Thapelo ya go kaelwa le go sirelediwa
Pesalema ya ga Dafite.
1Ke tsholeletsa mowa wa me
kwa go wena, Jehofa.
2Modimo wa me, ke ikantse mo go
wena, a ke se tlhajwe ke ditlhong,
a baba ba me ba se njele koma.
3Ee, mo go bone
ba ba go lebeletseng,
ga go na ope yo o tlaa tlhajwang
ke ditlhong;
go tlaa tlhajwa ke ditlhong bone
ba ba dirang ka mooko ka bomo.
4Ntshupetsa metlhala ya gago Jehofa;
o nthute ditsela tsa gago.
5Ntsamaisa mo boammaaruring
jwa gago o bo o nthute;
gonne ke wena
Modimo wa poloko ya me;
ke lebelela mo go wena
ka letsatsi lotlhe.
6Jehofa, gakologelwa
mautlwelobotlhoko a gago
a manana,
le mapelonomi a gago a lorato;
gonne a ntse a le gone
e sa le bogologolo.
7O se ka wa gakologelwa
maleo a jale ke sa le lekau,
le fa e le ditlolo tsa me;
o nkgakologelwe ka fa
bopelonoming jwa gago jwa lorato,
ka ntlha ya molemo wa gago Jehofa.
8Jehofa o molemo le thokgamo;
ke gone ka moo o tlaa rutang baleofi
ka ga tsela.
9Ba ba pelonolo o tlaa ba tsamaisa
mo tshiamisong;
ba ba pelonolo o tlaa ba ruta
tsela ya gagwe.
10Ditsela tsotlhe tsa ga Jehofa
di bopelonomi jwa lorato
le boammaaruri fela mo go bone
ba ba bolokang kgolagano ya gagwe
le ditshupo tsa gagwe.
11Ka ntlha ya leina la gago Jehofa,
o tle o itshwarele boikepo jwa me,
gonne bo bogolo.
12Motho ke ofe yo o boifang Jehofa?
Ke ene o tlaa mo rutang
mo tseleng e o tlaa e itshenkelang.
13Mowa wa gagwe o tlaa aga
o iketlile;
losika lwa gagwe lo tlaa rua lefatshe.
14Maoma a ga Jehofa
a na le ba ba mmoifang;
mme o tlaa ba supetsa
kgolagano ya gagwe.
15Matlho a me
a ntse a lebile Jehofa fela ka gale;
gonne o tlaa phamola dinao tsa me
mo lotloeng.
16Retologela kwa go nna,
o nkutlwele botlhoko;
gonne ke swafetse,
ke patikegile.
17Dikhuduego tsa pelo ya me
di goletse pele;
a o ko o nntshe
mo dipitlaganong tsa me.
18Sekaseka patikego ya me
le thekisego ya me;
mme o itshwarele maleo a me otlhe.
19Sekaseka baba ba me,
gonne ba bantsi;
ba nkila ka kilo e e bolalome.
20A ko o dibele mowa wa me,
mme o nkgolole;
a ke se ka ka tlhajwa ke ditlhong,
gonne ke ikanya mo go wena.
21A botlhoka molato le thokgamo
di mpoloke,
gonne ke lebeletse mo go wena.
22Modimo, golola Iseraele,
o mo ntshe mo dikhuduegong
tsotlhe tsa gagwe.
