Pesalema 28

₁Ke tlaa tlhaeleletsa koo go wena,

Jehofa; lefika la me,

o se ka wa ipaya bosusu mo go nna;

e ka tla ya re fa o ntidimaletse,

ka nna jaaka ba ba fologelang

mo moleteng.

₂Utlwa lentswe la mekokotlelo ya me,

mogang ke go kuang,

mogang ke tsholeletsang mabogo

a me kwa felong ga bobuelo

fa go boitshepo ga gago.

₃O se ka wa nkgogolela le baikepi,

le ba ba dirang tshiamololo;

ba ba buang kagiso le ba ga bone,

mme go senya go le mo pelong tsa

bone.

₄Ba neye ka fa tirong ya bone

le ka fa boikepong jwa go diradira

ga bone;

ba neye ka fa go direng ga diatla

tsa bone;

o ba neye tshwanelo ya bone.

₅E re ka ba sa tlhokomele ditiro tsa

ga Jehofa,

le go dira ga diatla tsa gagwe,

o tlaa ba rutlolola,

e seng go ba a ba aga.

₆A go bakwe Jehofa ka a utlwile

lentswe la mekokotlelo ya me.

₇Jehofa ke thata ya me

le thebe ya me;

pelo ya me e ikantse mo go ene,

mme ke thusegile;

ka moo pelo ya me e itumela thata;

mme ke tlaa mmaka ka sefela sa me.

₈Jehofa ke thata ya bone,

e bile ke kago e e thata ya phemelo

ya poloka ya motlodiwa wa gagwe.

₉Boloka batho ba gago,

mme o segofatse boswa jwa gago;

o ba otle le gone, o ba belege

ka bosakhutleng.