DIPALO 33

₁Tse ke ditshetsa tsa bana ba Iseraele fa ba tswa mo lefatsheng la Egepeto ka masomosomo a bone, ba le mo taolong ya ga Moše le Arone. ₂Moše a kwala mabololo a bone ka fa dikhudugong tsa bone ka taolo ya ga Jehofa; mme tse ke dikhudugo tsa bone ka fa mabololong a bone. ₃Ba ne ba bolotse mo Ramesese ka kgwedi ya ntlha, ka letsatsi la 15 la kgwedi ya ntlha, e rile go le ka moso, go letse go le tlolaganyo, bana ba Iseraele ba tswa ka letsogo le le tsholetsegileng mo ponong ya Baegepeto botlhe. ₄Baegepeto bone ba sa ntse ba fitlha batsalwapele botlhe ba bone, ba Jehofa o ba laitseng mo go bone; medimo ya bone, le yone, Jehofa a e sekisitse.

₅Bana ba Iseraele ba tloga mo Ramasese, ba ya ba tlhoma mo Sukothe. ₆Ba tloga mo Sukothe, ba ya ba thibelela mo Ethame, o o fa ntlheng ya bogole jwa naga. ₇Ba tloga mo Ethame, ba boela kwa Pihahirothe o o fa pele ga Baalesefone, mme ba thibelela fa pele ga Migetole. ₈Ba tloga fa pele ga Hahirothe, ba ralala lewatle ba ya ba tsena mo nageng, ba tsamaya loeto lwa malatsi a le mararo mo nageng ya Ethame, mme ba thibelela mo Mara. ₉Ba tloga mo Mara, ba fitlha mo Elime; mo Elime go ne go le metswedi ya metsi e le 12, le ditlhare tsa makolane di le 70; mme ba thibelela gone. ₁₀Ba tloga mo Elime, ba thibelela fa Lewatleng le Lehihidu. ₁₁Ba tloga fa Lewatleng le Lehibidu, ba ya ba thibelela mo nageng ya Sine. ₁₂Ba tloga mo nageng ya Sine, ba thibelela mo Dofeka. ₁₃Ba tloga mo Dofeka, ba thibelela mo Aluše. ₁₄Ba tloga mo Aluše, ba thibelela mo Refidime, kwa go ne go se na metsi a a ka nowang ke batho gone. ₁₅Ba tloga mo Refidime, ba thibelela mo nageng ya Sinai. ₁₆Ba tloga mo nageng ya Sinai, ba thibelela mo Kiberothe-taafa. ₁₇Ba tloga mo Kiberothe-taafa, ba thibelela mo Haserothe. ₁₈Ba tloga mo Haserothe, ba thibelela mo Rithema. ₁₉Ba tloga mo Rithema, ba thibelela mo Rimone-perese. ₂₀Ba tloga mo Rimone-perese, ba thibelela mo Libena. ₂₁Ba tloga mo Libena, ba thibelela mo Risa. ₂₂Ba tloga mo Risa, ba thibelela mo Kehelatha. ₂₃Ba tloga mo Kehelatha ba thibelela mo thabeng ya Shefere. ₂₄Ba tloga mo thabeng ya Shefere, ba thibelela mo Harata. ₂₅Ba tloga mo Harata, ba thibelela mo Makhelothe. ₂₆Ba tloga mo Makhelothe, ba thibelela mo Tabathe. ₂₇Ba tloga mo Tahathe, ba thibelela mo Tera. ₂₈Ba tloga mo Tera, ba thibelela mo Mitheka. ₂₉Ba tloga mo Mitheka, ba thibelela mo Hašemona. ₃₀Ba tloga mo Hašemona, ba thibelela mo Moserothe. ₃₁Ba tloga mo Moserothe, ba thibelela mo Benejaakane. ₃₂Ba tloga mo Benejaakane ba thibelela mo Hore-hagitegate. ₃₃Ba tloga mo Hore-hagitegate ba thibelela mo Jotebatha. ₃₄Ba tloga mo Jotebatha, ba thibelela mo Aberona. ₃₅Ba tloga mo Aberona, ba thibelela mo Esione-gebere. ₃₆Ba tloga mo Esione-gebere, ba thibelela mo nageng ya Tsine (ke gore Kateše). ₃₇Ba tloga mo Kateše, ba thibelela mo thabeng ya Hore, ka fa ntlheng ya lefatshe la Etome.

₃₈Arone moperesiti a tlhatlogela mo thabeng ya Hore ka taolo ya ga Jehofa, a swela gone, e le ngwaga wa 40 bana ba Iseraele ba sena go tswa mo lefatsheng la Egepeto, ka kgwedi ya botlhano, ka letsatsi la ntlha la kgwedi. ₃₉E rile Arone a swela mo thabeng ya Hore a bo a le dinyaga di le 123.

₄₀Mme Mokanana, kgosi ya Arate, yo o neng a potile lefatshe la Kanana ntlheng ya borwa, a utlwelela go tla ga Baiseraele.

₄₁Ba tloga mo thabeng ya Hore, ba thibelela mo Salemona. ₄₂Ba tloga mo Salemona, ba thibelela mo Punone. ₄₃Ba tloga mo Punone, ba thibelela mo Obothe. ₄₄Ba tloga mo Obothe, ba thibelela mo Iye-abarime, mo molelwaneng wa Moabe. ₄₅Ba tloga mo Iyime, ba thibelela mo Dibone-gate. ₄₆Ba tloga mo Dibone-gate, ba thibelela mo Alemone-dibelathaime. ₄₇Ba tloga mo Alemone-dibelathaime, ba thibelela mo nageng ya Abarime fa pele ga Nebo. ₄₈Ba tloga mo nageng ya Abarime, ba thibelela mo dipaleng tsa Moabe fa Joretane kwa Jeriko. ₄₉Ba thibelela fa Joretane go simolola kwa Bethe-ješimothe go ya kwa Abele-šitime mo dipaleng tsa Moabe.

₅₀Jehofa a bua le Moše mo dipaleng tsa Moabe, fa Joretane kwa Jeriko a re: ₅₁“Bua le bana ba Iseraele, o ba reye o re: Lo tlaa re lo kgabaganya Joretane lo ya mo fatsheng la Kanana, ₅₂foo lo leleke banni botlhe ba lefatshe fa pele ga lona, lo senye maje a bone otlhe a a tshwantsheditseng, lo bo lo senye ditshwantsho tsa bone tsotlhe tse di thetsweng, lo nyeletse mafelo otlhe a bone a a tlotlometseng; ₅₃lo itseele lefatshe, lo age mo go lone, gonne lefatshe ke le neile lona go le rua. ₅₄Lo rue lefatshe ka taolo ya bola, ka fa ditshikeng tsa lona; ba ba leng bantsi lo ba neye boswa bo le bogolo, ba ba leng bannye lo ba neye boswa bo le bonnye; kwa bola bo laolelang motho gone, e nne gone ga gagwe; lo rue ka fa ditsong tsa borraeno. ₅₅E tlaa re fa lo gana go leleka banni ba lefatshe fa pele ga lona, foo ba lo ba lesang ba sala ba tlaa nna jaaka dibabi mo matlhong a lona, le jaaka mitlwa mo ditlhakoreng tsa lona, ba tlaa lo tshwenya mo lefatsheng le lo agang mo go lone. ₅₆Go tlaa dirala gore jaaka ke ne ke gopotse go ba direla ke tlaa direla lona fela jalo.”