Pesalema 16

₁Ntibela, Modimo;

gonne ke ikanya mo go wena.

₂Ke reile Jehofa ka re:

“O Morena wa me;

ga ke na molemo ope

kwa ntle ga gago.”

₃Ka ga baitshepi

ba ba mo lefatsheng,

ke bone batlotlegi bogolo,

ba go itumela ga me gotlhe

go leng mo go bone.

₄Ba ba ananyang Jehofa

ka modimo o sele,

mahutsana a bone a tla ntsifadiwa;

ditshupelo tsa bone tse di nowang

tsa madi,

ga nketla ke di isa,

le fa e le go umaka maina

a medimo ya bona

ka dipounama tsa me.

₅Jehofa ke kabelo ya boswa jwa me,

le ya senwelo sa me;

o emetse se ke se abetsweng.

₆Melelwane e ntiteetse

mo mafelong a mantle;

ee, ke na le boswa jo bontle.

₇Ke tla baka Jehofa,

yo o nneileng kgakololo;

ee, diphilo tsa me di a nthuta

mo dipakeng tsa bosigo.

₈Ke ntse ke tlhomile Jehofa

fa pele ga me ka gale;

e re ka a le ka fa tsogong la me

le legolo,

ga nketla ke tshikinyega.

₉Ke gone ka mo pelo ya me

e itumelang,

le kgalalelo ya me e ipelang;

nama ya me le yone

e tlaa nna mo polokegong.

₁₀Gonne ga o ketla o tlogelela Bobipo

mowa wa me;

le gone ga o ketla o lesa moitshepi

wa gago a bona

go bola.

₁₁O tlaa ntshupetsa tsela ya botshelo;

fa pele ga gago go na le letlotlo

la boitumelo;

mo seatleng sa gago se segolo

go na le tse di jesang monate

ka bosakhutleng.