Pesalema 30

₁Ke tlaa go godisa Jehofa;

gonne o ntsholeditse,

ga o a ka wa naya baba ba me

gore ba itumele ka nna.

₂Jehofa, Modimo wa me,

ke go ikuetse,

mme o mphodisitse.

₃Jehofa, o tlhatlositse mowa wa me

mo Bobipong;

o ntse o ntshedisitse

gore ke se ka ka fologela mo moleteng.

₄Opelelang Jehofa dipako,

lona baitshepi ba gagwe,

ntshetsang leina la gagwe

le le boitshepo malebogo.

₅Gonne bogale jwa gagwe

bo ema ka ponyo ya leitlho fela;

mo tlhogonolofatsong ya gagwe

go botshelo;

go ka lala go le selelo bosigo,

mme e re ka moso

go bo go tle boitumelo.

₆Ka ga me,

e rile mo go kokotlegeleng ga me,

ke buile, ka re: “Ga nketla

ke ba ke tshikinyega gope.”

₇Wena, Jehofa, ka botsalano jwa gago

o tiisitse thaba ya me gore e eme

e nne thata;

o ne wa iphitlha sefatlhogo;

ka fuduega.

₈Ka kuela koo go wena, Jehofa;

ka isa mekokotlelo kwa go Jehofa.

₉“E tlaa re ke fologela mo moleteng,

madi a me a tlaa bo a na le

molemo ofe?

A lorole lo tlaa go baka?

A lo tlaa bolela boammaaruri

jwa gago?

₁₀Utlwa, Jehofa,

o nkutlwele botlhoko;

Jehofa a e nne wena

mothusi wa me.”

₁₁Selelo sa me o se mphetoletse pino;

o nkapotse letsela la kgetse,

o ntlamile ka boitumelo;

₁₂e le gore kgalalelo ya me

e go opelele pako,

mme e se ka ya didimala.

Jehofa Modimo wa me,

ke tlaa go leboga ka bosakhutleng.