DIPALO 16

₁Jaana Kora morwa Isehare, morwa Kohathe, morwa Lefi, a na le Dathane le Abirame, bomorwa Eliabe, le One morwa Pelethe, bomorwa Rubene, ba tsaya batho, ₂ba nanoga fa pele ga Moše, ba na le bangwe ba bana ba Iseraele, dikgosana tsa phuthego di le 250, ba ba bileditsweng pitsong, e le banna ba ba itsegeng. ₃Ba phuthegela Moše le Arone, ba ba raya ba re: “Lo inaya mo gogolo bobe, e tswa ba phuthego botlhe ba itshepile, mongwe le mongwe wa bone, Jehofa o mo go bone. Ke ka ntlha yang fa lo ikgodisa lo ipaya kwa godimo ga phuthego ya ga Jehofa?” ₄E rile Moše a utlwa, a wela ka sefatlhogo fa fatshe, ₅a bua le Kora le lekoko lotlhe la gagwe, a re: “E tlaa re ka moso Jehofa o tlaa supa ba e leng ba gagwe, le yo o leng boitshepo o tlaa mo atametsa kwa go ene, e bong ene yo o tlaa mo itshenkelang, o tlaa mo atametsa kwa go ene. ₆Dirang jaana, lo tseye mabeyana, Kora le lekoko lotlhe la gagwe. ₇Lo tsenye molelo mo go one, lo beye maswalo mo go one fa pele ga Jehofa ka moso. Go tlaa diragala gore motho yo Jehofa o mo itshenkelang, ene o tlaa nna boitshepo; lo inaya mo gogolo bobe, lona bomorwa Lefi.” ₈Moše a raya Kora a re: “Utlwang, lona bomorwa Lefi, ₉a lo fitlhela e le selo se sennyennyane fa e bo ne ne Modimo wa Iseraele, o lo lomolotse mo phuthegong ya Iseraele, go lo atametsa fa go one, go tla lo dira tirelo ya motlaagana wa ga Jehofa le go ema fa pele ga phuthego go ba direla; ₁₀le gore o go atameditse, wena le bomorwao botlhe, bomorwa Lefi? A lo batla le jone boperesiti? ₁₁Ke gone ka fa wena le lekoko lotlhe la gago lo phuthegetseng Jehofa ka gone, go tlhabana nae; Arone e be e le mang fa lo mo ngongoregela jaana?”

₁₂Moše a roma a ya go bitsa Dathane le Abirame bomorwa Eliabe, mme ba re: “Re gana go ya koo. ₁₃A ke selo se sennyennyane fa o re tlhatlositse kwa lefatsheng le le elang maši le dinotshe, go tla go re bolaela mo nageng, fa e bo ne ne o bile o itira kgosana mo go rona jaana? ₁₄Gape, ga o a re fitlhisa mo lefatsheng le le elang maši le dinotshe, le gone ga o a re naya boswa jwa matlhagare le masimo a mafine. A o itshoketse go re tsietsa? Ga re ye koo.”

₁₅Moše a nna bogale thata, mme a raya Jehofa a re: “O se ka wa tlhokomela tshupelo ya bone; ga ke a ba tseela le fa e le esela e le nngwe fela, le gone ga ke a utlwisa ope wa bone botlhoko.” ₁₆Moše a raya Kora a re: “Wena le phuthego yotlhe ya gago lo nne fa pele ga Jehofa ka moso, wena, le bone, le Arone. ₁₇Mongwe le mongwe a tseye lobeyana lwa gagwe, lo bo lo beye maswalo mo go one; motho mongwe le mongwe a tle fa pele ga Jehofa a tshotse lobeyana la gagwe, mabeyana a le 250, le wena le Arone, mongwe le mongwe a tle le lobeyana la gagwe.” ₁₈Mongwe le mongwe a tsaya lobeyana lwa gagwe, ba baya molelo mo go one, ba ba ba baya maswalo mo go one, mme ba ema fa mojakong wa mogope wa bophuthegelo; ba na le Moše le Arone. ₁₉Kora a phuthela phutego yotlhe fa mojakong wa mogope wa bophuthegelo; mme kgalalelo ya ga Jehofa ya bonalela phuthego yotlhe.

₂₀Jehofa a bua le Moše le Arone a re: ₂₁“Itomololeng mo phuthegong e, gore ke tle ke ba nyeletse ka ponyo ya leitlho.” ₂₂Mme ba wela fa fatshe ka difatlhogo ba re: “Ao! Modimo, Modimo wa mewa ya nama yotlhe, a motho o tlaa leofa a le mongwe fela, mme wa nna bogale le phuthego yotlhe?” ₂₃Jehofa a bua le Moše, a re: ₂₄“Bua le phuthego o re: ‘Tlogang fa motlaaganeng wa ga Kora le Dathane le Abirame.’ ”

₂₅Moše a nanoga a ya kwa go Dathane le Abirame; bagolwane ba Iseraele ba mo sala morago. ₂₆A bua le phuthego a re: “Ke a lo rapela, tlogang fa megopeng ya batho ba ba ba bosula, lo se ameng sepe sa bone, lo ka tla lwa nyelediwa mo dibeng tsotlhe tsa bone.” ₂₇Jalo ba tloga fa motlaaganeng wa ga Kora le Dathane le Abirame, ba tswa ka ntlha tsotlhe; Dathane le Abirame ba ema fa mejakong ya megope ya bone, le basadi ba bone, le bomorwaa bone, le banyana ba bone. ₂₈Moše a re: “Lo tlaa itse ka se, fa Jehofa a nthomile gore ke tle go dira ditiro tse tsotlhe, gonne ga ke a di dira e le mogopolo wa me fela. ₂₉E tlaa re fa batho ba, ba ka swa loso lwa batho botlhe, kgotsa fa ba lekolwa ka tekolo ya batho botlhe, foo Jehofa o tlaa bo a sa nthoma. ₃₀Mme fa Jehofa a dira selo se seša, fa lefatshe le atlhamologa molomo, le ba kometsa, le tsotlhe tse ba nang natso, mme ba wela mo moleteng ba ntse ba utlwa, foo lo tlaa tlhaloganya fa batho ba ba nyaditse Jehofa.”

₃₁Ga dirala ya re a sena go wetsa go bua mafoko otlhe a, lefatshe la phatloga fa tlase ga bone. ₃₂Lefatshe la atlhamologa molomo, la ba kometsa, le ba matlo a bone, le batho botlhe fela ba ga Kora, le dithoto tsa bone tsotlhe fela. ₃₃Jalo bone ba na le tsotlhe tse e leng tsa bone ba wela mo moleteng ba ntse ba utlwa; lefatshe la ba khurumetsa, ba nyelela ba tswa mo phuthegong. ₃₄Baiseraele botlhe ba ba mo tikologong ya bone ba tshaba ka go gala ga bone, gonne ba re: “Lefatshe le ka tla la re kometsa.” ₃₅Ga tswa molelo mo go Jehofa wa laila banna ba ba 250, ba ba isitseng maswalo ao.

₃₆Jehofa a bua le Moše a re: ₃₇“Bua le Eleasare morwa Arone moperesiti gore a tseye mabeyana mo phisong, wena o phatlalaletse molelo kwa kgakala; gonne a boitshepo; ₃₈e bong mabeyana a baleofi ba, ba ba leofetseng matshelo a bone, mme a a thulwe a nne dimatla tsa go manega sebeso, gonne ba a isitse fa pele ga Jehofa, ke gone a leng boitshepo: a tlaa nna sesupo mo baneng ba Iseraele.” ₃₉Eleasare moperesiti a tsaya mabeyana a kgotlho, a bone ba ba fisitsweng ba a isitseng; ba a thula dimatla tsa go manega sebeso, ₄₀gore e nne segopodiso mo baneng ba Iseraele, e le gore ope o sele yo o seng wa losika lwa ga Arone a se atamele a ya go fisa maswalo fa pele ga Jehofa, gore a se ka a nna jaaka Kora le jaaka lesomo la gagwe, jaaka Jehofa a buile nae ka seatla sa ga Moše.

₄₁E rile ka moso phuthego yotlhe ya bana ba Iseraele ya ngongoregela Moše le Arone ba re: “Lo bolaile batho ba ga Jehofa.” ₄₂Ga dirala ya re phuthego e phuthegetse Moše le Arone ba leba kwa mogopeng wa bophuthegelo, mme bonang leru la bo le o bipile le kgalalelo ya ga Jehofa ya bonala. ₄₃Moše le Arone ba tla fa pele ga mogope wa bophuthegelo. ₄₄Jehofa a bua le Moše a re: ₄₅“Tlhatlogang mo phuthegong e gore ke tle ke ba nyeletse ka ponyo ya leitlho.” Ba wela fa fatshe ka difatlhogo. ₄₆Moše a raya Arone a re: “Tsaya lobeyana la gago o tsenye molelo o o tswang mo sebesong mo go lone o lo ise ka bonako kwa phuthegong, o ba direle tetlanyo, gonne go dule bogale kwa go Jehofa, sebetso se simologile.” ₄₇Arone a le tsaya jaaka Moše a buile, a sianela kwa gare ga phuthego, a fitlhela sebetso se simologile mo bathong; a baya maswalo, a direla batho tetlanyo. ₄₈A ema fa gare ga baswi le batshedi, mme sebetso sa emisiwa. ₄₉Jaana ba ba suleng ka sebetso e ne e le 14 700, kwa ntle ga ba ba suleng ka tiro ya ga Kora. ₅₀Arone a boela kwa go Moše kwa mojakong wa mogope wa bophuthegelo, mme sebetso sa emisiwa.