TSHENOLO 2

₁“Kwalela moengele wa phuthego e e mo Efeso, o re: ‘Yo o tshotseng dinaledi tse supa mo seatleng sa gagwe se segolo, yo o tsamayatsamayang mo gare ga ditlhomo tsa dipone tse di supang tsa gouta, o bua dilo tse, a re: ₂Ke a di itse ditiro tsa gago, le letsapa la gago, le bopelotelele jwa gago, le ka fa o sa rateng batho ba ba bosula ka teng, le jaaka o lekile ba ba ipitsang baaposetole, mme e se bone, mme wa fitlhela e le batsietsi fela; ₃o na le bopelotelele, wa nna wa itshoka, ka ntlha ya leina la me, mme wa bo o ise o lape. ₄Ke go nyaletsa se, ka re, o tlogetse lorato lwa gago lwa ntlha. ₅Ke gone, a ko o gakologelwe kwa e rileng o wa wa bo o tswa teng, mme o ikwatlhaye, o dire ditiro tsa ntlha; fa go sa nna jalo, ke tlaa ya koo go wena, ke tlosa setlhomo sa gago sa lobone mo bonnong jwa sone, fa o sa ikwatlhaye. ₆Mme se o nang naso ke se, o ila ditiro tsa Banikolaitane, tse le nna ke di ilang.

₇“ ‘Yo o nang le tsebe, a utlwe se Mowa o se buang le diphuthego. Yo o fenyang, ke ene yo ke tlaa mo nayang go ja setlhare sa botshelo, se se mo Parataisong ya Modimo.’

₈“O kwalele moengele wa phuthego e e mo Semurena, o re: ‘Wa ntlha le wa bofelo, yo o kileng a swa, a ba a tshela gape, o bua dilo tse, a re: ₉Ke a e itse pitlagano ya gago, le khumanego ya gago – mme o humile – ke a go itse go tlhapatsa ga ba ba ikayang gore ke Bajuta, mme e se bone, e le ba phuthego nngwe ya ga Satane. ₁₀O se ka wa boifa dilo tse o tlogang o boga botlhoko jwa tsone. Bonang, diabolo o tloga a latlhela bangwe ba lona mo ntlong ya kgolegelo, gore lo lekwe; mme lo tlaa bona pitlagano ka malatsi a le some. O nne boikanngo fela le go ya kwa losong, mme ke tlaa go naya serwalo sa botshelo.

₁₁“ ‘Yo o nang le tsebe, a a utlwe se Mowa o se buang le diphuthego. Yo o fenyang ga a ketla a utlwisiwa botlhoko ke loso lwa bobedi.’

₁₂“O kwalele moengele wa phuthego e e mo Peregamo, o re: ‘Yo o tshotseng tšhaka e e lootsegileng, e e magale mabedi, o bua dilo tse, a re: ₁₃Ke a go itse kwa o agileng teng, e bong kwa setulo sa ga Satane sa bogosi se leng teng; mme o ntse o ngaparetse leina la me, wa se ka wa itatola tumelo ya me, le mo motlheng wa ga Antipase mosupi wa me, moikanngwi wa me, yo o bolaetsweng mo go lona, fa Satane o agileng teng. ₁₄Go na le dilo dingwenyana tse ke di go nyaletsang, ka o na le bangwe koo ba ba dumelang thuto ya ga Balaame, yo o ne a ruta Balake go baya sekgopiso fa pele ga bana ba Iseraele, gore ba je dilo tse di isediwang medimo ya disetwa ditlhabelo, le go dira kgokafalo. ₁₅O bile o na le bangwe ba ba dumelang thuto ya Banikolaitane ka mokgwa o o ntseng jalo. ₁₆Ka re, o ikwatlhaye; fa go sa nna jalo, ke tlaa ya ka bonako koo go wena, ke tlhabana nabo ka tšhaka ya molomo wa me.

₁₇“ ‘Yo o nang le tsebe, a a utlwe se Mowa o se buang le diphuthego. Yo o fenyang, ke ene ke tlaa mo abelang mana a a fitlhilweng, ke tlaa mo naya lentswe le lesweu, lentswe leo go tlaa bo go kwadilwe leina le leša mo go lone, le go se nang ope yo o le itseng, fa e se ene yo o le amogelang.’

₁₈“O kwalele moengele wa phuthego e e mo Thiatira, o re: ‘Morwa Modimo, yo matlho a gagwe a ntseng jaaka kgabo ya molelo, le dinao tsa gagwe di ntseng jaaka kgotlho e e gotlhilweng, o bua dilo tse, a re: ₁₉Ke a di itse ditiro tsa gago, le lorato lwa gago, le tumelo, le tirelo, le bopelotelele, le gore ditiro tsa gago tsa morago di feta tsa ntlha. ₂₀Mme ke go nyaletsa selo se, gore o leseletsa mosadi yo go tweng Jesebele, yo o ipitsang moperofeti wa sesadi; o a ruta, o fepisetsa batlhanka ba me mo kgokafalong, le mo go jeng dilo tse di iseditsweng medimo ya disetwa ditlhabelo. ₂₁Mme ka mo naya lobaka gore a ikwatlhaye; mme ga a rate go ikwatlhaela kgokafalo ya gagwe. ₂₂Bona, ene ke mo latlhela mo bolaong, le ba ba dirang boaka nae, mo pitlaganong e kgolo, fa ba sa ikwatlhaele ditiro tsa bone. ₂₃Ke tlaa bolaya bana ba gagwe ka loso; mme diphuthego tsotlhe di tlaa itse fa ke le ene yo ke hukutsang diphilo le dipelo; ke tlaa naya mongwe le mongwe wa lona ka fa ditirong tsa lona.

₂₄“ ‘Mme ke raya lona, e bong lona ba lo setseng mo Thiatira, e le ba lo kwa ntle ga thuto e, lo sa itse dilo tse di boteng tsa ga Satane, jaaka di tle di bidiwe jalo; ka re, ga ke lo beye morwalo ope o sele. ₂₅Le fa go ntse jalo, se lo nang naso lo se tshware thata, go tle go tsamaye ke tle. ₂₆Yo o fenyang, le yo o bolokelang ditiro tsa me go ya kwa bofelong, ke ene yo ke tlaa mo nayang taolo mo merafeng; ₂₇mme o tlaa e laola ka tsamma ya tshipi; fela jaaka dijana tsa mmopi di tle di thubaganngwe; jaaka le nna ke amogetse mo go Rre; ₂₈mme ke tlaa mo naya naledi ya moso.

₂₉“ ‘Yo o nang le tsebe, a a utlwe se Mowa o se buang le diphuthego.’