DIANE 9

₁Botlhale o agile ntlo ya gagwe, o betlile maotwana a gagwe a supa. ₂O tlhabile dikgomo tsa gagwe; o tlhakantse bojalwa jwa gagwe jwa mofine; o bile o baakantse lomati lwa gagwe lwa bojelo. ₃O romile barweetsana ba gagwe, o kua a tlhatlogile mafelo a a godimodimo mo motseng, a re: ₄“Le fa e le mang yo o sa tlhalefang, a a tsene kwano!” Ka ga gagwe yo o se nang tlhaloganyo, o mo raya a re: ₅“Ntlong lo je senkgwe sa me, lo nwe bojalwa jwa mofine jo ke bo tlhakantseng. ₆Bakelang go dira boeleele, lona ba lo sa tlhalefang, lo tshele; lo sepele mo tseleng ya tlhaloganyo.”

₇Yo o otlhayang mosotli o inaya ditlhong fela; le yo o kgalemelang moikepi o ipaya setshubaba fela. ₈O se ka wa kgalemela mosotli, o ka tla a go ila; kgalemela motho yo o botlhale, mme o tlaa go rata. ₉Naya motho yo o botlhale thuto, mme o tlaa tlhalefa bogolo; ruta motho yo o siameng, mme o tlaa totafala mo thutong.

₁₀Go boifa Jehofa ke tshimologo ya botlhale; go itse Moitshepi ke yone tlhaloganyo. ₁₁Gonne malatsi a gago a tlaa ntsifadiwa ke nna, le dinyaga tsa botshelo jwa gago di tlaa okediwa. ₁₂Fa o le botlhale, o a bo o itlhalefetse; fa o sotla, ke wena wesi o tlaa go belegang.

₁₃Mosadi wa seeleele o tle a phokelele fela; ga a a tlhalefa, ga a itse sepe. ₁₄O tle a dule fa mojakong ga ntlo ya gagwe, mo setulong se se mo mafelong a godimo mo motseng, ₁₅gore a tle a tlhaeletse ba ba fetang, ba ba tlhamaletseng le ditsela tsa bone, a re: ₁₆“Le fa e le mang yo o sa tlhalefang, a a tsene kwano;” mme ka ga gagwe yo o se nang tlhaloganyo, a mo reye a re: ₁₇“Metsi a a utswiwang a monate, le senkgwe se se jelwang mo sephiring se a natefa.” ₁₈Mme monna yo a sa itse fa baswi ba gone; le go re ba o ba laleditseng ba mo matennyeng a Bobipo.