DIPALO 29

₁“E re ka kgwedi ya bosupa, ka letsatsi la ntlha la kgwedi, lo nne phuthego e e itshepileng; lo se ka lwa dira tiro epe ya setlhanka fela; ke letsatsi la go letsa dinaka mo go lona. ₂Lo ise tshupelo e e fisiwang ya monko o o monate mo go Jehofa; kgongwana e le nngwe fela, phelefu e le nngwe fela, dikwanyana tse ditonanyana di supa tsa ngwaga wa ntlha tse di se nang bogole; ₃le tshupelo ya tsone ya boupe, setou se se tlhakanyeng le lookwane, kikilokerama di le tharo tsa kgongwana, kikilokerama di le pedi tsa phelefu, ₄le kilokerama e le nngwe fela ya kwanyana nngwe le nngwe ya dikwanyana tse di supang; ₅le podi e tonanyana e le nngwe fela ya tshupelelo ya boleo, go lo direla tetlanyo. ₆E nne kwa ntle ga tshupelo e e fisiwang ya kgwedi e e rogwang; le tshupelo ya yone ya boupe, le tshupelo e e fisiwang ya metlha yotlhe, e na le tshupelo ya yone ya boupe, le tshupelo tsa tsone tse di nowang, ka fa mokgweng wa tsone o o laotsweng, e le monko o o monate, e le tshupelo e e direlwang Jehofa ka molelo.

₇“Ka letsatsi la bosome la kgwedi ya bosupa lo nne phuthego e e itshepileng; lo ipatike mewa; lo se ka lwa dira tiro epe. ₈Lo isetse Jehofa tshupelo e e fisiwang ya monko o o monate: kgongwana e le nngwe fela, phelefu e le nngwe fela, dikwanyana tse ditonanyana di supa tsa ngwaga wa ntlha; di nne di se na bogole mo go tsone; ₉le tshupelo ya tsone ya boupe, setou se se tlhakanyeng le lookwane, dikilokerama di le tharo tsa kgongwana, dikilokerama di le pedi tsa phelefu, ₁₀kilokerama e le nngwe fela ya kwanyana nngwe le nngwe ya dikwanyana tse di supang, ₁₁podi e tonanyana e le nngwe fela ya tshupelelo ya boleo; kwa ntle ga tshupelelo ya boleo ya tetlanyo, le tshupelo e e fisiwang ya metlha yotlhe, le tshupelo ya yone ya boupe, le ditshupelo tsa tsone tse di nowang.

₁₂“Ka letsatsi la lesome le botlhano la kgwedi ya bosupa lo nne phuthego e e itshepileng; lo se ka lwa dira tiro epe ya setlhanka fela, lo direle Jehofa modiro ka malatsi a supa. ₁₃Lo ise tshupelo e e fisiwang, tshupelo e e dirwang ka molelo, e e monko o o monate mo go Jehofa; dikgongwana di le 13, diphelefu di le pedi, dikwanyana tse ditonanyana di le 14 tsa ngwaga wa ntlha; e nne tse di se nang bogole. ₁₄Le tshupelo ya tsone ya boupe, setou se se tlhakanyeng le lookwane, dikilokerama di le tharo tsa kgongwana nngwe le nngwe, ya dikgongwana tse di 13, dikilokerama di le pedi tsa phelefu nngwe le nngwe ya diphelefu tse pedi, ₁₅le kilokerama e le nngwe fela ya kwanyana nngwe le ngwe ya dikwanyana tse di 14, ₁₆le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, le tshupelo ya yone ya boupe, le tshupelo ya yone e e nowang.

₁₇“Ka letsatsi la bobedi lo ise dikgongwana di le 12, diphelefu di le pedi, dikwanyana tse ditonanyana di le 14, tsa ngwaga wa ntlha tse di se nang bogole; ₁₈le tshupelo ya tsone ya boupe, le tshupelo tsa tsone tse di nowang tsa dikgongwana, tsa diphelefu le tsa dikwanyana, ka fa palong ya tsone, ka fa mokgweng o o laotsweng, ₁₉le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, le tshupelo ya tsone ya boupe, le ditshupelo tsa tsone tse di nowang.

₂₀“Ka letsatsi la boraro dikgongwana di le 11, diphelefu di le pedi, dikwanyana tse ditonanyana di le 14 tsa ngwaga wa ntlha, tse di se nang bogole; ₂₁le tshupelo ya tsone ya boupe, le ditshupelo tsa tsone tse di nowang, tsa dikgongwana, tsa diphelefu le tsa dikwanyana, ka fa palong ya tsone, ka fa mokgweng o o laotsweng, ₂₂le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, le tshupelo ya yone ya boupe, le tshupelo ya yone e e nowang.

₂₃“Ka letsatsi la bone dikgongwana di le some, diphelefu di le pedi, dikwanyana tse ditonanyana di le 14, tsa ngwaga wa ntlha, tse di se nang bogole; ₂₄tshupelo ya tsone ya boupe, le ditshupelo tsa tsone tse di nowang, tsa dikgongwana, tsa diphelefu le tsa dikwanyana, ka fa palong ya tsone, ka fa mokgweng o o laotsweng, ₂₅le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, le tshupelo ya yone e e nowang.

₂₆“Ka letsatsi la botlhano dikgongwana di le 9, diphelefu di le pedi, dikwanyana tse ditonanyana di le 14, tsa ngwaga wa ntlha, tse di se nang bogole; ₂₇le tshupelo ya tsone ya boupe, le ditshupelo tsa tsone tse di nowang, tsa dikgongwana, tsa diphelefu le tsa dikwanyana, ka fa palong ya tsone, ka fa mokgweng o o laotsweng, ₂₈le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, le tshupelo ya yone ya boupe, le tshupelo ya yone e e nowang.

₂₉“Ka letsatsi la borataro dikgongwana di le 8, diphelefu di le pedi, dikwanyana tse ditonanyana di le 14 tsa ngwaga wa ntlha, tse di se nang bogole; ₃₀le tshupelo ya tsone ya boupe, le ditshupelo tsa tsone tse di nowang tsa dikgongwana, tsa diphelefu, le tsa dikwanyana, ka fa palong ya tsone, ka fa mokgweng o o laotsweng, ₃₁le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, tshupelo ya yone ya boupe, le ditshupelo tsa yone tse di nowang.

₃₂“Ka letsatsi la bosupa dikgongwana di supa, diphelefu di le pedi, dikwanyana tse ditonanyana di le some le bone, tsa ngwaga wa ntlha, tse di se nang bogole; ₃₃le tshupelo ya tsone ya boupe, le ditshupelo tsa tsone tse di nowang tsa dikgongwana, tsa diphelefu, le tsa dikwanyana, ka fa palong ya tsone, ka fa mokgweng o o laotsweng, ₃₄le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, tshupelo ya yone ya boupe, le tshupelo ya yone e e nowang.

₃₅“Ka letsatsi la 8 lo nne phuthego e e masisi: lo se ka lwa dira tiro epe ya setlhanka fela, ₃₆mme lo tlaa isa tshupelo e e fisiwang, tshupelo e e dirwang ka molelo, ya monko o o monate mo go Jehofa: kgongwana e le nngwe fela, phelefu e le nngwe fela, dikwanyana tse ditonanyana di supa tsa ngwaga wa ntlha, tse di se nang bogole; ₃₇tshupelo ya tsone ya boupe, le ditshupelo tsa tsone tse di nowang tsa kgongwana, tsa phelefu, le tsa dikwanyana, di nne ka fa palong ya tsone, ka fa mokgweng o o laotsweng; ₃₈le podi e tonanyana e le nngwe fela ya tshupelelo ya boleo; kwa ntle ga tshupelo e e fisiwang ya metlha yotlhe, le tshupelo ya yone ya boupe, le tshupelo ya yone e e nowang.

₃₉“Tse, lo di isetse Jehofa mo medirong ya lona e e tlhomilweng, kwa ntle ga maikano a lona, le ditshupelo tsa lona tsa peleego, e le ditshupelo tsa lona tse di fisiwang, le ditshupelo tsa lona tsa boupe, le ditshupelo tsa lona tse di nowang, le ditshupelo tsa lona tsa kagiso.”

₄₀Mme Moše a bolelela bana ba Iseraele gotlhe ka fa Jehofa o di laoletseng Moše ka teng.