ba neng ba tlhatlogile nae ba re: “Ga re a nonofa go ya go tlhabana le batho bao, gonne ba thata bogolo go rona.” ₃₂Lefatshe le ba tswang go le tlhola ba le bolela ka bosula mo baneng ba Iseraele ba re: “Lefatshe le re le raletseng re le tlhola, ke lefatshe le le kometsang banni ba lone; batho botlhe ba re ba bonyeng mo go lone ke batho ba ba godileng thata. ₃₃Le mekaloba re e bonye gone, bana ba ga Anake, ba ba tswang mo go bone mekaloba; mme mo ponong ya rona ka rosi ra bo re ntse jaaka tsiakgope fela, le mo ponong ya bone re ne re ntse jalo.”