Pesalema 62

₁Mowa wa me

o lebeletse fela mo Modimong;

poloko ya me e tswa mo go one.

₂Ke one osi o e leng lefika la me,

le poloko ya me;

ke one kago ya me

e e godileng ya phemelo;

ga nketla ke tshikinyega thata.

₃Lo tlaa nna lo gagaotla motho

goleele go le kaye,

gore lo tle lo mmolae, lotlhe,

jaaka lomota lo lo obameng,

le jaaka logora lo lo reketlang?

₄Ba gakololana fela go mo diga

mo tlotlomalong ya gagwe;

ba natefelwa ke maaka;

ka molomo ba a segofatsa,

mme mo teng ba hutsake fela. Sela.

₅Mowa wa me,

wena o lebelele mo Modimong fela;

gonne tebelelo ya me

e mo go one fela.

₆Ke one osi lefika la me,

le poloko ya me;

ke one kago ya me e e godileng

ya phemelo;

ga nketla ke tshikinyega.

₇Poloko ya me le kgalalelo ya me

di na le Modimo;

lefika la thata ya me le mo

Modimong, le botshabelo jwa me.

₈Lona batho, ikanyeng mo go one

ka metlha yotlhe;

tshololang dipelo tsa lona

fa pele ga one;

Modimo ke botshabelo jwa rona.

Sela.

₉Ruri ba e leng batho fela ke lefela,

le batho ba e leng bagolwane

ke maaka;

mo selekanyong sa pego

ba tlaa ya kwa godimo;

fa ba le mmogo ba motlhofo

bogolo go tsa lefela.

₁₀Lo se ka lwa ikanya patiko,

lo bo lo se ka lwa thetha ka bogodu;

e re fa mahumo a tota,

lo se ka lwa tlhoma pelo tsa lona

mo go one.

₁₁Modimo o buile gangwe fela,

mo ke go utlwile gabedi;

gore thata ke ya Modimo;

₁₂le gone, Morena,

sa gago ke boutlwelobotlhoko,

ka gobo o naya motho mongwe

le mongwe ka fa tirong ya gagwe.