Pesalema 21

₁Kgosi e tlaa itumela

mo thateng ya gago Jehofa;

e tlaa ipela mo gogolo jang

mo polokong ya gago!

₂O e neile keletso ya pelo ya yone,

ga o a gana topo ya dipounama

tsa yone. Sela.

₃O e tletse pele ka masego a molemo;

wa baya serwalo sa gouta e e bontle

bogolo mo tlhogong ya yone.

₄E go lopile botshelo, wa e bo naya;

e bong boleele jwa malatsi

ka bosakhutleng le ka bosaengkae.

₅Kgalalelo ya yone e kgolo

mo polokeng ya gago;

o baya tlotlo le borena mo go ene.

₆Gonne o dira gore

a nne sego bogolo thata ka

bosakhutleng; wa mo jesa monate

ka boitumelo fa pele ga gago.

₇Gonne kgosi e ikantse Jehofa;

ka ntlha ya bopelonomi

jwa lorato jwa Mogodimodimo

ga e ketla e tshikinyega.

₈Letsogo la gago

le tlaa phoroma baba botlhe ba gago;

letsogo la gago le legolo

le tlaa phoroma ba ba go ilang.

₉O tlaa ba dira jaaka leiso la mouba

le le molelolelo mo motlheng wa

bogale jwa gago.

Jehofa o tlaa ba kometsa

mo tšhakgalong ya gagwe,

mme molelo o tlaa ba laila

o ba nyeletsa.

₁₀Loungo lwa bone o tlaa lo senya

lo tswa mo lefatsheng,

le losika lwa bone

lo tswa mo baneng ba batho.

₁₁Gonne ba ne ba laotse bosula

ka ga gago;

ba loga maano a ba sa nonofang

go a dirafatsa.

₁₂Gonne o tlaa ba retolola,

o itse go laelela sefatlhogo sa bone

ka megala ya bora jwa gago.

₁₃O nne o goletsege, Jehofa,

ka thata e e leng ya gago;

jalo re tlaa opela,

re ba re baka nonofo ya gago.