DIPALO 22

₁Bana ba Iseraele ba tloga, ba tlhaolela mo dipaleng tsa Moabe, kwa moseja ga Joretane fa tlase ga Jeriko. ₂Balake morwa Sipore a bona gotlhe mo Iseraele o go diretseng Baamore. ₃Moabe a boifa batho bao thata, ka ba le bantsi; mme Moabe a pitlagana ka ntlha ya bana ba Iseraele. ₄Moabe a raya bagolwane ba Midiane, a re: “Jaanong bontsi jo bo tlaa lakaila gotlhe mo go mo tikologong ya rona, jaaka kgomo e tle e lakaile bojang jwa naga.” Balake morwa Sipore e ne e le ene kgosi ya Moabe ka lobaka loo. ₅Mme a roma barongwa kwa go Balaame morwa Beore, kwa Pethore, o o fa Nokeng, kwa lefatsheng la bana ba batho ba ga gabo, ba ya go mmitsa, ba re: “Bona, go na le batho ba ba tswang kwa Egepeto; bona, ba khurumeditse lefatshe, ba ntse bolebagana le nna; ₆ke a go rapela, o tlo o tle jaana, o mphutsetse batho ba, gonne ba nonofile bobe bogolo go nna, e tlaa re gongwe ke ba fenye, ke ba kgemethe, ke ba leleke mo lefatsheng, gonne ke a itse go re yo o mo segofatsang o segofetse, mme yo o mo hutsang o hutsegile.”

₇Bagolwane ba Moabe le bagolwane ba Midiane ba tsamaya ba tshotse tuelo ya go laola ka bola, mme ba ya ba fitlha kwa go Balaame, ba bua nae mafoko a ga Balake. ₈A ba raya a re: “Lalang mono bosigo jono, ke tlaa ba ke lo leretse lefoko gape jaaka Jehofa a tlaa bua le nna; mme dikgosana tsa Moabe tsa nna kwa go Balaame.” ₉Modimo wa tla kwa go Balaame wa re: “Batho ba o nang nabo ke bomang?” ₁₀Balaame a raya Modimo a re: “Balake morwa Sipore kgosi ya Moabe, o romile batho kwa go nna a re: ₁₁‘Bona, batho ba ba tswang Egepeto ba khurumeditse lefatshe; jaana ntlo o ba mphutsetse, e tlaa re gongwe ke nonofele go tlhabana nabo le go ba leleka.’ ” ₁₂Modimo wa raya Balaame wa re: “O se ka wa ya nabo; o se ka wa hutsa batho bao, gonne ba segofetse.” ₁₃Balaame a tsoga mo mosong, mme a raya dikgosana tsa ga Balake a re: “Tlogang lo yeng lefatsheng la ga lona; gonne Modimo o ganne go nnaya tsela go ya le lona.” ₁₄Dikgosana tsa Moabe tsa nanoga tsa tla kwa go Balake tsa re: “Balaame o ganne go tla le rona.” ₁₅Balake a fela a roma dikgosana gape di le dintsi, e le tse di tlotlegang bogolo go tsele. ₁₆Tsa fitlha kwa go Balaame tsa mo raya tsa re: “Balake morwa Sipore o bua jaana a re: ‘A ko o se kgorelediwe ke sepe go tla kwano go nna, ₁₇gonne ke tlaa go godisetsa kwa tlotlong e kgolo; le fa e le eng se o tlaa se buang le nna ke tlaa se dira; a ko o tle fela, o mphutsetse batho ba.’ ” ₁₈Balaame a ba fetola, a raya batlhanka ba ga Balake, a re: “Le fa Balake a ka nnaya ntlo ya gagwe e tletse selefera le gouta, ga nkake ka tlola lefoko la ga Jehofa Modimo wa me, ka ya go dira se se le tlhaelang kgotsa se se le fetang. ₁₉Jaana ke a lo rapela, lo bo lo lale mono, gore ke tle ke itse se Jehofa o tlaa felang a se bua le nna.” ₂₀Modimo wa tla kwa go Balaame bosigo wa mo raya wa re: “E tlaa re fa banna bao ba tsile go go bitsa, o nanoge o ye nabo, mme lefoko le ke tlaa le buang nao, ke lone losi le o tlaa le dirang.”

₂₁Balaame a tsoga ka moso a belesa esela ya gagwe, a tsamaya le dikgosana tsa Moabe. ₂₂Bogale jwa Modimo jwa tuka ka a tsamaile; moengele wa ga Jehofa a ikemisa mo tseleng go nna moganetsi wa gagwe. A bo a palame esela ya gagwe, le batlhanka ba gagwe ba le babedi a bile a na nabo. ₂₃Esela ya bona moengele wa ga Jehofa a eme mo tseleng, a tshotse tšhaka a e ekile; esela ya fapoga tsela ya tsena mo lotlhagareng; mme Balaame a ubula esela go e busetsa mo tseleng. ₂₄Foo moengele wa ga Jehofa a ema mo tseleng e e khuti fa gare ga masimo a mafine, go le logora ka fa ntlheng nngwe, le logora ka fa ntlheng e nngwe. ₂₅Esela ya bona moengele wa ga Jehofa, ya ipatikela mo lorakong, ya utlwisa lonao lwa ga Balaame botlhoko ka lorako; mme a e ubula gape. ₂₆Moengele wa ga Jehofa a ya fa pele, a fitlha a ema fa go pitlaganyeng, fa go se nang fa go ka fapogelwang gone ka fa ntlheng ya le legolo kgotsa ya la molema. ₂₇Esela ya bona moengele wa ga Jehofa, mme ya robala Balaame a e palame, mme bogale jwa ga Balaame jwa tuka, a ubula esela ka thobane ya gagwe. ₂₈Jehofa a tumolola molomo wa esela, ya raya Balaame ya re: “Ke go diretseng fa e bo ne ne o nkubutse gararo jaana?”

₂₉Balaame a raya esela a re: “Ke ka gonne o ntshotlile, ke rata ke bo ke tshotse tšhaka, gonne jaana nkabo ke go bolaile.”

₃₀Esela ya raya Balaame, ya re: “A ga ke esela ya gago e o ntseng o mpalama ka malatsi otlhe a botshelo jwa gago, nako e sa ntse e le eno? A ke tlwaetse go go direla jaana?” Mme a re: “Nnya.”

₃₁Foo Jehofa a budulola matlho a ga Balaame, mme a bona moengele wa ga Jehofa a eme mo tseleng, a tshotse tšhaka a e ekile; a ikoba tlhogo, a wela fa fatshe. ₃₂Moengele wa ga Jehofa a mo raya a re: “Ana o ubutse esela ya gago gararo jaana ka ntlha yang? Bona ke tswetse kwano go nna moganetsi, gonne tsela ya gago e kgopo fa pele ga me. ₃₃Esela ya re e mpona ya fapoga gararo fa pele ga me; fa e ka bo e se ka ya mphapoga, ruri nka bo ne ne fano ke bolaile wena, ka rekegela yone.” ₃₄Balaame a raya moengele wa ga Jehofa a re: “Ke leofile, gonne ga ke a ka ka itse fa o eme mo tseleng go nkganela, jaana ka re fa go sa go itumedise, ke tlaa boela kwa morago kwa gae.” ₃₅Moengele wa ga Jehofa a raya Balaame a re: “Ya le banna bao; lefoko le ke tlaa le buang nao ke lone losi le o tlaa le buang.” Balaame a ya le dikgosana tsa ga Balake.

₃₆E rile Balake a utlwa fa Balaame a tsile, a tswa a ya go mo kgatlhantsha kwa motseng wa Moabe o o fa molelwaneng wa Arenone, fela kwa bokhutlong jwa molelwane. ₃₇Balake a raya Balaame a re: “A ga ke a roma ka tlhoafalo ka ya go go bitsa? O ne o sa tleleng kwa go nna? A ruri ga ke a nonofa go go godisetsa kwa tlotlong?” ₃₈Balaame a raya Balake a re: “Bona, ke tsile kwano go wena; a jaana ke na le thata nngwe go bua sengwe? Lefoko le Modimo o le tsenyang mo molomong wa me, ke lone le ke tlaa le buang.” ₃₉Balaame a ya le Balake, ba fitlha kwa Kiriathe-Husothe. ₄₀Balake a tlhaba dikgomo le dinku ditlhabelo, a roma kwa go Balaame, le kwa dikgosaneng tse o nang natso.

₄₁Ga dirala ya re ka moso, Balake a tsaya Balaame, a mo isa kwa mafelong a a tlotlometseng a ga Baale, mme a re a le foo a bona ntlha ya sekhutlo sa batho bale.