Thapelo ya go gololwa mo losong
Sefela, Pesalema ya bomorwa Kora; ya moopedi yo mogolo; e laeletswe Mahalatha Leanotha. Masekile wa ga Hemane wa Moesara.
1Jehofa,
Modimo wa poloko ya me,
ke ntse ke gala fa pele ga gago
motshegare le bosigo.
2A morapelo wa me o tsene,
o fitlhe fa pele ga gago;
sekegela go gala ga me
tsebe ya gago;
3gonne mowa wa me
o tletse ditlalelo,
le botshelo jwa me
bo atamela kwa Bobipong.
4Ke balelwa le bone
ba ba fologelang mo moleteng;
ke ntse jaaka monna
yo o se nang thuso.
5Ke latlhetswe fela mo baswing,
jaaka ba ba bolailweng,
ba ba namaletseng mo phupung,
ba o sa tlholeng o ba gakologelwa
gope; mme ba kgaotswe
mo seatleng sa gago.
6O mpeile mo moleteng
o o kwa tengteng,
mo mafelong a a lefifi,
mo matennyeng.
7Kgalefo ya gago
e ntlapisitse ka thata,
o ntlhokofaditse
ka dinteelo tsotlhe tsa gago. Sela.
8Ba ke itsanyeng nabo
o ba isitse kgakala le nna;
o ntirile se se makgapha
mo go bone; ke tswaletswe,
mme ke reteletswe ke go tswa.
9Leitlho la me
le fela ka ntlha ya tlhokofatso;
ke ntse ke go bitsa, Jehofa,
ka letsatsi le letsatsi
ke otlololetse mabogo a me
koo go wena.
10A baswi o a bo o tlaa ba supetsa
dikgakgamatso?
A ba ba fetileng
ba tlaa tsoga ba go baka? Sela.
11A bopelonomi jwa gago jwa lorato
bo tlaa kakanngwa mo phupung?
le fa e le boikanngo jwa gago
mo goora Tshenyo?
12A dikgakgamatso tsa gago
di tlaa itsiwe mo lefifing?
Le tshiamo ya gago
mo lefatsheng la tebalo?
13Ke wena, Jehofa,
yo ke goetseng kwa go wena;
mme e tle e re go le ka moso
morapelo wa me
o tlaa nna o fitlha fa pele ga gago.
14Jehofa,
ana o latlhelang mowa wa me?
O ntshubelang sefatlhogo sa gago?
15Ke sa le ke patikega,
ke iketleeletsa go swa
le mo bokaung jwa me;
e a re fa ke boga ditheriso tsa gago
ke be ke rerege.
16Kgalefo e e tukang ya gago
e nthibegeditse;
ditheriso tsa gago di nkgaotse.
17Di ne tsa tlhola di mpharafere
jaaka metsi ka letsatsi lotlhe;
tsa mphola mmogo.
18Morati le tsala
o ba isitse kgakala le nna,
le ba ke itsanyeng nabo
o ba isitse mo lefifing.
