DIPALO 35

₁Jehofa a bua le Moše mo dipaleng tsa Moabe fa Joretane, kwa Jeriko, a re: ₂“Laola bana ba Iseraele gore ba ntshetse Balefi mo bosweng jwa dithuo tsa bone metse e ba tlaa agang mo go yone, le dintlhana tsa metse eo lo di neye Balefi. ₃Metse eo, a e nne ya bone go aga mo go yone; dintlhana tsa yone e nne tsa dikgomo tsa bone, le tsa dithoto tsa bone, le tsa diruiwa tsotlhe tsa bone. ₄Boatlhamo jwa dintlhana tsa metse e lo e nayang Balefi a bo simologe ka lorako lwa motse, bo ye go ema ka selekanyo sa dimetara di le 450 ka ntlha tsotlhe. ₅E re kwa ntle ga motse, ntlheng ya botlhabatsatsi lo lekanye sebaka sa dimetara di le 900, ntlheng ya borwa, sebaka sa dimetara di le 900, ntlheng ya bophirimatsatsi, sebaka sa dimetara di le 900, ntlheng ya botsheka, sebaka sa dimetara di le 900, motse o le fa gare. Tseo e tlaa nna tsone dintlhana mo tikologong ya metse ya bone. ₆Metse e lo e nayang Balefi, a e nne yone metse e merataro ya botshabelo, e lo e beelang mmolai wa motho go tshabela kwa go yone; kwa ntle ga yone eo lo ba neye metse e le 42. ₇Metse yotlhe e lo tlaa e nayang Balefi a e nne metse e le 48; lo ba neye yone le dintlhana tikologong ya yone. ₈Ka ga metse e e leng ya bana ba Iseraele e lo tlaa e nayang Balefi, lo tle lo e tseye e le mentsi mo go ba ba leng bantsi; lo tseye e le mebotlana mo go ba ba leng babotlana; mongwe le mongwe a a neye Balefi metse ya gagwe ka fa bosweng jo o bo bonyeng.”

₉Jehofa a bua le Moše, a re: ₁₀“Bua le bana ba Iseraele, o ba reye o re: Mogang lo kgabaganyang Joretane, lo ya mo lefatsheng la Kanana, ₁₁foo lo itaolele metse e e tlaa nnang metse ya botshabelo mo go lona; gore mmolai wa motho, yo o bolayang motho ka matsheka fela, a tshabele gone. ₁₂Metse eo e tlaa nna botshabelo mo go lona ka ga mmusolosi; gore mmolai wa motho a se swe, a ise a eme fa pele ga phuthego go atlholwa. ₁₃Metse e lo tlaa e ntshang e nne merataro ya botshabelo mo go lona. ₁₄Lo ntshe metse e le meraro moseja ono ga Joretane, le metse e le meraro mo lefatsheng la Kanana; e tlaa nna metse ya botshabelo. ₁₅Metse e merataro eo e tlaa nna ya botshabelo jwa bana ba Iseraele, le jwa baeng ba ba jakileng mo go bone, gore mongwe le mongwe yo o bolayang motho ka matsheka fela, a tshabele teng.

₁₆“Fa a mo iteile ka sengwe sa tshipi, mme a swa, ke mmolai wa motho; ruri mmolai wa motho o tlaa bolawa. ₁₇Fa a mo gatlile a tshotse lentswe mo seatleng, e le le motho o ka swang ka lone, mme a swa, ke mmolai wa motho; ruri mmolai wa motho o tlaa bolawa. ₁₈Kgotsa fa a mo iteile ka sebolao sa logong a se tshotse mo seatleng, e le se motho o ka swang ka sone, mme a swa, ke mmolai wa motho; ruri mmolai wa motho o tlaa bolawa. ₁₉Mmusolosi ka esi a bolaye mmolai wa motho; mogang o kopanang nae a a mmolaye. ₂₀Fa a mo tlhabile ka kilo, kgotsa a mo konopa, ka go mo lalela, mme a swa, ₂₁kgotsa a mo itaya ka letsogo ka kilo, a swa; ruri yo o mo iteileng o tlaa bolawa; ke mmolai wa motho; a mmusolosetsi wa madi a bolaye mmolai wa motho, mogang o kopanang nae.

₂₂“Mme fa a mo tlhabile ka tshoganetso, a se na kilo, kgotsa fa a mo konopile ka sengwe, a sa mo lalela, ₂₃kgotsa ka lentswe le motho o ka swang ka lone, a sa mmone, a le latlhela mo go ene, mme a swa, le fa a se mmaba wa gagwe, le gone a ne a sa rate go mo utlwisa botlhoko, ₂₄foo a phuthego e atlhole gare ga moitei le mmusolosetsi wa madi ka fa dikatlholong tse: ₂₅Phuthego e golole mmolai wa motho mo seatleng sa mmusolosetsi wa madi, mme phuthego e mmusetse kwa motseng wa gagwe wa botshabelo, kwa o ne a tshabetse teng; a nne gone go tsamaya moperesiti yo mogolo a a swa, ene yo o ne a tlodiwa lookwane lo lo itshepileng. ₂₆Mme fa motlha mongwe mmolai wa motho a ka feta molelwane wa motse wa gagwe wa botshabelo, kwa o ne a tshabetse teng, ₂₇fa mmusolosetsi wa madi a mo fitlhela kwa ntle ga molelwane wa motse wa gagwe wa botshabelo, mme fa mmusolosetsi wa madi a bolaya mmolai wa motho; foo a se ka a nna molato wa madi, ₂₈gonne o ne a tshwanetse go nna fela mo motseng wa gagwe wa botshabelo, go tsamaya moperesiti yo mogolo a swa. Morago ga loso lwa moperesiti yo mogolo, mmolai wa motho o ka boela kwa lefatsheng le e leng la gagwe.

₂₉“Dilo tse di nne molao wa katlholo mo go lona go ya le dikokomana tsotlhe tsa lona mo mannong a otlhe a lona. ₃₀Le fa e le mang yo o bolayang motho, mmolai o tlaa bolawa ka molomo wa basupi; motho a se ka a swa ka tshupo ya mosupi a le mongwe fela. ₃₁Gape, lo se ka lwa amogela thekololo ka ga botshelo jwa mmolai wa motho yo o molato wa go swa, ruri a a bolawe. ₃₂Lo se ka lwa amogela thekololo ka ga gagwe yo o tshabetseng kwa motseng wa gagwe wa botshabelo, ya gore a tle go ba a nna mo lefatsheng, moperesiti yo mogolo a tle a swe pele. ₃₃Jalo lo bo lo se ketla lo itshepolola lefatshe le lo nnang mo go lone; gonne madi a leswafatsa lefatshe; ga go na tefo e e ka direlwang lefatshe ya madi a a tshololetsweng mo go lone, fa e se madi a gagwe yo o a tsholotseng. ₃₄O se ka wa itshekolola lefatshe le o le nnang, le ke agileng mo gare ga lone; gonne nna Jehofa ke agile mo gare ga bana ba Iseraele.”