DIPALO 36

₁Ditlhogo tsa makgotla a borraabo ba losika lwa bana ba ga Gileate, morwa Makire, morwa Manase, tsa ditshika tsa bomorwa Josefe, tsa atamela, tsa bua fa pele ga Moše le fa pele ga dikgosana, e bong ditlhogo tsa makgotla a borraabo mo baneng ba Iseraele. ₂Ba re: “Jehofa o laotse morena wa rona gore a neye bana ba Iseraele lefatshe, gore le nne boswa ka taolo ya bola; morena wa rona o ne a laolwa ke Jehofa gore boswa jwa ga Selofehate morwa rraetsho, a bo neye bomorwadie. ₃Mme jaana e tlaa re fa ba nyalwa ke bomorwa ditso tse dingwe tsa bana ba Iseraele, foo boswa jwa bone bo tlaa tlosiwa mo bosweng jwa borraetsho, bo tlhakanngwe le boswa jwa lotso lo ba tseetsweng mo go lone; jalo bo tlosiwe mo taolelong ya boswa jwa rona. ₄E tlaa re Jubile wa bana ba Iseraele o dirala, foo boswa jwa bone bo tlaa tlhakanngwa le boswa jwa lotso lo ba tsenang mo go lone; jalo boswa jwa bone bo tlaa tlosiwa mo bosweng jwa lotso lwa borraetsho.”

₅Mme Moše a laola bana ba Iseraele ka fa lefokong la ga Jehofa, a re: “Ba lotso lwa bana ba ga Josefe ba bua ka tshiamo. ₆Se ke sone se Jehofa o se laolang ka ga bomorwadia Selofehate, a re: ‘A ba nyalwe ke ba ba ba ratang; mme ba nyalwe ke ba losika lwa lotso lwa ga rraabo ba le bosi fela. ₇Jalo ga go ketla go tloga boswa bope jwa bana ba Iseraele mo lotsong longwe jwa ya mo go lo longwe, gonne bana ba Iseraele, mongwe le mongwe o tlaa ngaparela boswa jwa lotso lwa borraagwe. ₈Ngwana wa mosetsana mongwe le mongwe yo o nang le boswa mo lotsong longwe lwa bana ba Iseraele, a a nne mosadi wa mongwe wa losika lwa lotso lwa ga rraagwe, gore bana ba Iseraele, monna mongwe le mongwe a rue boswa jwa borraagwe. ₉Jalo ga go ketla go tloga boswa bope mo lotsong longwe jwa ya mo go lo longwe, gonne mo ditsong tsa bana ba Iseraele mongwe le mongwe o tlaa ngaparela boswa jwa gagwe.’ ”

₁₀Fela jaaka Jehofa a laotse Moše, bomorwadia Selofehate ba dira jalo: ₁₁Gonne Mahela, Tiresa, Hogela, Mileka le Noa, bomorwadia Selofehate, ba nyalwa ke bomorwa bana ba ga rraabo. ₁₂Ba nyalwa ke ba ditshika tsa bomorwa Manase morwa Josefe, boswa jwa bone jwa nna fela mo lotsong lwa losika lwa ga rraabo.

₁₃Tse ke tsone ditaolo le dikatlholo, tse Jehofa o di laoletseng bana ba Iseraele ka seatla sa ga Moše, mo dipaleng tsa Moabe, fa Joretane kwa Jeriko.