BAROMA 11

₁Jaana a ke go re Modimo o latlhile batho ba one? A go se tualo. Gonne le nna ke Moiseraele wa losika lwa ga Aberahame, wa lotso lwa ga Benjamine. ₂Modimo ga o a ka wa latlha batho ba one ba o ba itsileng gale. Kgotsa a ga lo itse se lokwalo lo se buang ka ga Elija? Ka fa o rapelang Modimo ka teng ka ga Iseraele, a re: ₃“Morena, ba bolaile baperofeti ba gago, ba rutlile dibeso tsa gago; ke tlogetswe ke le nosi, mme le nna ba senka go mpolaya.” ₄Mme phetolo ya Modimo e mo reile ya reng? Ya re: “Ke itshadiseditse banna ba le 7 000, ba ba sa khubamelang Baale.” ₅Go ntse jalo le gompieno go na le masalela ka fa boitshenkelong jwa tshegofatso. ₆Fa e le ka tshegofatso, ga e tlhole e le ga ditiro; gonne jalo tshegofatso e tlaa bo e sa tlhole e le tshegofatso.

₇Go a reng? Ga re se Iseraele o se batlileng, ga a ka a se fitlhela; mme ba ba itshenketsweng ba se fitlhetse, ba bangwe ba kgwaraladiwa; ₈jaaka go kwadilwe ga twe: “Modimo wa ba naya mowa wa thulamelo, le matlho a gore ba se ka ba bona ka one, le ditsebe tsa gore ba se ka ba utlwa ka tsone, nako e sa ntse e le eno.” ₉Dafite a re: “A lomati lwa bone lwa bojelo e nne seru, le mogotlha, le sekgopiso, le tefetso mo go bone. ₁₀A matlho a bone a fifale, gore ba se bone, o bo o ba konamise mekwatla ka metlha yotlhe.”

₁₁Jalo ka re: A ba kgopilwe gore ba tle ba we fela? A ko go se tualo; mme poloko e tletse Baditšhaba ka go wa ga bone, go tla ba ba fufanya. ₁₂Jaana, fa go wa ga bone e le khumiso ya lefatshe, le tatlhegelo ya bone e le khumiso ya Baditšhaba; bogolo jang letlotlo la bone le tlaa ba humisa.

₁₃Ke bua le lona ba lo leng Baditšhaba; e re ka ke le moaposetole wa Baditšhaba, ke tlotla tirelo ya me; ₁₄e tle e re kgotsa ka mokgwa mongwe ka fufanya ba e leng ba nama ya me, mme ka boloka bangwe ba bone. ₁₅Ka gobo e re fa go latlhwa ga bone e le go letlanngwa ga lefatshe, go amogelwa ga bone e tlaa nna eng, fa e se go tshela ga baswi fela?

₁₆Fa mabutswapele a le boitshepo, a mantsi le one a ntse jalo; fa modi o le boitshepo, dikala le tsone di ntse jalo. ₁₇Fa dikala dingwe di amolotswe, mme wena yo o leng motlhware wa naga, wa lomelelwa mo gare ga tsone, mme wa tlhakanela modi le monono wa motlhware natso; ₁₈o se ka wa ipelafatsa mo dikaleng; fa o ipelafatsa, aitse ga se wena o rweleng modi, mme modi o rwele wena.

₁₉O a bo o tlaa re: “Dikala di amolotswe gore ke tle ke lomelwe.” ₂₀Le gale; bone ba amolotswe ke go tlhoka go dumela ga bone, mme wena o eme ka tumelo ya gago fela. O se ka wa ikgodisa, mme o boife; ₂₁gonne fa Modimo o se ka wa rekegela dikala tse e leng tsa tlholego, le wena ga o ketla o go rekegela. ₂₂A ko o bone bopelonomi le bopeloethata jwa Modimo; mo go ba ba oleng ke bopeloethata; mme mo go wena, ke bopelonomi jwa Modimo, fa o tswelela pele mo bopelonoming jwa one; fa go sa nna jalo, le wena o tlaa amololwa. ₂₃Le bone, fa ba sa nnele ruri mo go tlhokeng go dumela ga bone, ba tlaa lomelwa; gonne Modimo o nonofile go ba o ba lomela gape. ₂₄Gonne fa wena o amolotswe mo go o e leng motlhware wa naga tlholegong, mme wa lomelelwa ka fa e seng tlholego mo motlhwareng o o molemo; bogolo jang bone ba e leng dikala tsa tlholego, ba tlaa lomelelwa mo motlhwareng o e leng wa ga bone?

₂₅Gonne bagaetsho, ga ke rate lwa tlhoka go itse bosaitsiweng jo, e se re kgotsa lwa ikgopola fa lo le botlhale; ke go re, ka ntlha e nngwe, bokgwaralalo jwa pelo bo wetse Iseraele, go ba go tsamaya go tlalediwa ga Baditšhaba go tsena pele. ₂₆Jalo Baiseraele botlhe ba tlaa bolokwa; fela jaaka go kwadilwe ga twe: “Go tlaa tswa Mogolodi mo Sione; mme o tlaa tlosa boikepo mo go Jakobe.” ₂₇Eo ke yone kgolagano ya me nabo, mogang ke tlosang dibe tsa bone. ₂₈Ka ga Mafoko a a Molemo, ke baba ka ntlha ya lona; mme ka ga boitshenkelo, ke baratwi ka ntlha ya borara ba bone. ₂₉Gonne dineo le pitso ya Modimo ga di ikwatlhaelwe. ₃₀Gonne jaaka e rile mo metlheng e e fetileng, lona lo ne lo sa utlwe Modimo, mme jaanong lo bonye boutlwelobotlhoko ka go tlhoka go utlwa ga bone, ₃₁le bone ba, ba ntse botlhokakutlo fela jalo, gore le bone ba bone kutlwelobotlhoko jaanong, ka kutlwelobotlhoko e lona lo e bonyeng. ₃₂Gonne Modimo o tswaletse botlhe fela mo go tlhokeng kutlo, gore o tle o utlwele botlhe botlhoko.

₃₃A boteng jwa khumo, le jwa botlhale, le jwa kitso ya Modimo! Dikatlholo tsa one ga di fopholesege jang, le ditsela tsa one ga di tlhotlhomisege jang! ₃₄“Gonne ke mang yo o itsileng mogopolo wa Morena? Kgotsa: Ke mang yo o kileng a nna mogakolodi wa gagwe?” ₃₅“Kgotsa ke mang yo o kileng a mo naya pele, mme o tlaa ba a go busediwa gape?” ₃₆Gonne dilo tsotlhe di tswa mo go ene, di ntse ka ene, di nnetse ene. A kgalalelo e nne go ene ka metlha e e sa khutleng. Amen.