Pesalema 81

₁Opelelang Modimo, thata ya rona,

ka mantswe a a tsholetsegileng;

dudueletsang Modimo wa ga Jakobe

ka boitumelo.

₂Tlhabeletsang pesalema,

lereng kwano moropana,

harepe e e natefang le saletare.

₃A go lediweng lonaka

mo thogong ya kgwedi,

fa kgwedi e le tshweu,

mo letsatsing la modiro wa rona

o o masisi.

₄Gonne ke tao mo go Iseraele,

ke mo go laotsweng ke Modimo

wa ga Jakobe.

₅O go tlhomile mo go Josefe

go nna tshupo,

jale ka a ralala lefatshe la Egepeto,

kwa ke utlwileng puo gone,

e ke neng ke sa e itse.

₆“Ka tlosa lerudi la gagwe

mo morwalong; diatla tsa gagwe

tsa gololwa mo serotong.

₇E rile o le mo tlalelong wa bitsa,

mme ka go golola;

ka go araba mo felong

ga boiphitlhelo ga tumo ya maru;

ka go leka fa metsing a Meriba.

Sela.

₈“A ko o utlwe, tšhaba ya me,

mme ke tlaa go supetsa;

wena Iseraele,

fa o ka bo o ne o ka ntheetsa!

₉A go se nne modimo ope wa seeng

mo go wena; le gone o se ka

wa obamela modimo ope wa seeng.

₁₀Ke nna Jehofa, Modimo wa gago,

yo ke go tlhatlositseng

mo lefatsheng la Egepeto;

atlhamolosa legano la gago,

mme ke tlaa le tlatsa.

₁₁“Mme batho ba me ga ba a ka ba

reetsa lentswe la me;

Iseraele ga a ka a nthaya sepe.

₁₂Jalo ka ba lesa

ba latela kgwalalo ya pelo tsa bone,

gore ba tle ba tsamaye

mo dikgakololong tsa bone fela.

₁₃Ao, a bo batho ba me

ba ka bo ba ntheetsa,

Iseraele le ene o kabo a tsamaya

mo ditseleng tsa me!

₁₄Ke ne ke tlaa akofa ke fenya

baba ba bone,

ke phetsolela letsogo la me

kwa baganetsing ba bone.

₁₅Baidi ba ga Jehofa

ba ne ba tlaa ineela mo go ene;

mme lobaka lwa bone

lo ne lo tlaa nna ka bosakhutleng.

₁₆Le gone o ne a tlaa ba jesa mabele

a mantlentle bogolo;

ke ne ke tlaa go kgorisa ka dinotshe

tse di tswang mo lefikeng.”