Kgalaletso ya tshiamo ya ga Jehofa
Pesalema, Sefela sa letsatsi la Sabata.
1Ke selo se se molemo
go ntshetsa Jehofa malebogo,
le go opelela leina la gago dipako,
wena Mogodimodimo;
2go bolelelapale bopelonomi
jwa gago jwa lorato go le ka moso,
le boikanngo jwa gago
ka masigo otlhe.
3Ka seletso se se megala e le some,
le ka saletare;
ka modumo o o tibelang tlase
ka harepe.
4Gonne wena, Jehofa,
O impedisitse ka tiro ya gago;
ke tlaa ja koma
mo ditirong tsa diatla tsa gago.
5Ana ditiro tsa gago
di dikgolo jang Jehofa!
Megopolo ya gago e boteng thata.
6Motho yo o seeleele ga a itse;
le gone lesilo ga le tlhaloganye mo,
go re,
7e re baikepi ba tswetswena
jaaka bojang,
le badira tshiamolo botlhe ba kgaba;
e be e le gore ba nyelelediwe ruri.
8Mme wena Jehofa,
o kwa godimo ka bosenabokhutlo.
9Gonne, bona, baba ba gago, Jehofa;
gonne bona,
baba ba gago ba tlaa nyelela;
badiri botlhe ba tshiamololo
ba tlaa gasagasega fela.
10Lonaka lwa me
o lo goleditse jaaka lwa nare;
ke tloditswe lookwane lo loša.
11Leitlho la me le lone le bonye
keletso ya me mo babeng ba me,
ditsebe tsa me di utlwile
keletso ya me ka ga badira bosula
ba ba ntsogologelang.
12Mosiami o tlaa kgaba jaaka
mokolane; o tlaa gola
jaaka mosetara wa Lebanone.
13Ba ba tlhomilweng
mo ntlong ya ga Jehofa
ba tlaa kgaba mo malwapeng
a Modimo wa rona.
14Ba tlaa fela ba ntse ba ungwa fela
le mo botsofeng;
ba tlaa tlala monono,
ba nna banana,
15go supa fa Jehofa a le thokgamo;
ke ene lefika la me,
mme ga go na tshiamololo epe
mo go ene.
