Pesalema 69

₁Mpoloka Modimo, gonne

metsi a tseneletse mowa wa me.

₂Ke roromela mo morageng o o

boteng, kwa go se nang boemo;

ke fitlhile mo metsing a a boteng,

kwa merwalela e nkhurumetsang

gone.

₃Ke lapisitswe ke go lela ga me;

memetso ya me e phaphaletse;

matlho a me a tlhaela

ka ke lebeletse Modimo wa me.

₄Ba ba ntlhoileng ka bomo fela

ba bantsi bogolo go meriri

ya tlhogo ya me;

ba ba ratang ba kabo ba nkgaola,

e le baba ba me ka go sa siamang,

ba thata thata;

gone foo, ka rebola

se ke sa se tsayang.

₅Modimo o a bo itse boeleele

jwa me;

le maleo a me ga a go subegela.

₆Ba ba go lebeletseng

a ba se tlhajwe ke ditlhong

ka nna, Jehofa, Modimo wa

masomosomo; ba ba go batlang

a ba se tlisiwe mo tlotlologong ka

nna, Modimo wa Iseraele.

₇Gonne ke bogisegile kgobo

ka ntlha ya gago;

ditlhong di bipile sefatlhogo sa me.

₈Ke ntse moeng mo go bomorwa rre;

ke motho o sele

mo baneng ba ga mme.

₉Gonne tlhoafalelo ya ntlo ya gago

e njele;

e bile dikgobo tsa ba ba go kgobang

di wetse mo go nna.

₁₀E rile ke lela

ke otlhaya mowa wa me

ka go ikitsa go ja,

ya nna kgobo mo go nna.

₁₁E rile ke dira letsela la kgetse

go nna seaparo sa me, ka tloga

ka tswa seane mo go bone.

₁₂Ba ba tleng ba dule fa kgorong

ba bua ka ga me;

ke bile ke pina ya matagwa.

₁₃Ka ga me, morapelo wa me

o koo go wena, Jehofa,

mo motlheng o o lebosegang;

Modimo, mo bontsing

jwa boutlwelobotlhoko jwa gago,

o nkarabe mo boammaaruring

jwa poloka ya gago.

₁₄Ntshwatola mo morageng,

mme o se ka wa ntesa ka roromela;

a ke gololwe mo go ba ba ntlhoileng,

mme ke tswe mo metsing

a a boteng.

₁₅A morwalela wa metsi

o se mphikame;

le gone a bodiba jo bo botengteng

bo se ka jwa nkometsa,

mme molete o se ntswalele molomo

ke le mo teng.

₁₆Nkaraba, Jehofa,

ka gobo bopelonomi jwa gago

jwa lorato bo molemo,

ka fa bontsing

jwa mapelonolo a manana a gago,

retologela kwa go nna.

₁₇O se ka wa subela motlhanka

wa gago sefatlhogo sa gago;

gonne ke mo pitlaganong;

nkaraba ka bonako.

₁₈Atamela mowa wa me, o o golole;

nthekolola ka ntlha ya baba ba me.

₁₉Kgobo ya me o a e itse,

le ditlhong tsa me,

le tlotlologo ya me;

baganetsi ba me botlhe fela

ba fa pele ga gago.

₂₀Kgobo e phatlotse pelo ya me;

ke imelesegile pelo,

ka senka bangwe

ba ba ka tlhomogang pelo;

mme go ne go se na ope;

le bagomotsi,

mme ka se ka ka bona ope.

₂₁Ba bile ba nnaya santlhokwe

go nna sejo sa me;

le mo go nyorweng ga me

ba nnaya bojalwa jo bo botšarara

go bo nwa.

₂₂A lomati lwa bojelo lwa bone

lo tswe serai fa pele ga bone;

a e re ba le mo kagisong,

lo tle lo nne seru fela.

₂₃A matlho a bone a fifale

gore ba se bone;

o bo o roromise ditheka tsa bone

ka metlha yotlhe.

₂₄Ba goromeletse bogale jwa gago,

mme a kgakalo ya bogale jwa gago

e ba tshware.

₂₅A boago jwa bone

bo nne tshwafalo fela;

a go se age ope

mo megopeng ya bone.

₂₆Gonne ba bogisa ene

yo o mo iteileng;

ba bolele bohutsana

jwa ba o ba kwenesitseng.

₂₇Oketsa boikepo jwa bone ka

boikepo, mme ba se tle

mo tshiamong ya gago.

₂₈A ba phimolwe

mo lokwalong lwa botshelo,

ba se ka ba kwalwa le basiami.

₂₉Nna ke lehuma fela,

le bohutsana fela;

a poloka ya gago Modimo

e mpeye kwa godimo.

₃₀Ke tlaa baka leina la Modimo

ka sefela;

ke tlaa o goletsa

ka go ntsha malebogo.

₃₁Go tlaa kgatlha Jehofa

bogolo go kgomo,

le fa e le pholo

e e nang le dinaka le ditlhako.

₃₂Bapelonomi ba go bonye,

mme ba itumela;

lona ba lo senkang Modimo,

a pelo tsa lona di tshele.

₃₃Gonne Jehofa o utlwa batlhoki,

o bile a sa nyatse bagolegwi

ba gagwe.

₃₄A legodimo le mmake le lefatshe,

le mawatle,

le tsotlhe tse di bukunyang

mo go one.

₃₅Gonne Modimo o tlaa boloka Sione,

o tlaa aga metse ya Juta;

mme ba tlaa nna gone,

ba tlaa nna nayo

e le boswa jwa bone.

₃₆Losika lwa batlhanka ba one

le lone lo tlaa go rua;

le ba ba ratang leina la one

ba tlaa aga gone.